ສຳນັກຂ່າວຕ່າງປະເທດລາຍງານເມື່ອວັນທີ 26 ມັງກອນ 2017 ນີ້ວ່າ ປະຊາກອນຈີນຖືກຄາດການວ່າຈະເພີ່ມຈຳນວນສູງຂຶ້ນເຖິງ 1,450 ລ້ານຄົນ ພາຍໃນປີ 2030 ຫຼືອີກ 13 ປີຂ້າງໜ້າ, ເຊິ່ງປັດຈຸບັນປະຊາກອນຈີນຢູ່ທີ່ 1,375 ລ້ານຄົນ ເຊິ່ງເປັນປະເທດທີ່ມີປະຊາກອນຫຼາຍທີ່ສຸດໃນໂລກ ແລະກໍາລັງປະເຊີນກັບຈໍານວນຜູ້ອາຍຸສູງເພີ່ມຂຶ້ນເລື້ອຍໆ
ຊ່ວງເວລາສຳຄັນຈະຢູ່ລະຫວ່າງປີ 2021-2030 ໃນອະນາຄົດຈໍານວນປະຊາຊົນອາຍຸເຮັດວຽກຈະຫຼຸດລົງ ແລະມີຜູ້ອາຍຸສູງເພີ່ມຈຳນວນຂຶ້ນ, ບັນດາແຮງງານຂ້າມຊາດຍັງຄົງຫຼັ່ງກັນເຂົ້າມາເຮັດວຽກຢູ່ຈີນ ແລະໃນຊ່ວງຫຼັງປີ 2030 ອັດຕາການເຕີບໂຕຂອງປະຊາກອນຈີນຈະຄ່ອຍໆຫຼຸດລົງ ເຊິ່ງການຄາດການນີ້ ຈາກອົງກອນແຜນພັດທະນາປະຊາກອນແຫ່ງຊາດ
ທັງນີ້ ລັດຖະສະພາຈີນລາຍງານວ່າ ຈາກຜົນການຄາດການດັ່ງກ່າວ ນະໂຍບາຍ ແລະແຜນການຈັດການກັບປະຊາກອນ ໄປຈົນເຖິງການບໍລິຫານຊັບພະຍາກອນ ແລະສິ່ງແວດລ້ອມຂອງຈີນ ຍັງຄົງບໍ່ປ່ຽນແປງ, ເຊິ່ງຈີນຫາກໍມີນະໂຍບາຍໃຫ້ຄູ່ແຕ່ງງານສາມາດມີລູກສອງຄົນໄດ້ ເພື່ອສົ່ງເສີມການສ້າງປະກອນຈີນຢ່າງສົມດູນ ແລະໃນແຜນການພັດທະນາ ຍັງລວມໄປເຖິງການໃຫ້ຄວາມຮູ້ ກ່ຽວກັບການວາງແຜນຄອບຄົວອີກດ້ວຍ