ໃນລະຫວ່າງວັນທີ 12-13 ທັນວາ 2016 ຜ່ານມາ ທ່ານບຸນປອນ ບຸດຕະນະວົງ ຮອງປະທານສະພາແຫ່ງຊາດພ້ອມດ້ວຍຄະນະ ຈາກສະພາແຫ່ງຊາດ, ກະຊວງພະລັງງານ ແລະບໍ່ແຮ່ ແລະກະຊວງຊັບພະຍາກອນທຳມະຊາດ ແລະສິ່ງແວດລ້ອມ ໄດ້ລົງຕິດຕາມກວດກາ ແລະເກັບກຳຂໍ້ມູນໂຄງການກໍ່ສ້າງເຂື່ອນໄຟຟ້ານໍ້າເທີນ 1, ນໍ້າງຽບ 1 ແລະໂຄງການພັດທະນາຈຳນວນໜຶ່ງຢູ່ແຂວງບໍລິຄຳໄຊ
ການເຄື່ອນໄຫວຄັ້ງນີ້ ທາງຄະນະກໍໄດ້ເຮັດວຽກກັບຄະນະຮັບຜິດຊອບ ໂຄງການເຂື່ອນໄຟຟ້ານໍ້າເທີນ 1 ແລະນໍ້າງຽບ 1 ເຊິ່ງໄດ້ຮັບຟັງການລາຍງານຫຍໍ້ຄວາມຄືບໜ້າການພັດທະນາໂຄງກນ, ການຍົກຍ້າຍຈັດສັນປະຊາຊົນທີ່ຖືກຜົນກະທົບ, ວຽກງານສັງຄົມ ແລະສິ່ງແວດລ້ອມຂອງໂຄງກນ ແລະຮັບຟັງຂໍ້ສະເໜີຈຳນວນໜຶ່ງຈາກຄະນະຮັບຜິດຊອບໂຄງການຂອງທັງສອງເຂື່ອນ
ທ່ານ ບຸນປອນ ລັດຕະນະວົງ ໄດ້ໂອ້ລົມຕໍ່ສອງໂຄງການ ເຊິ່ງທ່ານໄດ້ເປັນຫ່ວງຕໍ່ປະຊາຊົນທີ່ໄດ້ຮັບຜົນກະທົບ ເພື່ອຮັບປະກັນໃຫ້ຊີວິດການເປັນຢູ່ຂອງປະຊາຊົນດີຂຶ້ນ ຫຼັງຈາກທີ່ຍົກຍ້າຍໄປຢູ່ບ້ານຈັດສັນ ໂດຍສະເພາະການຜະລິດຂອງປະຊາຊົນໃຫ້ກຸ້ມຢູ່ກຸ້ມກິນ ແລະຫຼຸດພົ້ນອອກຈາກຄວາມທຸກຍາກເທື່ອລະກ້າວ, ທ່ານຍັງສະເໜີໃຫ້ທາງແຂວງ ແລະທາງກະຊວງກ່ຽວຂ້ອງສ້າງແຫຼ່ງທ່ອງທ່ຽວໃຫ້ປະຊາຊົນມີສ່ວນຮ່ວມ, ຕ້ອງມີການວາງແຜນລະອຽດ, ການປົກປັກຮັກສາ ແລະໃຫ້ໄປຕາມທິດຍືນຍົງ
ໃນໂອກາດໄດ້ໄປຢ້ຽມຢາມບ້ານທີ່ຖືກຜົນກະທົບ ແລະບ້ານຈັດສັນ, ຮອງປະທານສະພາແຫ່ງຊາດ ໄດ້ປຸກລະດົມໃຫ້ປະຊາຊົນມີຄວາມທຸ່ນທ່ຽງ ເຊື່ອໝັ້ນຕໍ່ການພັດທະນາເສດຖະກິດ-ສັງຄົມ ແລະເຂົ້າຮ່ວມໂຄງການພັດທະນາດັ່ງກ່າວ
ຂ່າວ: ເສດຖະກິດ-ສັງຄົມ