ການຈັດຕັ້ງປະຕິບັດງົບປະມານ 3 ເດືອນຂ້າມຜ່ານ ທ້າຍປີ 2016 ມາຮອດປັດຈຸບັນ ກໍເກືອບຈະສຳເລັດແລ້ວ ເຊິ່ງຈະໄດ້ສູ້ຊົນປະຕິບັດ ໃຫ້ໄດ້ຕາມແຜນ ທີ່ສະພາແຫ່ງຊາດຮັບຮອງ ເຖິງວ່າຫລາຍທ້ອງຖິ່ນ ຈະພົບຄວາມຫຍຸ້ງຍາກ ໃນການປະຕິບັດເກັບລາຍຮັບ ແລະ ອາດຈະບໍ່ໄດ້ຕາມແຜນກໍຕາມ, ແຕ່ໂດຍລວມ ທົ່ວປະເທດຄາດວ່າ ລາຍຮັບທັງໝົດ ຈະໄດ້ຕາມແຜນການ 3 ເດືອນ, ສ່ວນການປະຕິບັດລາຍຈ່າຍງົບປະມານ ຄາດຄະເນວ່າ ຈະປະຕິບັດຕາມແຜນທີ່ສະພາແຫ່ງຊາດຮັບຮອງ ຮັບປະກັນການເບີກຈ່າຍເງິນເດືອນ ແລະ ເງິນອຸດໜູນຂອງພະນັກງານ-ລັດຖະກອນໃຫ້ສຳເລັດ.
ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ກ່າວໃນກອງປະຊຸມ ແນະນຳ ການຈັດຕັ້ງປະຕິບັດແຜນງົບປະມານ ແຫ່ງລັດ ປະຈຳປີ 2017 ວ່າ: ສຳລັບຂົງເຂດການເງິນພາກລັດ, ການຈັດຕັ້ງປະຕິບັດແຜນງົບປະມານ ແຫ່ງລັດ ສົກປີ 2015-2016 ເຖິງວ່າຈະມີສິ່ງທ້າທາຍ ໃນຫລາຍດ້ານ ແຕ່ກໍສາມາດບຸກບືນ ແລະ ປະຕິບັດໄດ້ດີສົມຄວນ, ເຊິ່ງໃນ 12 ເດືອນຜ່ານມາ ສາມາດປະຕິບັດ ລາຍຮັບງົບປະມານໄດ້ 95,17% ຂອງແຜນການປີ, ສະເພາະລາຍຮັບພາຍໃນໄດ້ 94,56% ຂອງແຜນການປີ ແລະ ດ້ານລາຍຈ່າຍປະຕິບັດໄດ້ 96,82% ຂອງແຜນການປີ. ເນື່ອງຈາລາຍຮັບ ແມ່ນແຜນທ້າທາຍສູງ ສົມທົບກັບສະພາບເງື່ອນໄຂ ພາຍນອກ ແລະ ພາຍໃນ ບໍ່ເອື້ອອຳນວຍ ເປັນຕົ້ນແມ່ນ ການຜັນແປຢ່າງສັບສົນ ໃນຕະຫລາດໂລກ, ລາຄາແຮ່ທາດຫລຸດລົງຫລາຍສົມຄວນ, ເຊິ່ງກະທົບຕໍ່ການຜະລິດ ແລະ ການສົ່ງອອກແຮ່ທາດ ລວມທັງລາຍຮັບ ຈາກໂຄງການຂຸດຄົ້ນແຮ່ທາດຕ່າງໆ; ລາຄານ້ຳມັນດິບຫລຸດລົງຕໍ່າ ກ່ວາເວລາສ້າງແຜນງົບປະມານເບື້ອງຕົ້ນ. ນອກຈາກນັ້ນ, ລາຄາສິນຄ້າກະສິກຳ ເຊັ່ນ: ການເຟ, ຢາງພາລາ ກໍຍັງບໍ່ທັນຟື້ນຕົວ ເຮັດໃຫ້ລາຍຮັບບໍ່ໄດ້ຕາມແຜນການ ສົ່ງຜົນເຮັດໃຫ້ການຈັດຕັ້ງປະຕິບັດ ລາຍຈ່າຍງົບປະມານ ພົບຄວາມຫຍຸ້ງຍາກ ແຕ່ເຖິງຢ່າງໃດກໍຕາມ ກະຊວງການເງິນ ກໍໄດ້ພະຍາຍາມຊອກຫາມາດຕະການ ແກ້ໄຂ ແລະ ປະຕິບັດການເບີກຈ່າຍ ໄປຕາມແຜນງົບປະມານ ແນ່ໃສ່ເຮັດໃຫ້ສາມາດຮັບປະກັນ ການເຄື່ອນໄຫວວຽກງານກົງຈັກ ພັກ-ລັດ ເປັນປົກກະຕິ.
ພ້ອມດຽວກັນ, ທ່ານ ສົມດີ ດວງດີ ຍັງໄດ້ກ່າວຕື່ມວ່າ: ຄ່ຽງຄູ່ກັບຜົນສຳເລັດດັ່ງກ່າວ ເຫັນວ່າຍັງມີຫລາຍດ້ານຕ້ອງໄດ້ປັບປຸງແກ້ໄຂ ເພື່ອເຮັດໃຫ້ວຽກງານການເງິນ-ງົບປະມານ ເຄື່ອນໄຫວໄດ້ຢ່າງຄອງຕົວ, ມີປະສິດທິຜົນ, ຕອບສະໜອງໄດ້ຄວາມຮຽກຮ້ອງຕ້ອງການ ຂອງການພັດທະນາໃນໄລຍະໃໝ່.
ແຫຼ່ງຂ່າວ: ສຳນັກຂ່າວສານປະເທດລາວ