ເວັບໄຊເດລີ່ເມລ ລາຍງານເມື່ອວັນທີ 31 ມັງກອນ 2017 ຜ່ານມາວ່າ ຮັນເຕີ ຄິດເທິນ ຊາຍໜຸ່ມຊາວອາເມລິກາອາຍຸ 24 ປີ ເກີດອຸປະຕິເຫດລົດປີ້ນຕົກໜ້າຜາສູງປະມານ 21 ແມັດ ຢູ່ບໍລິເວນພູເຂົາບາລດີ້ ລັດຄາລິຟໍເນຍ ຂອງສະຫະລັດອາເມລິກາ ໃນວັນທີ 22 ມັງກອນ 2017 ຜ່ານມາ ຫຼັງຈາກນັ້ນຜ່ານໄປ 3 ວັນເຈົ້າໜ້າທີ່ກູ້ໄພຈຶ່ງໄດ້ພົບຮ່າງຂອງລາວ ແລະບໍ່ໜ້າເຊື່ອວ່າ ລາວຍັງມີຊີວິດຢູ່ ຈຶ່ງຮີບນໍາສົ່ງໂຮງໝໍໂດຍດ່ວນ
ຈາກການລາຍງານບອກວ່າ ຮັນເຕີ ໄດ້ຮັບບາດເຈັບອາການສາຫັດ, ກະໂຫຼກຫົວແຕກ, ກະດູກຂ້າງຫັກ, ປອດຈີກເສຍຫາຍ ແລະຂາຫັກ ເຊິ່ງທາງແພດບອກວ່າ ບາດແຜຮຸນແຮງຈາກອາການບາດເຈັບຂອງລາວ ສຳລັບຄົນສ່ວນຫຼາຍພຽງແຕ່ 1 ຊົ່ວໂມງຫຼັງຈາກເກີດອຸປະຕິເຫດ ກໍບໍ່ສາມາດມີຊີວິດໄດ້, ແຕ່ເຫດການທີ່ເກີດຂຶ້ນກັບຮັນເຕີ ຍິ່ງກວ່າປະຕິຫານ ລາວສາມາດຢູ່ໄດ້ເຖິງ 3 ວັນ ແລະທາງແພດກໍບໍ່ສາມາດຫາຄໍາຕອບໄດ້ເຊັ່ນກັນ ແລະໄດ້ຮັບການປິ່ນປົວຢູ່ໂຮງໝໍ ຈົນລອດມາແບບປະຕິຫານ