ໃນວັນທີ 22 ທັນວາ 2016 ທີ່ສະຖານທູດລັດເຊຍ ປະຈໍາ ສປປ ລາວ, ທ່ານ ແສງເພັດ ຮຸ່ງບຸນຍວງ ຮອງລັດຖະມົນຕີ ກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະ ໄດ້ຮ່ວມເຊັນປຶ້ມໄວ້ອາໄລ ຕໍ່ເຫດການຄາດຕະກຳ ທ່ານ ອັນເດຣ ກາລົບ ເອກອັກຄະລັດຖະທູດ ລັດເຊຍ ປະຈຳ ຕວກກີ ໃນວັນທີ 19 ທັນວາ 2016 ໂດຍມີເນື້ອໃນດັ່ງລຸ່ມນີ້:
ໃນນາມລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ປະຊາຊົນລາວ ຂໍສະແດງຄວາມເສົ້າສະຫລົດໃຈຢ່າງສຸດຊຶ້ງ ມາຍັງລັດຖະບານ ແລະ ປະຊາຊົນ ລັດເຊຍ ຕໍ່ການຄາດຕະກຳ ທ່ານ ອັນເດຣ ກາລົບ (Andrei Karlov), ເອກອັກຄະລັດຖະທູດ ແຫ່ງ ສະຫະພັນ ຣັດເຊຍ ປະຈຳ ຕວກກີ ໃນຂະນະກ່າວປາໃສ ໃນງານວາງສະແດງຮູບພາບ ຢູ່ນະຄອນຫລວງ ອັງກາລາ, ປະເທດ ຕວກກີ ໃນວັນທີ 19 ທັນວາ 2016.
ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກ່າວປະນາມຢ່າງຮຸນແຮງ ຕໍ່ການກະທຳກໍ່ການຮ້າຍກັບນັກການທູດ ຂອງ ສະຫະພັນ ຣັດເຊຍ ດັ່ງກ່າວ, ອັນເປັນການແນໃສ່ທຳລາຍບັນຍາກາດ ສາຍພົວພັນອັນດີ ລະຫວ່າງ ຣັດເຊຍ ແລະ ຕວກກີ.
ການລ່ວງລັບໄປຂອງທ່ານ ອັນເດຣ ກາລົບ ຖືວ່າເປັນການສູນເສຍອັນໃຫຍ່ຫລວງ ສຳລັບປະຊາ ຊົນລັດເຊຍ ກໍຄື ເປັນການສູນເສຍນັກການທູດທີ່ດີ ຂອງລັດເຊຍ. ໃນນາມລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຂໍສະແດງຄວາມໄວ້ອາໄລ ອາວອນເຖິງດວງວິນຍານຂອງທ່ານ ອັນເດຣ ກາລົບ ຈົ່ງໄປສູ່ສຸຂະຕິເທີ້ນ.
ຂ່າວຈາກ: ສຳນັກຂ່າວສານປະເທດລາວ
ຕິດຕາມຂ່າວເສດຖະກິດລາວ ກົດໄລຄ໌ເລີຍ!