ໃນທ້າຍ​ອາທິດ​ ​ຜ່ານ​ມາ, ສະຫາຍ ບຸນຍັງ ວໍລະຈິດ ​ປະທານປະເທດແຫ່ງ ສປປ ລາວ ພ້ອມ​ດ້ວຍ​ຄະນະ ໄດ້ລົງເຄື່ອນໄຫວຢ້ຽມຢາມ ​ແລະ ຊຸກຍູ້​ປະຊາຊົນ ​ໃນບ້ານປ່າ​ກ້ວຍ ​ແລະ ບ້ານຄຳປ່າແໜ ​ເມືອງ​ຈຳ​ພອນ ​ແຂວງສະຫວັນ​ນະ​ເຂດ, ​ເຊິ່ງບ້ານດັ່ງກ່າວ ​ເປັນ​ບ້ານ​ທຸກ​ຍາກ ​ໂດຍ​ການ​ນຳ​ຂັ້ນ​ແຂວງ, ​ເມືອງ ​ຮ່ວມ​ກັບ​ພາກ​ທຸລະ​ກິດ ​ເອກະ​ຊົນ ພາຍ​ໃນ​ໄດ້ເຂົ້າມາຊ່ວຍເຫລືອ ແລະ ປະກອບສ່ວນຈັດ​ຕັ້ງ​ໂຄງການ ​ແກ້​ໄຂ​ຄວາມທຸກ​ຍາກ​ ຂອງ​ປະຊາຊົນ ຢູ່​ບ້ານ​ດັ່ງກ່າວ ​ແນ​ໃສ່​ຊຸກຍູ້​ສົ່ງ​ເສີມ ​ໃຫ້​ປະຊາຊົນ​ ໄດ້​ມີ​ຊີວິດ​ການ​ເປັນ​ຢູ່ ທີ່​ດີ​ຂຶ້ນ​ເທື່ອ​ລະ​ກ້າວ.

​ທ່ານ ດວງ​ຈັນ ວຽງ​ວິ​ໄລ ຫົວໜ້າ​ຫ້ອງ​ວ່າການ​ ເມືອງ​ຈຳ​ພອນ ​ແຂວງ​ສະຫວັນ​ນະ​ເຂດ ​ໄດ້​ລາຍ​ງານ  ​ໃຫ້ປະທານປະເທດ ​ຮູ້​ວ່າ: ບ້ານ​ຄຳ​ປ່າ​ແໜ ​ແລະ ບ້ານ​ປ່າ​ກ້ວຍ ຕັ້ງ​ຢູ່​ຫ່າງ​ຈາກ​ເທດສະ​ບານ​ເມືອງ ​ປະມານ 19 ກິ​ໂລ​ແມັດ ​ເຊິ່ງບ້ານປ່າ​ກ້ວຍ​ ​ມີ 97 ຫລັງຄາ​ເຮືອນ, ມີ 105 ຄອບຄົວ ​ແລະ ບ້ານ ຄຳ​ປ່າ​ແໜ ​ມີ 119 ຫລັງຄາ​ເຮືອນ ມີ 129 ຄອບຄົວ, ພົນລະ​ເມືອງທັງ​ສອງບ້ານ​ມີ 1.483 ຄົນ, ຍິງ 712 ຄົນ, ອາ​ຊີບຕົ້ນຕໍ ​ແມ່ນ​ເຮັດ​ນາ​ປູກ​ເຂົ້າ ​ແລະ ປູ​ກຝັງ​ລ້ຽງສັດ​ ເປັນ​ສຳຮອງ, ເຊິ່ງ​ໄລຍະ​ຜ່ານ​ມາ ​ໄດ້​ມີ​ຄອບຄົວ​ຈຳນວນ​ໜຶ່ງ ມີ​ແນວ​ຄິດ​ເອື້ອຍ​ອີງ​ສັງຄົມ (ຂໍທານ​ເປັນ​ອາຊີບ) ແລະ ອື່ນໆ​. ປັດຈຸບັນ​ນີ້ ທາງ​ອໍານາດ​ການ​ປົກຄອງ​ເມືອງ ​ໄດ້​ມີ​ການ​ຮ່ວມ​ມືກັບ​ກອງ​ທຶນ ​ຫລຸດຜ່ອນ​ຄວາມທຸກ​ຍາກ ​ແລະ ນັກທຸລະກິດ​ຈໍານວນ​ໜຶ່ງ ​ໂດ​ຍສ້າງ​​ໄດ້​ມີ​ການ​ ສອນ​ວິທີ​ການ​ຜະລິດ​ກະສິກໍາ ​ໄລຍະ​ສັ້ນ​-ຍາວ, ​​ເຕັກນິກ, ສະໜອງ​ທຶນຮອນ, ​ໄຟຟ້າ​, ນໍ້າ​ສະອາດ, ​ໂຮງຮຽນ ແລະ ອື່ນໆ ​ເຂົ້າ​ເຖິງ​ບ້ານ​ດັ່ງກ່າວ​ແລ້ວ​ເພື່ອ​ສຸມ​​ໃສ່​​ ໃຫ້​ເຂົາ​ເຈົ້າ​ມີ​ທັດສະນະ ​ອອກ​ແຮງ​ງານ, ມີ​ວິຊາ​ຊີບ​ແນ່ນອນ, ມີ​ຄວາມ​ຮູ້​ຄວາມ​ສາມາດ ​ເອົາ​ໂຕ​ລອດ.

​ໃນ​ໂອກາດດັ່ງກ່າວ​ນີ້, ສະຫາຍ ບຸນຍັງ ວໍລະຈິດ ​ໄດ້​ມີ​ຄຳ​​ເຫັນ​ໂອ​ລົມ ​ໂດຍເນັ້ນ​ໃຫ້​ການ​ນຳ​ຂັ້ນ​ແຂວງ ​ແລະ ​ເມືອງ ຕະຫລອດ​ຮອດ ພະນັກງານ​ແຕ່ລະ​ຂັ້ນ ​ໃຫ້​​​ເອົາ​ໃຈ​ໃສ່​​ແກ້​ໄຂ​ບາງ​ຂໍ້ຄົງຄ້າງ​, ​ເພີ່ມ​ທະວີ​ພັດ​ທະ​ນາ​ ​ແລະ ຍົກ​ລະດັບ​ຊີວິດການ​ເປັນ​ຢູ່​ ຂອງ​ປະ​ຊາ​ຊົນ​ ໃຫ້​ນັບ​ມື້​ດີ​ຂຶ້ນ​ເທື່ອ​ລະ​ກ້າວ ​ແລະ ສາມາດ​ຫລຸດ​ພົ້ນ​ອອກ​ຈາກ​ ຄວາມທຸກ​ຍາກ​ ໃນ​ຕໍ່ໜ້າ​ໂດຍ​ໄວ;   ​ເລັ່ງ​ແກ້​ໄຂ ບາງ​ປະກົດ​ການ​ຫຍໍ້​ທໍ້​ ໂດຍ​ສະ​ເພາະ​ ແນວ​ຄິດການ​ຂີ້ຄ້ານ​ມັກງ່າ​ຍ, ມີ​ແນວ​ເອື່ອຍ​ອີງ​ສັງຄົມ (ຂໍທານ), ຍົກລະ​ລະດັບ​ຊີວິດ​ການ​ເປັນ​ຢູ່​ ຂອງ​ປະຊາຊົນ, ສ້າງ​ໃຫ້​ມີ​ສຸກສາລາ ​ແລະ ​ໂຮງຮຽນ​ເພື່ອ​ໃຫ້​ລູກ​ຫລານ​ ໄດ້​ຮຽນ​ໜັງສື ​ແລະ ສ້າງຄວາມຢູ່​ດີ​ກິນ​ດີ ​ໃຫ້ປະຊາຊົນ​ມີ​ຄວາມຜາ​ສຸກ ​ແລະ ອື່ນໆ, ພ້ອມ​ດຽວ​ກັນ​ນັ້ນ, ທ່ານ ຍັງ​ໄດ້​​ສະ​ແດງ ​ຄວາມ​ຍ້ອງຍໍ​ຊົມ​ເຊີຍ​ ຕໍ່​ຜົນ​ສໍາ​ເລັດ​ ທີ່​ປະຊາຊົນ​ສອງ​ບ້ານຍາດ​ມາ​ໄດ້, ​ເຮັດ​ໃຫ້​ມີ​ໃບ​ໜ້າ​​ໃໝ່ ຫລາຍ​ດ້ານ, ຢ່າງ​ໃດ​ກໍ່ຕາມ ​ຍັງ​ມີ​ສິ່ງ​ທ້າ​ທາຍຫລາຍບັນຫາ​ ທີ່​ຈະ​ຕ້ອງ​ໄດ້​ແກ້​ໄຂ​ຮີບ​ດ່ວນ​​ ​ເປັນ​ຕົ້ນ ​ໃຫ້​ພາກສ່ວນ​ກ່ຽວຂ້ອງ​ທາງ​ແຂວງ, ​ເມືອງ ​ເອົາ​​ໃຈໃສ່​ລົງ​ໃກ້​ຊິດ ​ຕິດ​ແທດ​ກັບ​ປະຊາຊົນ​ ກ່ຽວກັບ​ບັນຫາ​ຊົນລະປະທານ​, ຊອກ​ຫາ​ແຫ​ລ່ງທຶນ ​ແລ​ະ ຕະຫລາດ​ຮອງ​ຮັບ​ຜົນ​ຜະລິດ. ​

ຂ່າວ: ສຳນັກຂ່າວສານປະເທດລາວ