ໃນວັນທີ 22 ທັນວາ 2016 ຜ່ານມາພິທີ ມອບ-ຮັບ ແລະເປີດນໍາໃຊ້ ຂົວ ຈໍານວນ 7 ແຫ່ງ ຢ່າງເປັນທາງການ ພາຍຫຼັງທີ່ສໍາເລັດການກໍ່ສ້າງ ເປັນກຽດເຂົ້າຮ່ວມມີ ທ່ານ ທອງລຸນ ສີສຸລິດ ນາຍົກລັດຖະມົນຕີ, ບັນດາທ່ານລັດຖະມົນຕີ ຈາກກະຊວງທີ່ກ່ຽວຂ້ອງ ພ້ອມດ້ວຍອໍານາດການປົກຄອງ, ພໍ່ແມ່ປະຊາຊົນເຂົ້າຮ່ວມ.
ສຳລັບຂົວຂ້າມ ຈໍານວນ 7 ແຫ່ງ ຕາມເສັ້ນທາງເລກທີ 6A ເປັນຂົວເບຕົງເສີມເຫຼັກ ມີຄວາມຍາວທັງໝົດ 337 ແມັດ, ໜ້າຂົວລົດແລ່ນ ກວ້າງ 7 ແມັດ, ໃນນີ້ ມີຂົວນໍ້າລ້ວງ, ຫ້ວຍກະສາຍ, ຫ້ວຍຮວງ, ຫ້ວຍມອບ, ຫ້ວຍດິກ, ຫ້ວຍຢອງ ແລະ ຂົວນໍ້າມ້າ, ມີມູນຄ່າການກໍ່ສ້າງທັງໝົດ 5,77 ລ້ານໂດລາສະຫະລັດ ໂດຍແມ່ນທຶນການຊ່ວຍລ້າ ຈາກທະນາຄານໂລກ 70% ແລະ ທຶນສົມທົບ ຂອງລັດຖະບານ 30%; ໂຄງການດັ່ງກ່າວ ແມ່ນເລີ່ມລົງມືກໍ່ສ້າງແຕ່ວັນທີ 14 ມີນາ 2013 ມາຮອດປະຈຸບັນ ແມ່ນສໍາເລັດການກໍ່ສ້າງຕາມແຜນການ ແລະ ໄດ້ເປີດນໍາໃຊ້ຢ່າງເປັນທາງການ, ບັນດາຂົວດັ່ງກ່າວ ແມ່ນເຊື່ອມຕໍ່ລະຫວ່າງ ໝູ່ບ້ານ ຫາ ໝູ່ບ້ານ ພາຍໃນເມືອງສົບເບົາ ແລະ ເມືອງແອດ ເຮັດໃຫ້ການຄົມມະນາຄົມໄປ-ມາ ຂອງພໍ່ແມ່ປະຊາຊົນ ມີຄວາມສະດວກສະບາຍ ໂດຍສະເພາະແມ່ນ ການຂົນສົ່ງສິນຄ້າ ລະຫວ່າງ ຕົວເມືອງນ້ອຍ ແລະ ຕົວເມືອງໃຫຍ່.
ສໍາລັບໂຄງການກໍ່ສ້າງນໍ້າປະປາ ເມືອງແອດ ແລະ ເມືອງຊຽງຄໍ້ ກໍ່ໄດ້ສໍາເລັດການກໍ່ສ້າງເຊັ່ນດຽວກັນ ພາຍໃຕ້ໂຄງການນໍ້າປະປາ ແລະ ສຸຂາພິບານ ຕົວເມືອງນ້ອຍ, ເຊິ່ງມີມູນຄ່າການກໍ່ສ້າງທັງໝົດ 2,05 ລ້ານໂດລາສະຫະລັດ ໂດຍແມ່ນທຶນສະໜັບສະໜູນ ຈາກທະນາຄານພັດທະນາອາຊີ 90% ແລະ ທຶນສົມທົບຂອງລັດຖະບານ 10% ໂຄງການດັ່ງກ່າວນີ້ ສາມາດສະໜອງນໍ້າສະອາດ ໃຫ້ແກ່ປະຊາຊົນພາຍໃນ ເມືອງແອດ ແລະ ເມືອງຊຽງຄໍ້ ໄດ້ຢ່າງພຽງພໍ; ຜົນສໍາເລັດ ຂອງໂຄງການກໍ່ສ້າງຂົວ 7 ແຫ່ງ ແລະ ໂຄງການນໍ້າປະປາ ຢູ່ເມືອງແອດ ແລະ ເມືອງຊຽງຄໍ້ ແມ່ນໝາກຜົນຄວາມສໍາເລັດ ຂອງອໍານາດການປົກຄອງແຂວງຫົວພັນ ກໍ່ຄື ແຜນງານຂອງລັດຖະບານ ປະກອບສ່ວນ ເຂົ້າໃນການພັດທະນາ ເສດຖະກິດ-ສັງຄົມ, ແກ້ໄຂຄວາມທຸກຍາກຂອງປະຊາຊົນ ຢູ່ໃນເຂດຊົນນະບົດ ໂດຍສະ ເພາະແມ່ນ ບັນດາໝູ່ບ້ານທີ່ຢູ່ອ້ອມຂ້າງຂອງ 02 ເມືອງດັ່ງກ່າວ ເຮັດໃຫ້ປະຊາຊົນ ໄດ້ນໍາໃຊ້ນໍ້າສະອາດ, ມີເສັ້ນທາງເຊື່ອມຕໍ່ໝູ່ບ້ານ ເຮັດໃຫ້ການໄປ-ມາ ມີຄວາມສະດວກສະປອດໄພ ພ້ອມທັງ ເປັນການສົ່ງ ເສີມ ວຽກງານການຄ້າ-ການທ່ອງທ່ຽວ ແລະ ການລົງທຶນ ໃນ 02 ເມືອງດັ່ງກ່າວ ມີຈໍານວນເພີ່ມຂຶ້ນ.
ໂອກາດດຽວກັນນີ້, ທ່ານນາຍົກລັດຖະມົນຕີ ໄດ້ໃຫ້ກຽດຕັດແຖບຜ້າ ເປີດການນໍາໃຊ້ຂົວທັງ 7 ແຫ່ງ ແລະ ໂຄງການນໍ້າປະປາ ເມືອງແອດ-ເມືອງຊຽງຄໍ້ ຢ່າງເປັນທາງການ ໂດຍມີທັງບັນດາພະນັກ ງານ, ວິຊາການ ຈາກຂະແໜງການທີ່ກ່ຽວຂ້ອງ ພ້ອມດ້ວຍ ພໍ່ແມ່ປະຊາຊົນ ເຂົ້າຮ່ວມ.
ໃນໂອກາດທີ່ເດີນທາງມາເຄື່ອນໄຫວຢ້ຽມຢາມ ບັນດາເມືອງຕ່າງໆຂອງແຂວງຫົວພັນ ໃນຄັ້ງນີ້, ທ່ານນາຍົກລັດຖະມົນຕີ ກໍ່ໄດ້ມອບທຶນສົມທົບ ໃຫ້ແກ່ເມືອງແອດ, ເມືອງຊຽງຄໍ້ ແລະ ເມືອງສົບເບົາ ເມືອງລະ 170 ລ້ານກີບ ເພື່ອນໍາໃຊ້ເຂົ້າໃນການພັດທະນາ ພາຍໃນຕົວເມືອງ, ເຊິ່ງເງິນທຶນດັ່ງກ່າວ ແມ່ນໄດ້ມາຈາກການປະກອບສ່ວນ ຂອງກະຊວງພະລັງງານ ແລະ ບໍ່ແຮ່; ກະຊວງແຮງງານ ແລະ ສະຫວັດດີການສັງຄົມ ແລະ ກະຊວງໂຍທາທິການ ແລະ ຂົນສົ່ງ. ພ້ອມດຽວກັນນັ້ນ, ຍັງໄດ້ມອບເຄື່ອງຄອມພິວເຕີ ຈໍານວນ 03 ເຄື່ອງ, ມູນຄ່າທັງໝົດ 8.500.000 ກີບ ໃຫ້ໂຮງແກ່ ໂຮງຮຽນມັດທະຍົມ ສຶກສາສົມບູນ ສົບຮາວ, ເມືອງສົບເບົາ ເພື່ອປະກອບສ່ວນ ເຂົ້າໃນການຮຽນ-ການສອນ.
ແຫລ່ງຂ່າວ: ຫ້ອງວ່າການສໍານັກງານນາຍົກລັດຖະມົນຕີ, ກົມປະຊາສຳພັນ.