ສຳນັກຂ່າວຕ່າງປະເທດ ລາຍງານໃນວັນທີ 26 ພະຈິກນີ້ວ່າ ທ່ານ ຟີແດນ ກາສໂຕຣ ອະດີດປະທານປະເທດກູບາ ແລະ ຜູ້ນຳແຫ່ງການປະຕິວັດສັງຄົມນິຍົມກູບາ ໄດ້ເຖິງແກ່ມໍລະນະກຳແລ້ວ ທີ່ນະຄອນຫລວງລາຮາວານ ລວມອາຍຸໄດ້ 90 ປີ ໂດຍທ່ານ ຣາອູນ ກາສໂຕຣ ປະທານປະເທດກູບາຄົນປັດຈຸບັນ ໄດ້ອອກມາປະກາດການເສຍຊີວິດດັ່ງກ່າວຢ່າງເປັນທາງການ ຜ່ານສະຖານີໂທລະພາບແຫ່ງຊາດກູບາ ໃນຕອນຄ່ຳຂອງວັນສຸກທີ 25 ພະຈິກ ຕາມເວລາໃນທ້ອງຖິ່ນ.
ທ່ານ ຟີແດນ ກາສໂຕຣ ເປັນຜູ້ນຳພາຊາວກູບາ ລຸກຮືຂຶ້ນເຮັດການປະຕິວັດ ສະຖາປະນາສາທາລະນະລັດກູບາ ໃນປີ 1959 ຊຶ່ງຕະຫລອດໄລຍະ 49 ປີ ຫລັງຈາກນັ້ນ ທ່ານໄດ້ນຳພາປະເທດຊາດກູບາ ດຳເນີນພາລະກິດກໍ່ສ້າງສັງຄົມນິຍົມ ຢ່າງມີຜົນສຳເລັດເປັນແຕ່ລະໄລຍະ ເຮັດໃຫ້ກຽດ ແລະ ຊື່ສຽງຂອງທ່ານ ໄດ້ຖືກຍົກຍ້ອງຈາກບັນດາປະເທດສັງຄົມນິຍົມ ແລະ ຂະບວນການປະຕິວັດໃນທົ່ວໂລກ ໃນຖານະນາມເປັນວີລະບູລຸດແຫ່ງຊົນຊັ້ນກຳມະກອນ.
ຕິດຕາມເຮົາທາງFacebook ກົດຖືກໃຈເລີຍ!