ຂປລ. ໃນແຜນພັດທະນາ ເສດຖະກິດ–ສັງຄົມ ສົກປີ 2017 ນີ້ ລັດຖະບານໄດ້ເລັ່ງໃສ່ 13 ແຜນວຽກເພື່ອບັນລຸແຜນບຸກທະລຸ ແລະ ຖືເອົາແຜນວຽກງານຈຸດສຸມ ຈໍານວນໜຶ່ງເປັນຕົວຕັ້ງ ໂດຍໄດ້ກໍານົດເອົາຄາດໝາຍສູ້ຊົນ ທີ່ບັນດາຂະແໜງການ ແລະ ທ້ອງຖິ່ນໄດ້ນໍາໄປຈັດຕັ້ງປະຕິບັດ ເພື່ອເຮັດໃຫ້ວຽກງານດັ່ງກ່າວ ໄດ້ບັນລຸຕາມຄາດໝາຍທີ່ວາງໄວ້.
ທ່ານ ສຸພັນ ແກ້ວມີໄຊ ລັດຖະມົນຕີ ກະຊວງແຜນການ ແລະ ການລົງທືນ ໄດ້ກ່າວໃນກອງປະຊຸມ ແນະນໍາການຈັດຕັ້ງປະຕິບັດ ແຜນພັດທະນາເສດຖະກິດ–ສັງຄົມແຫ່ງຊາດ ປະຈໍາປີ 2017 ໃນວັນທີ 19 ທັນວານີ້ວ່າ: ເພື່ອຄວາມເປັນເອກະພາບ ໃນການຈັດຕັ້ງປະຕິບັດ ແຜນພັດທະນາເສດຖະກິດ–ສັງຄົມປະຈໍາປີ 2017 ໃຫ້ບັນລຸຕາມເປົ້າໝາຍທີ່ວາງໄວ້ນັ້ນ ສໍາຄັນຕ້ອງຮັບປະກັນສະຖຽນລະພາບ ທາງດ້ານການເມຶອງ, ຄວາມສະຫງົບ ແລະ ຄວາມເປັນລະບຽບຮຽບຮ້ອຍ ໃນສັງຄົມຢ່າງໜັກແໜ້ນ ເພື່ອສ້າງເງື່ອນໄຂໃຫ້ແກ່ການ ພັດທະນາປະເທດຊາດ, ຄຸ້ມຄອງເສດຖະກິດມະຫາພາກ ໃຫ້ມີສະຖຽນລະພາບ ແລະ ໝັ້ນທ່ຽງດ້ວຍການສົ່ງເສີມການ ລົງທຶນທົ່ວສັງຄົມ, ການດໍາເນີນທຸລະກິດ ແລະ ການກະຕຸ້ນຮາກຖານເສດຖະກິດ ໃຫ້ມີສະພາບຄ່ອງ ເພື່ອຮັບປະກັນໃຫ້ຂະແໜງກະສິກໍາ, ອຸດສາຫະກໍາ ແລະ ການບໍລິການຂະຫຍາຍຕົວຢ່າງຕໍ່ເນື່ອງ ແລະ ເຮັດໃຫ້ເສດຖະກິດເຕີບໂຕຢູ່ໃນລະດັບ 7%, ຊຸກຍູ້ສົ່ງເສີມການຜະລິດເປັນສິນຄ້າ ແລະ ການບໍລິການຕາມທ່າແຮງ ຂອງຂະແໜງການ ແລະ ທ້ອງຖິ່ນ ເພື່ອໃຫ້ມີຄວາມຫລາກຫລາຍ ແລະ ມີຄຸນນະພາບ ເປັນທີ່ຕ້ອງການຂອງຕະຫລາດໃນລະດັບສູງ, ລາຄາດີ ໂດຍສະເພາະແມ່ນຜະລິດເຂົ້າໃຫ້ໄດ້ 4,35 ລ້ານໂຕນ, ສົ່ງເສີມການຜະລິດ ຂອງບັນດາຫົວໜ່ວຍທຸລະກິດຂະໜາດນ້ອຍ ແລະ ຂະໜາດກາງຢ່າງແຂງແຮງ ແລະ ປັບປຸງລັດວິສາຫະກິດ ໃຫ້ສາມາດເຄື່ອນໄຫວຢ່າງມີປະສິດທິຜົນ ແນໃສ່ສ້າງມູນຄ່າເພີ່ມ ແລະຄຸນນະພາບຂອງສິນຄ້າ ແລະ ການບໍລິການໃຫ້ສາມາດແຂ່ງຂັນ ໃນຕະຫລາດພາກພື້ນ ແລະ ສາກົນ. ພ້ອມທັງສົ່ງເສີມໂຄງການເອກະຊົນ ທີ່ໄດ້ຮັບອະນຸມັດໄປແລ້ວ ໂດຍສະເພາະໂຄງການລົງ ທຶນຂະໜາດໃຫຍ່ ໃນຂົງເຂດພະລັງງານ, ບໍ່ແຮ່, ອຸດສາຫະກໍາ ແລະ ກະສິກໍາທີ່ມີຜົນກະທົບສູງ ຕໍ່ເສດຖະກິດໃຫ້ສາມາດເຄື່ອນໄຫວ ເປັນປົກກະຕິ, ຮັບປະກັນແກ້ໄຂຜົນກະທົບຕໍ່ສັງຄົມ ແລະ ສິ່ງແວດລ້ອມ ແລະ ຊຸກຍູ້ປະຕິບັດສັນຍາ ໃຫ້ເຂົ້າສູ່ຂະບວນການຜະລິດໂດຍໄວ, ຊຸກຍູ້ບັນດາຂະແໜງການ ແລະ ທ້ອງຖິ່ນເປັນເຈົ້າການ ໃນການຄົ້ນຄ້ວານໍາໃຊ້ທ່າແຮງຂອງຕົນ ເພື່ອສ້າງເປັນໂຄງການລະອຽດ, ເປັນລະບົບຄົບຊຸດ ພ້ອມທັງເຕັກນິກການຜະລິດ, ການປູງແຕ່ງ, ການຕະຫລາດ ແລະ ການບໍລິຫານຈັດການ ຊັບພະຍາກອນ ຫລື ທ່າແຮງນັ້ນໃຫ້ຄຸ້ມຄ່າ ແລະ ນໍາໃຊ້ຢ່າງຍາວນານ ແນໃສ່ສືບຕໍ່ແກ້ໄຂຄວາມທຸກຍາກ ຕິດພັນກັບການຈັດຕັ້ງປະຕິບັດ ວຽກງານສາມສ້າງໃຫ້ມີປະສິດທິຜົນ ເພື່ອຍົກລະດັບຊີວິດການເປັນຢູ່ ຂອງປະຊາຊົນໃຫ້ດີຂຶ້ນເປັນກ້າວໆ ໂດຍສຸມໃສ່ພັດທະນາ ແລະ ສ້າງ 20 ຈຸດສຸມຂອງລັດຖະບານ ແລະ 71 ຈຸດສຸມຂອງທ້ອງຖີ່ນ ທີ່ນອນໃນ 70 ເມືອງຂອງ18 ແຂວງ, ໄປຄຽງຄູ່ກັບການການພັດທະນາຊັບພະຍາກອນ ໃຫ້ມີຄຸນນະພາບ, ປັບປຸງຄຸນນະພາບຂອງການສຶກສາ, ສາທາລະນະສຸກ, ຍົກລະດັບສີມືແຮງງານລາວ ເພື່ອຕອບສະໜອງຄວາມຕ້ອງການ ຂອງຕະຫລາດແຮງງານ ແລະ ຍົກສະມັດຕະພາບຂອງການຜະລິດ ແລະ ການບໍລິການໃຫ້ສູງຂຶ້ນ, ປັບປຸງນະໂຍບາຍ ແລະ ກົນໄກການຄຸ້ມຄອງການຂຸດຄົ້ນ ແລະ ນໍາໃຊ້ຊັບພະຍາກອນທໍາມະຊາດ ໃຫ້ມີປະສິດທິຜົນ, ເອົາໃຈໃສ່ ໃນການປະຕິບັດວິໄນແຜນການ ໃນນັ້ນແຜນຕ້ອງສືບຕໍ່ປັບປຸງກົນໄກ ແລະ ວິທີການຄຸ້ມຄອງການລົງທຶນຂອງລັດ ໃຫ້ມີປະສິດທິຜົນສູງ ໂດຍສະເພາະແມ່ນຕ້ອງຮັບປະກັນບໍ່ໃຫ້ມີໂຄງການນອກແຜນ ແລະ ໂຄງການລົງທືນກ່ອນຂອງເອກະຊົນ, ສືບຕໍ່ຄົ້ນຄ້ວາມາດຕະການຄຸ້ມຄອງ, ບໍລິຫານ ແລະ ຊອກວິທີການແກ້ໄຂໜີ້ສີນ ການລົງທຶນຂອງລັດ, ເຮັດໃຫ້ມີສະພາບຄ່ອງ ໃນການລົງທຶນຂອງລັດ, ຊຸກຍູ້, ຕິດຕາມ ແລະ ມີວິທີການ, ມາດຕະການແກ້ໄຂຢ່າງເໝາະສົມ ແລະ ຖືກຕ້ອງຕາມລະບຽບກົດໝາຍ ຕໍ່ກັບບັນກດາໂຄງການລົງທຶນລັດ ທີ່ໄດ້ອະນຸມັດໃຫ້ສາມາດເຄື່ອນໄຫວ ຢ່າງມີປະສິດທິຜົນໂດຍການກວດກາ ຢ່າງລະອຽດ ແລະ ປະເມີນຜົນແຕ່ຫົວທີ ກ່ອນພິຈາລະນາເຂົ້າແຜນ ແລະ ພາຍຫລັງໂຄງການສໍາເລັດ, ພັດທະນາພື້ນຖານໂຄງລ່າງ ທີ່ຈໍາເປັນ ແລະ ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ການດຶງດູດການລົງທຶນ, ຫລຸດຕົ້ນທຶນ ໃນການດໍາເນີນທຸລະກິດ ໂດຍແກ້ໄຂຂັ້ນຕອນ ແລະ ນິຕິກໍາຕ່າງໆທີ່ບໍ່ສະດວກ, ກົດໜ່ວງທ່ວງດຶງ ແລະ ສ້າງຄວາມຫຍຸ້ງຍາກ ໃຫ້ແກ່ການດໍາເນີນທຸລະກິດ ໂດຍສະເພາະປັບປຸງການ ບໍລິຫານຜ່ານປະຕູດຽວ ເພື່ອໃຫ້ການພິຈາລະນາ ອະນຸມັດລົງທຶນມີຄວາມວ່ອງໄວ.
ທ່ານ ສຸພັນ ແກ້ວມີໄຊ ກ່າວຕື່ມວ່າ: ຈັດຕັ້ງຜັນຂະຫຍາຍກອງປະຊຸມໂຕະມົນ ປະຈໍາປີ 2016 ຖະແຫລງການວຽງຈັນ ວ່າດ້ວຍການເປັນຄູ່ຮ່ວມ ເພື່ອການຮ່ວມມືທີ່ມີປະສິດທິຜົນ ພ້ອມທັງດຶງດູດ ແລະ ຍາດແຍ່ງທຶນຊ່ວຍເຫລືອທາງການ ເພື່ອພັດທະນາຢ່າງມີຈຸດສຸມ, ມີເປົ້າໝາຍຈະແຈ້ງ ແລະ ສອດຄ່ອງກັບເປົ້າໝາຍການພັດທະນາ ຂອງລັດຖະບານ, ສ້າງຖານຂໍ້ມູນ ແລະ ເກັບກໍາສະຖິຕິ ເພື່ອເປັນຂໍ້ມູນພື້ນຖານ ໃຫ້ແກ່ການຕິດຕາມພັດທະນາ ເສດຖະກິດ–ສັງຄົມ ແລະ ການຕິດຕາມຄວາມຄືບໜ້າ ໃນແຕ່ລະດ້ານຢ່າງເປັນລະບົບ, ມີຂໍ້ມູນຢ່າງຊັດເຈນ ແລະ ຢັ້ງຢືນໄດ້ຕາມຄວາມເປັນຈິງ, ສືບຕໍ່ປັບປຸງກົງຈັກການຈັດຕັ້ງ, ກົນໄກການບໍລິຫານລັດໃຫ້ຮັດກຸມ, ໂປ່ງໃສ, ວ່ອງໄວ, ມີປະສິດທິພາບ ແລະ ປະສິດທິຜົນ ໂດຍການສືບຕໍ່ຊັບຊ້ອນພາລະບົດບາດ ຂອງບາງຂະແໜງການ ທີ່ເຫັນໄດ້ວ່າຍັງມີການທັບຊ້ອນ ແລະ ແບ່ງຄວາມຮັບ ຜິດຊອບໃຫ້ຈະແຈ້ງ ອັນສໍາຄັນແມ່ນເນັ້ນໃສ່ ການບໍລິຫານລັດດ້ວຍກົດໝາຍໃຫ້ເຂັ້ມແຂງກວ່າເກົ່າ ແລະ ມີປະສິດທິຜົນສູງ.
ແຫລ່ງຂ່າວ:
ຕິດຕາມເຮົາທາງFacebook ກົດຖືກໃຈເລີຍ!