ກອງປະຊຸມ ລັດຖະບານ ປະຈຳສົກປີ 2015-2016 ໄດ້ດໍາເນີນມາເປັນເວລາ 2 ວັນ ຄືວັນທີ 13-14 ທັນວາ 2016 ຜ່ານມາ ດ້ວຍບັນຍາກາດແຫ່ງຄວາມຮັບຜິດຊອບສູງ ຂອງບັນດາສະມາຊິກ ລັດຖະບານ, ເຈົ້າຄອງນະຄອນຫຼວງ, ເຈົ້າແຂວງ ແລະບັນດາທ່ານຫົວໜ້າອົງການພັກ-ລັດ ທີ່ເຂົ້າຮ່ວມ
ກອງປະຊຸມ ໄດ້ຮັບຟັງການລາຍງານ ປະກອບຄຳຄິດ ຄຳເຫັນ ແລະຕົກລົງຫຼາຍບັນຫາທີ່ສຳຄັນ ໃນນັ້ນແມ່ນໃຫ້ເອົາໃຈໃສ່ ແກ້ໄຂບັນຫາການເບີກ-ຈ່າຍ ເງິນເດືອນພະນັກງານ ໃຫ້ສຳເລັດພາຍໃນປີ 201ຕ ນີ້ ໂດຍບໍ່ໃຫ້ມີການເບີກຈ່າຍຄ້າງອີກ, ຖ້າມີບັນຫາກໍໃຫ້ຮີບຮ້ອນສະເໜີຫາລັດຖະບານ ເພື່ອຫາວິທີການແກ້ໄຂ, ໃນນີ້ ປີ 2017 ຕ້ອງໃຫ້ການເບີກຈ່າຍເງິນເດືອນໄປຕາມລະບົບ, ວ່ອງໄວ ແລະທົ່ວເຖິງໃນທົ່ວປະເທດ
- ມອບໃຫ້ກະຊວງການເງິນ ສົມທົບກັບທະນາຄານ ແລະກະຊວງພາຍໃນ ປະສານງານໃກ້ຊິດ ເພື່ອແກ້ໄຂບັນຫານີ້
- ມອບໃຫ້ບັນດາແຂວງ ຊີ້ນຳຂັ້ນເທິງຢ່າງໃກ້ຊິດ, ລວມທັງເງິນອຸດໜູນຕ່າງໆ ເພາະໄດ້ມີການຕົກລົງໄວ້ແລ້ວ
- ໃຫ້ກະຊວງພາຍໃນ ສົມທົບກັບບັນດາກະຊວງ- ອົງການ ແລະອົງການທ້ອງຖິ່ນ ຮີບຮ້ອນ ກວດກາບັນຊີພະນັກງານ-ລັດຖະກອນໃຫ້ລະອຽດ ແລະຫັນການຄຸ້ມຄອງພະນັກງານ-ລັດຖະກອນ ໃຫ້ເຂົ້າສູ່ລະບົບທັນສະໄໝ ແລະວ່ອງໄວ
ແຫຼ່ງຂ່າວ: ເສດຖະກິດ-ການຄ້າ