ໃນວັນທີ 23 ພະຈິກ 2016 ຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍພັນລະຍາ ໄດ້ສໍາເລັດການນໍາພາ ຄະນະຜູ້ແທນລາວເຂົ້າຮ່ວມກອງປະຊຸມສຸດຍອດເຂດສາມຫຼ່ຽມພັດທະນາກໍາປູເຈຍ-ລາວ-ຫວຽດນາມ (CLV DTA) ຄັ້ງທີ 9 ທີ່ສຽມລຽບ, ຣາຊະອານາຈັກ ກຳປູເຈຍຢ່າງຈົບງາມ.
ກອງປະຊຸມສຸດຍອດຄັ້ງນີ້ ໄດ້ດໍາເນີນໄປພາຍໃຕ້ການເປັນປະທານຂອງສົມເດັດອັກຄະມະຫາເສນາບໍດີ ເຕໂຊ ຮຸນ ເຊັນ ນາຍົກລັດຖະມົນຕີແຫ່ງຣາຊະອານາຈັກກຳປູເຈຍ, ຊຶ່ງມີທ່ານ ຫວງຽນ ຊວນ ຟຸກ ນາຍົກລັດຖະມົນຕີແຫ່ງ ສສ ຫວຽດນາມ ກໍໄດ້ເຂົ້າຮ່ວມກອງປະຊຸມສຸດຍອດ ດັ່ງກ່າວເຊັ່ນກັນ.
ໂອກາດດັ່ງກ່າວຜູ້ນໍາ 3 ປະເທດ ໄດ້ພ້ອມກັນປຶກສາຫາລື ແລະແລກປ່ຽນທັດສະນະນໍາກັນຢ່າງເປີດອົກ ເປີດໃຈກ່ຽວກັບການທົບທວນຄືນຄວາມຄືບໜ້າ ຂອງການຈັດຕັ້ງປະຕິບັດແຜນແມ່ບົດວ່າດ້ວຍການພັດທະນາເສດຖະກິດ-ສັງຄົມຂອງເຂດສາມຫຼ່ຽມພັດທະນາ ກໍຄືການຜັນຂະຫຍາຍຂໍ້ຕົກລົງຂອງຜູ້ນໍາ 3 ປະເທດຢູ່ໃນກອງປະຊຸມສຸດຍອດ ຄັ້ງທີ 8 ຜ່ານມາ ເມື່ອປີ 2014 ທີ່ ນະຄອນຫຼວງວຽງຈັນ ແລະໄດ້ກໍານົດທິດທາງການຮ່ວມມືໃນຕໍ່ໜ້າແນໃສ່ເຮັດໃຫ້ເຂດສາມຫຼ່ຽມພັດທະນານີ້ ໄດ້ຮັບການພັດທະນາທຽບເທົ່າກັບຂົງເຂດອື່ນໆ ຂອງສາມປະເທດ ໂດຍນໍາໃຊ້ທ່າແຮງບົ່ມຊ້ອນທີ່ມີຢູ່ຢ່າງຫຼວງຫຼາຍບໍ່ວ່າຈະເປັນຊັບພະຍາກອນທໍາມະຊາດ, ແມ່ນໍ້າ-ລໍາເຊ, ກະສິກໍາ, ອຸດສາຫະກໍາປຸງແຕ່ງ, ອຸດສາຫະກໍາພະລັງງານ ແລະການທ່ອງທ່ຽວ.
ຜູ້ນຳ 3 ປະເທດໄດ້ຮັບຮອງ ແລະລົງນາມຖະແຫຼງການຮ່ວມ ຂອງກອງປະຊຸມສຸດຍອດເຂດສາມຫຼ່ຽມພັດທະນາກໍາປູເຈຍ-ລາວ-ຫວຽດນາມ ຄັ້ງທີ 9 ຊຶ່ງເປັນນິມິດໝາຍສໍາຄັນອີກຄັ້ງໜຶ່ງ ເພື່ອສືບຕໍ່ຮັກສາສັນຕິພາບ, ສະຖຽນລະພາບ ແລະຄວາມໝັ້ນຄົງ ຄຽງຄູ່ກັບການພັດ ທະນາເສດຖະກິດ-ສັງຄົມຮ່ວມກັນ ແນໃສ່ສ້າງວຽກເຮັດງານທໍາ, ຍົກລະດັບຊີ ວິດການເປັນຢູ່ ແລະລົບລ້າງຄວາມທຸກຍາກຂອງປະຊາຊົນໃນເຂດດັ່ງກ່າວ ໃຫ້ນັບມື້ນັບດີຂຶ້ນເທື່ອລະກ້າວ ແລະໃຫ້ສາມາດຫຍັບເຂົ້າໃກ້ຈຸດປະສົງ ແລະເປົ້າໝາຍເບື້ອງຕົ້ນ ໃນການສ້າງຕັ້ງຂອບການຮ່ວມມືດັ່ງກ່າວ.
ຄຽງຄູ່ກັນນີ້, ໄດ້ມີການລົງນາມສັນຍາວ່າດ້ວຍການສົ່ງເສີມ ແລະອໍານວຍຄວາມສະດວກທາງດ້ານການຄ້າ ຢູ່ໃນເຂດສາມຫຼ່ຽມພັດທະນາ ຊຶ່ງຕາງໜ້າລັດຖະບານລາວແມ່ນ ທ່ານ ສະເຫຼີມໄຊ ກົມມະສິດ ລັດຖະມົນຕີກະຊວງ ການຕ່າງປະເທດ ໂດຍສັນຍາດັ່ງກ່າວ ແມ່ນແນໃສ່ເພີ່ມທະວີມູນຄ່າການຄ້າ ແລະການລົງທຶນຢູ່ໃນເຂດດັ່ງກ່າວ ໂດຍຊຸກຍູ້ການສ້າງກິດຈະກໍາສົ່ງເສີມດ້ານການຄ້າຕ່າງໆ, ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ນັກທຸລະກິດ, ອໍານວຍຄວາມສະດວກໃຫ້ແກ່ການຂົນສົ່ງສິນຄ້າ ແລະການໄປມາຫາສູ່ກັນຂອງປະຊາຊົນ ພ້ອມດຽວກັນນີ້, ບັນດາຜູ້ນໍາ ຍັງໄດ້ຮັບຮອງເອົາໂຄງການບຸລິມະສິດ 15 ໂຄງການ.
ເພື່ອປະກອບສ່ວນເຮັດໃຫ້ກອງປະຊຸມສຸດຍອດຄັ້ງນີ້ ໄດ້ຮັບຜົນສໍາເລັດຕາມຈຸດປະສົງທີ່ວາງໄວ້, ກໍໄດ້ມີກອງປະຊຸມເຈົ້າໜ້າທີ່ອາວຸໂສ ແລະກອງປະຊຸມຄະນະກໍາມະການປະສານງານຮ່ວມຂອງເຂດສາມຫຼ່ຽມພັດທະນາກໍາປູເຈຍ-ລາວ-ຫວຽດນາມ ເພື່ອປຶກສາຫາລື ແລະກະກຽມບັນດາເອກະສານຕ່າງໆ ຂອງກອງປະຊຸມສຸດຍອດ.
ກອງປະຊຸມສຸດຍອດດັ່ງກ່າວໄດ້ດໍາເນີນໄປດ້ວຍບັນຍາກາດໄມຕີຈິດ-ມິດຕະພາບ, ຄວາມສາມັກຄີ, ຄວາມເຂົ້າ ອົກເຂົ້າໃຈ ແລະການຮ່ວມມືແບບອ້າຍນ້ອງຂອງສາມຊາດທີ່ມີມູນເຊື້ອອັນດີ ງາມມາແຕ່ດົນນານ ແລະກອງປະຊຸມໄດ້ປິດລົງດ້ວຍຜົນສໍາເລັດຢ່າງຈົບງາມ.
ຂ່າວ: ເສດຖະກິດ-ສັງຄົມ