ສຳນັກຂ່າວຕ່າງປະເທດ ລາຍງານໃນວັນທີ 6 ກຸມພານີ້ວ່າ ທ່ານ ໂດນັນ ທຣັມ ປະທານາທິບໍດີ ສະຫະລັດອາເມຣິກາ ໄດ້ຕົກລົງທີ່ຈະເຂົ້າຮ່ວມກອງປະຊຸມກັບ ບັນດາຜູ້ນຳຊາດພັນທະມິດ ກຸ່ມສົນທິສັນຍາປ້ອງກັນແອັດແລນຕິກເໜືອ ຫລື ນາໂຕ້ ໃນເດືອນພຶດສະພາທີ່ຈະມາເຖິງນີ້ ຫລັງຈາກທີ່ໄດ້ເຈລະຈາກັບ ທ່ານ ເຈນສ໌ ສະໂຕເຕັນເບິກ ເລຂາທິການກຸ່ມນາໂຕ້ ໃນວັນອາທິດທີ 5 ກຸມພາຜ່ານມານີ້.
ທັງນີ້ ເປັນທີ່ຄາດການວ່າ ທ່ານ ທຣັມ ຈະດຳເນີນການຊຸກຍູ້ໃຫ້ສະມາຊິກນາໂຕ້ ເພີ່ມການລະດົມກຳລັງໄປເຂດຕາເວັນຕົກ ເພື່ອບັນເທົາຄ່າໃຊ້ຈ່າຍທາງທະຫານຂອງ ກອງທັບສະຫະລັດອາເມຣິກາ ຕາມທີ່ທ່ານໄດ້ເຄີຍເວົ້າໃນເວລາຫາສຽງເລືອກຕັ້ງ, ແນວໃດກໍຕາມ ຂໍ້ສະເໜີດັ່ງກ່າວນີ້ ໄດ້ຖືກສະມາຊິກພັກຣີພາບລິກັນ ແລະ ຝ່າຍຄ້ານໃນພັກເດໂມແຄຣັດເອງ ມີຄວາມເປັນຫວ່ງວ່າ ນະໂຍບາຍດັ່ງກ່າວນີ້ ຈະເປັນການເອື້ອປະໂຫຍດທາງທະຫານ ໃຫ້ແກ່ຝ່າຍຣັດເຊຍ.