ສຳນັກຂ່າວຣອຍເຕີ້ ລາຍງານໃນວັນທີ 15 ພະຈິກນີ້ວ່າ ທ່ານ ວະລາດີເມຍ ປູຕິນ ປະທານາທິບໍດີຣັດເຊຍ ໄດ້ໂທລະສັບໂອ້ລົມກັບ ທ່ານ ໂດນັນ ທຣັມ ໃນວັນຈັນທີ 14 ພະຈິກຜ່ານມານີ້ ຊຶ່ງເປັນຄັ້ງທຳອິດນັບຕັ້ງແຕ່ ທ່ານ ທຣັມ ໄດ້ຖືກເລືອກຕັ້ງ ໃຫ້ເປັນປະທານາທິບໍດີ ແຫ່ງ ສະຫະລັດອາເມຣິກາ ເມື່ອວັນທີ 8 ພະຈິກທີ່ຜ່ານມາ ໂດຍທັງສອງຝ່າຍ ໄດ້ເຫັນດີເປັນເອກະພາບ ຕໍ່ກັບທິດທາງຄວາມສຳພັນຕ່າງໆ ລະຫວ່າງ ຣັດເຊຍ-ອາເມຣິກາ ຕະຫລອດຮອດມີການປຶກສາຫາລື ໃນຄວາມພະຍາຍາມປາບປາມກຸ່ມຫົວຮຸນແຮງ ແລະ ກຸ່ມກໍ່ການຮ້າຍລະຫວ່າງປະເທດ.
ດ້ານຄະນະຜູ້ຊ່ວຍວຽກຂອງທ່ານ ທຣັມ ກໍໄດ້ອອກມາຖະແຫລງເຊັ່ນກັນວ່າ ປູຕິນ ໄດ້ຕໍ່ສາຍມາເພື່ອສະແດງຄວາມຍິນດີ ໂດຍທ່ານ ທຣັມໄດ້ບອກກັບປູຕິນວ່າ ທ່ານກຳລັງເບິ່ງໄປຂ້າງໜ້າ ໃນຄວາມສຳພັນທີ່ເຂັ້ມແຂງ ແລະ ຖາວອນກັບຣັດເຊຍ ແລະ ປະຊາຊົນຊາວຣັດເຊຍ ຊຶ່ງທັງສອງຝ່າຍ ຈະຍັງຄົງຕິດຕໍ່ກັນທາງໂທລະສັບເລື້ອຍໆ ແລະ ຈະຫາໂອກາດພົບປະກັນເປັນການສ່ວນຕົວ.
ທັງນີ້ ທ່ານ ໂດນັນ ທຣັມ ຈະເຂົ້າມາສືບທອດຕຳແໜ່ງ ປະທານາທິບໍດີ ສະຫະລັດອາເມຣິກາ ຕໍ່ຈາກທ່ານ ບາຣັກ ໂອບາມາ ໃນວັນທີ 20 ມັງກອນ 2017 ທີ່ຈະມາເຖິງ, ໃນຂະນະທີ່ຄວາມສຳພັນລະຫວ່າງ ທ່ານ ໂອບາມາ ແລະ ປູຕິນ ຕົກຢູ່ທ່າມກາງຄວາມເຄັ່ງຕຶງ ຈາກບັນຫາຂໍ້ຂັດແຍ່ງຕ່າງໆ ທັງຢູ່ຊີຣີ ແລະ ອູແກຣນ.
ຕິດຕາມເຮົາທາງFacebook ກົດຖືກໃຈເລີຍ!