ສຳນັກຂ່າວຕ່າງປະເທດ ລາຍງານໃນວັນທີ 4 ມັງກອນນີ້ວ່າ ນ້ຳປ່າໄດ້ໄຫລຊຸເຂົ້າຖ້ວມຫລາຍພື້ນທີ່ ແຂວງນະຄອນສີທຳມະຣາດ ທາງພາກໃຕ້ຂອງໄທ ໃນນັ້ນໄດ້ຖ້ວມສູງເຮັດໃຫ້ທາງລົດໄຟເສຍຫາຍ ເປັນໄລຍະທາງຫລາຍຮ້ອຍກິໂລແມັດ ສົ່ງຜົນເຮັດໃຫ້ທາງການ ໂຈະການເດີນທາງຂອງລົດໄຟ ຈາກນະຄອນຫລວງບາງກອກ ລົງສູ່ພື້ນທີ່ດັ່ງກ່າວເຖິງ 4 ຂະບວນ ໂດຍການລົດໄຟໄທ ໄດ້ຈັດລົດເມໂດຍສານ ເພື່ອຂົນຍ້າຍຜູ້ໂດຍສານໄປສູ່ປາຍທາງແທນ.
ທັງນີ້ ສະຖານະການນ້ຳປ່າໄຫລຊຸ ຍັງຄົງສົ່ງຜົນກະທົບໃນຫລາຍພື້ນທີ່ຂອງ ແຂວງນະຄອນສີທຳມະຣາດ ເຮັດໃຫ້ການຈະລາຈອນທາງບົກ ເປັນໄປຢ່າງຫຍຸ້ງຍາກລຳບາກ, ເຈົ້າໜ້າທີ່ທາງຫລວງຂອງໄທ ໄດ້ຈັດກຳລັງກະຈາຍໃຫ້ຄວາມຊ່ວຍເຫລືອ ແລະ ອຳນວຍຄວາມສະດວກຢູ່ແຕ່ລະຈຸດ ຊຶ່ງບາງບ່ອນ ຈຳເປັນຕ້ອງໄດ້ປິດການສັນຈອນ ເນື່ອງຈາກພາຫະນະທຸກຊະນິດ ບໍ່ສາມາດໃຊ້ການໄດ້ ເນື່ອງຈາກລະດັບນ້ຳຖ້ວມສູງ.
ຕິດຕາມເຮົາທາງFacebook ກົດຖືກໃຈເລີຍ!