ອົງຄະນະພັກ ສສກ ຈະສຸມໃສ່ປະຕິຮູບລະບົບການສຶກສາ ສາຍສາມັນ ຈາກ 5+4+3 ເປັນ 6+3+3
ສະຫາຍ ຮສ.ປອ ທອງສະລິດ ມັງໜໍ່ເມກ ເລຂາທິການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ ກະຊວງສຶກສາທິການ ແລະ ກິລາ ໄດ້ໃຫ້ກຽດຜ່ານ (ຮ່າງ) ບົດລາຍງານການເມືອງຂອງຄະນະບໍລິຫານງານພັກກະຊວງສຶກສາທິການ ແລະ ກິລາ ສະໄໝທີ IX ຕໍ່ກອງປະຊຸມໃຫຍ່ຜູ້ແທນອົງຄະນະພັກ ກະຊວງສຶກສາທິການ ແລະ ກິລາ ຄັ້ງທີ X ກ່ຽວກັບທິດທາງລວມ, ຄາດໝາຍສູ້ຊົນ ແລະ ວຽກຈຸດສຸມຕົ້ນຕໍໃນການໍາພາຂອງອົງຄະນະພັກ ກະຊວງສຶກສາທິການ ແລະ ກິລາ ສະໄໝທີ X ໄລຍະ 5 ປີຕໍ່ໜ້າ (2026-2030) ໃຫ້ຮູ້ວ່າ: ສຳລັບທິດທາງລວມ, ຄາດໝາຍສູ້ຊົນ ແລະ ວຽກຈຸດສຸມຕົ້ນຕໍໃນການໍາພາຂອງອົງຄະນະພັກ ກະຊວງສຶກສາທິການ ແລະ ກິລາ ສະໄໝທີ X (2026-2030) ຄາດໝາຍສູ້ຊົນແຕ່ລະດ້ານ ຈະສືບຕໍ່ຢຶດໝັ້ນລັດທິມາກ-ເລນິນ, ແນວຄິດໄກສອນ ພົມວິຫານ, ຫັນແນວທາງປ່ຽນແປງໃໝ່ເຂົ້າສູ່ລວງເລິກໃນວຽກງານສຶກສາ, ວິທະຍາສາດ ແລະ ກິລາ, ກໍ່ສ້າງພັກໃຫ້ປອດໃສ, ເຂັ້ມແຂງ, ໜັກແໜ້ນ ທັງ 4 ດ້ານ, ປັບປຸງ ແລະ ຂະຫຍາຍການຈັດຕັ້ງຂອງພັກໃຫ້ສອດຄ່ອງກັບກົງຈັກບໍລິຫານລັດຂອງຂະແໜງການສຶກສາ, ວິທະຍາສາດ ແລະ ກິລາ ທັງພາກລັດ ແລະ ເອກະຊົນ, ຕັ້ງໜ້າຂະຫຍາຍພັກໃຫ້ຕິດພັນກັບຂະບວນການຕົວຈິງ, ເອົາໃຈໃສ່ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ໃຫ້ຮັບປະກັນທາງດ້ານປະລິມານ ແລະ ຄຸນນະພາບ; ສ້າງແຜນບໍາລຸງ ແລະ ກໍ່ສ້າງຄະນະພັກ, ຄະນະນໍາ, ຜູ້ບໍລິຫານການສຶກສາ, ວິທະຍາສາດ ແລະ ກິລາ, ພະນັກງານຄຸ້ມຄອງ-ນໍາພາ ແຕ່ລະຂັ້ນຂອງຂະແໜງການສຶກສາ, ວິທະຍາສາດ ແລະ ກິລາ ທາງດ້ານທິດສະດີການເມືອງຂັ້ນຕົ້ນ, ຂັ້ນກາງ ແລະ ຂັ້ນສູງທັງພາຍໃນ ແລະ ຕ່າງປະເທດ; ສືບຕໍ່ສ້າງນິຕິກໍາກ່ຽວກັບການສຶກສາ, ການຄົ້ນຄວ້າວິທະຍາດສາດ ແລະ ການກິລາ ຢ່າງເປັນລະບົບ ເປັນຕົ້ນແມ່ນຮ່າງມະຕິຂອງສູນກາງພັກ ຕໍ່ກັບການພັດທະນາຊັບພະຍາກອນມະນຸດ, ຍຸດທະສາດການສຶກສາ, ຍຸດທະສາດການຄົ້ນຄວ້າວິທະຍາສາດ ແລະ ການກິລາ ໃຫ້ໄດ້ຮັບຮອງ ແລະ ປະກາດໃຊ້ຢ່າງເປັນທາງການ.
ຄຽງຄູ່ກັນນັ້ນ, ກໍຈະສືບຕໍ່ປັບປຸງຄວາມຮູ້ທາງດ້ານວິຊາການ ແລະ ທັກສະດ້ານການສອນຂອງຄູຊັ້ນການສຶກສາກ່ອນໄວຮຽນ ແລະ ປະຖົມສຶກສາ ໂດຍສຸມໃສ່ການປະຕິຮູບລະບົບການສຶກສາ ສາຍສາມັນສຶກສາ ຈາກລະບົບ 5+4+3 ມາເປັນ 6+3+3 ແລະ ການໂຮມໂຮງຮຽນສາມັນສຶກສາ, ການຂະຫຍາຍການສຶກສາສາມັນວິຊາຊີບ, ການສຶກສານອກໂຮງຮຽນ ໃຫ້ມີປະສິດທິພາບ ແລະ ສອດຄ່ອງກັບຄວາມເປັນຈິງຂອງແຕ່ລະທ້ອງຖິ່ນທັງພາກລັດ ແລະ ເອກະຊົນ; ສືບຕໍ່ສະໜອງການສຶກສາຫຼັງຂັ້ນພື້ນຖານທີ່ມີຄຸນນະພາບ ໂດຍສະເພາະໃນຊັ້ນມັດທະຍົມສຶກສາຕອນປາຍ, ອາຊີວະສຶກສາ ແລະ ການສຶກສາຊັ້ນສູງ ເພື່ອປະກອບສ່ວນເຂົ້າໃນການສະໜັບສະໜູນບັນດາບຸລິມະສິດຂອງແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ 10; ສືບຕໍ່ສ້າງຄວາມເຂັ້ມແຂງໃຫ້ພະນັກງານ, ສະມາຊິກພັກ ແລະ ຄູ-ອາຈານ ທາງດ້ານທັກສະຄວາມຮູ້ຄວາມສາມາດ, ການນໍາໃຊ້ເຕັກໂນໂລຊີທີ່ທັນສະໄໝຂອງຂະແໜງການສຶກສາ, ວິທະຍາສາດ ແລະ ກິລາ ເພື່ອໃຫ້ສາມາດຕອບສະໜອງໄດ້ຕາມຄວາມຕ້ອງການຂອງໜ້າທີ່ ການເມືອງ; ສືບຕໍ່ສ້າງຄວາມເຂັ້ມແຂງໃຫ້ແກ່ຜູ້ບໍລິຫານການສຶກສາ, ວິທະຍາສາດ ແລະ ກິລາ ທຸກລະດັບໃນການຍົກສູງປະສິດທິພາບ, ປະສິດທິຜົນການຄຸ້ມຄອງ-ບໍລິການ, ວຽກງານວາງແຜນ, ວຽກງານຄຸ້ມຄອງພະນັກງານ ແລະ ອື່ນໆ ແລະ ຄວາມຮັບຜິດຊອບຂອງເຂົາເຈົ້າ, ປັບປຸງຫຼັກສູດການສຶກອົບຮົມໃຫ້ຜູ້ບໍລິຫານການສຶກສາ, ວິທະຍາສາດ ແລະ ກິລາ ທັງພາກລັດ ແລະ ເອກະຊົນ; ສືບຕໍ່ວຽກງານຄຸ້ມຄອງ, ຊຸກຍູ້ ແລະ ສົ່ງເສີມການຄົ້ນຄວ້າ, ນໍາໃຊ້ຜົນການຄົ້ນຄວ້າວິທະຍາສາດ, ເຕັກໂນໂລຊີ, ເຕັກນິກວິຊາການ, ນະວັດຕະກຳ ແລະ ພູມປັນຍາອັນຍອດຍິ່ງເຂົ້າໃນການພັດທະນາເສດຖະກິດ-ສັງຄົມ, ສົມທົບກັບພາກສ່ວນຕ່າງໆ ເຊັ່ນ: ຜູ້ປະກອບການ, ນັກທຸລະກິດ ແລະ ນັກວິທະຍາສາດລາວ ເພື່ອສ້າງຜະລິດຕະພັນ ແລະ ຊົມໃຊ້ຜະລິດຕະພັນລາວ; ສືບຕໍ່ຫຼຸດຜ່ອນຄວາມແຕກໂຕນກັນໃນການພັດທະນາວຽກງານການສຶກສາ, ວິທະຍາສາດ ແລະ ກິລາ ໃນທົ່ວປະເທດ ໂດຍສຸມໃສ່ບັນດາເມືອງ ແລະ ໂຮງຮຽນທີ່ຍັງດ້ອຍໂອກາດ ເປັນຕົ້ນຕໍ; ສືບຕໍ່ກໍ່ສ້າງ ແລະ ພັດທະນາບຸກຄະລາກອນການກິລາ-ກາຍະກຳໃຫ້ມີຄຸນນະພາບ ສາມາດແຂ່ງຂັນກັບພາກພື້ນ ແລະ ສາກົນໄດ້ເທື່ອລະກ້າວ; ເອົາໃຈໃສ່ປົກປັກຮັກສາ ແລະ ປັບປຸງພື້ນຖານໂຄງລ່າງ, ສະຖານທີ່ຝຶກແອບ ແລະ ອຸປະກອນຮັບໃຊ້ຕ່າງໆ ໃຫ້ສາມາດນໍາໃຊ້ໄດ້ຍາວນານ ແລະ ຄຸ້ມຄ່າ ແລະ ສົ່ງເສີມການອອກກຳລັງກາຍເພື່ອສຸຂະພາບໃນທົ່ວປວງຊົນ.
ແຫຼ່ງຂ່ວ: ໜັງສືພິມສຶກສາ ວິທະຍາສາດ ແລະ ກິລາ ອອນລາຍ