ສຳນັກຂ່າວຕ່າງປະເທດ ລາຍງານໃນວັນທີ 13 ທັນວາຜ່ານມານີ້ວ່າ ທ່ານ ໂດນັນ ທຣັມ ວ່າທີ່ປະທານາທິບໍດີ ແຫ່ງ ສະຫະລັດອາເມຣິກາ ໄດ້ປະກາດຢ່າງເປັນທາງການວ່າ ທ່ານໄດ້ເລືອກເອົາ ທ່ານ ເຣັກ ທິນເລີສັນ (Rex Tillerson) ປະທານເຈົ້າໜ້າທີ່ບໍລິຫານ ຫລື ຊີອີໂອ ຂອງບໍລິສັດນ້ຳມັນລາຍໃຫຍ່ ເອັກຊອນ-ໂມບິວ ເພື່ອສະເໜີຊື່ແຕ່ງຕັ້ງ ເປັນລັດຖະມົນຕີການຕ່າງປະເທດ ພາຍໃນລັດຖະບານຂອງທ່ານເອງ ໂດຍທ່ານໄດ້ຍົກໃຫ້ເຫັນວ່າ ຜູ້ນຳໃນພາກທຸລະກິດທ່ານນີ້ ເປັນນັກເຈລະຈາເຮັດຂໍ້ຕົກລົງລະຫວ່າງປະເທດ ທີ່ປະສົບຜົນສຳເລັດ ແລະ ມີປະສົບການ ໃນການເຮັດວຽກໃນຂອບເຂດທົ່ວໂລກ.
ແນວໃດກໍຕາມ, ທ່ານ ທິນເລີສັນ ຊຶ່ງຖືໄດ້ວ່າເປັນບຸກຄົນທີ່ມີຄວາມສະໜິດສະໜົມກັບ ທ່ານ ວະລາດີເມຍ ປູຕິນ ປະທານາທິບໍດີ ແຫ່ງ ສະຫະພັນຣັດເຊຍ ອັນໄດ້ເຮັດໃຫ້ການນຳສະເໜີຊື່ເພື່ອແຕ່ງຕັ້ງຄັ້ງນີ້ ຂອງທ່ານ ໂດນັນ ທຣັມ ໄດ້ຮັບການວິພາກວິຈານຢ່າງຮຸນແຮງ ໃນຂະນະທີ່ທ່ານເອງ ກໍໄດ້ຮັບການວິຈານວ່າ ມີຄວາມໃກ້ຊິດກັບ ປູຕິນ ແລະ ໄດ້ຮັບການຊ່ວຍເຫລືອຈາກ ປູຕິນ ໃນການເອົາຊະນະໃນບັ້ນເລືອກຕັ້ງ ຜູ້ນຳສະຫະລັດອາເມຣິກາຄັ້ງນີິ້.
ຕິດຕາມເຮົາທາງFacebook ກົດຖືກໃຈເລີຍ!