ນາງ ອາລິຍາ ວົງດາລາ (ນ້ອງ ປູເປ້) ນັກກິລາເທັນນິສ ເຍົາວະຊົນລາວ ທີ່ສາມາດໄປສ້າງຜົນງານດີເດັ່ນ ໃນການແຂ່ງຂັນ ເທັນນິສຮຸ້ນຍິງດ່ຽວອາຍຸບໍ່ເກີນ 12 ປີ ຂອງລາຍການ PTT JUNOIR CHAMPIONSHIP ຄັ້ງທີ 1 ທີ່ນະຄອນຫລວງບາງກອກ, ປະເທດໄທ. ເຊິ່ງໄດ້ຈັດຂຶ້ນໃນລະຫວ່າງວັນທີ 4-7 ກຸມພາ 2017. ໂດຍຮອບຊີງຊະນະເລີດໄດ້ເອົາຊະນະ ນາງ ພັສລາພາ ອອນນຸຊະກະ ນັກກິລາເຍົາວະຊົນໄທ ໄປ 2-0 ເຊັດ, ດ້ວຍຄະແນນ 5-3 ແລະ 4-0. ເຮັດໃຫ້ ປູເປ້ ສາມາດຄ້ວາແຊັ້ມລາຍການນີ້ມາຄອງໄດ້ສຳເລັດ

ນ້ອງ ປູເປ້ ໃນໄວອາຍຸພຽງ 12 ປີ ເທົ່ານັ້ນແຕ່ກໍ່ໄດ້ສ້າງຊື່ສຽງໃຫ້ກັບປະເທດ ນອກຈາກທີ່ນ້ອງຈະເປັນຄວາມພາກພູມໃຈຂອງຄົນທັງປະເທດ ແລະ ເປັນຕົວຢ່າງເຍົາວະຊົນທີ່ດີແລ້ວ ນ້ອງຍັງເປັນຄວາມຫວັງນັກເທັນນິສສາວຂອງລາວໃນອານາຄົດອີກດ້ວຍ ຖ້ານ້ອງໄດ້ຮັບການດູແລຝຶກຝົນຢ່າງດີ ແລະ ຕໍ່ເນື່ອງຄາດວ່າ ໃນອານາຄົດຈະມີຊື່ ຂອງ ປູເປ້ ຕິດອັນດັບຕົ້ນໆຂອງອາຊີ ຫຼື ຂອງໂລກໄດ້ແນ່ນອນ

ທາງທີມງານລາວໂພສຕ໌ ຂໍສະແດງຄວາມຍິນດີກັບຜົນສຳເລັດຂອງນ້ອງໃນຄັ້ງນີ້ ແລະ ອວຍພອນໃຫ້ນ້ອງຈົ່ງປະສົບຄວາມສຳເລັດ ແລະ ໝັ່ນຕັ້ງໃຈຝຶກຝົນຢ່າງສະໝ່ຳສະເໝີ ເພາະນ້ອງເປັນອີກໜຶ່ງຄວາມຫວັງ ຂອງວົງການກິລາເທັນນິສຂອງບ້ານເຮົາ ແລະ ຫວັງວ່າໃນອານາຄົດຈະເຫັນໄດ້ໄປຢືນຢູ່ກາງແຂ່ງຂັນເທັນນິສໃນເວທີລະດັບໂລກ