ໃນວັນທີ 22 ທັນວາ 2016ຜ່ານມາ ທີ່ເຂດອານຸສອນສະຖານ ໄກສອນ ພົມວິຫານ ເມືອງວຽງໄຊ ແຂວງຫົວພັນ ທ່ານ ທອງລຸນ ສີສຸລິດ ນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ບັນດາທູດ ແລະ ທູຕານຸລາວ ທີ່ປະຈຳການຢູ່ຕ່າງປະເທດ ມີທ່ານ ວັນໄຊ ແພງຊຸມມາ ເຈົ້າແຂວງຫົວພັນ ລັດຖະມົນຕີ ຫົວໜ້າຫ້ອງວ່າການສຳນັກງານນາຍົກ ອຳນາດການປົກຄອງ ແລະ ປະຊາຊົນເມືອງວຽງໄຊ ເຂົ້າຮ່ວມ.
ໃນໂອກາດນີ້ ທ່ານນາຍົກລັດຖະມົນຕີ ໄດ້ຍົກໃຫ້ເຫັນເຖິງປະຫວັດຄວາມເປັນມາ ຂອງການປະຕິວັດລາວ ໂດຍສະເພາະແມ່ນມູນເຊື້ອຕໍ່ສູ້ອັນພິລະອາດຫານ ຂອງບັນດາຜູ້ນຳຂອງການປະຕິວັດລາວ ໃນສະໄໝຕໍ່ສູ້ກູ້ຊາດຕ້ານພວກລ່າເມືອງຂຶ້ນແບບເກົ່າ ແລະ ແບບໃໝ່ ວິລະກຳອັນລ້ຳເລີດ ໃນພາລະກິດຂອງການປະຕິວັດຂອງປະຊາຊົນລາວ ເຊິ່ງໄດ້ສ້າງໃຫ້ມີຜູ້ນຳທີ່ມີຄວາມປີຊາສາມາດ ວິລະຊົນຜູ້ເກັ່ງກ້າຫຼາຍທ່ານ ໃນນັ້ນມີປະທານ ໄກສອນ ພົມວິຫານ ທີ່ເຄົາລົບຮັກຂອງປະຊາຊົນບັນດາເຜົ່າ ວິລະບູລຸດຂອງຊາດລາວ ໃນໄລຍະເຄື່ອນໄຫວປະຕິວັດ ທີ່ເຕັມໄປດ້ວຍຄວາມທຸກຍາກລຳບາກ ແລະ ການເສຍສະຫຼະ ປະທານ ໄກສອນ ພົມວິຫານ ໄດ້ພ້ອມກັນກັບໝູ່ຄະນະ ການນຳປະຕິວັດໄດ້ຜ່ານຜ່າພາຍຸລົມແດງ ດ້ວຍຈິດໃຈປະຕິວັດອັນແນ່ວແນ່ ແລະ ອຸດົມການອັນເດັດດ່ຽວ ສາມາດຍາດໄດ້ໄຊຊະນະອັນສຳຄັນ ເປັນແຕ່ລະກ້າວຢ່າງຕໍ່ເນື່ອງ ເຮັດໃຫ້ການປະຕິວັດຊາດປະຊາທິປະໄຕ ສິ້ນສຸດລົງດ້ວຍໄຊຊະນະອັນເປັນປະຫວັດການ ທີ່ດັງກ້ອງກັງວານໄປທົ່ວໂລກ ປະເທດຊາດອັນແສນຮັກຂອງພວກເຮົາ ໄດ້ມີເອກະລາດ ປະຊາຊົນມີສິດເປັນເຈົ້າຂອງປະເທດຊາດຂອງຕົນຢ່າງແທ້ຈິງ ໃນໄລຍະໃໝ່ຂອງການປະຕິວັດ ປະທານ ໄກສອນ ພົມວິຫານ ໄດ້ສືບຕໍ່ອຸທິດຕົນຢ່າງບໍ່ຮູ້ອິດບໍ່ຮູ້ເມື່ອຍ ນຳພາທົ່ວພັກ ທົ່ວກຳລັງປະກອບອາວຸດ ແລະ ທົ່ວປວງຊົນ ຍາດໄດ້ໄຊຊະນະ ແລະ ຜົນສຳເລັດອັນສຳຄັນຫຼາຍປະການ ໃນພາລະກິດປົກປັກຮັກສາລະບອບໃໝ່ ແລະ ສ້າງສາພັດທະນາປະເທດຊາດ ປະທານ ໄກສອນ ພົມວິຫານ ໄດ້ເປັນຜູ້ນຳພາລິເລີ່ມການປ່ຽນແປງໃໝ່ ເຊິ່ງໄດ້ກາຍເປັນພາລະກິດປ່ຽນແປງໃໝ່ຂອງພັກ ຂອງປະຊາຊົນເຮົາມາຮອດທຸກມື້ນີ້ ເຮັດໃຫ້ປະເທດຊາດໄດ້ຮັບການພັດທະນາດ້ວຍບາດກ້າວທີ່ດີ ແລະ ມີລັກສະນະຕໍ່ເນື່ອງກ້າວໄປສູ່ຈຸດໝາຍສັງຄົມນິຍົມ.
ຂ່າວ: ໜັງສືພິມ ວຽງຈັນໃໝ່