ເພື່ອເປັນການປຶກສາຫາລືການສ້າງເສັ້ນທາງລົດໄຟ ກ່ອນການລົງມືຕົວຈິງ, ທັງນີ້ກໍເພື່ອຮັບປະກັນການປະສານງານທີ່ຕໍ່ເນື່ອງ ແລະເຮັດໃຫ້ການກໍ່ສ້າງໄດ້ຮັບປະສິດທິຜົນ. ດັ່ງນັ້ນຄະນະຮັບຜິດຊອບການກໍ່ສ້າງເສັ້ນທາງລົດໄຟລາວ-ຈີນຮ່ວມກັບກຸ່ມບໍລິສັດກໍ່ສ້າງທາງລົດໄຟເລກ 8, ບໍລິສັດທີ 3 ສປ ຈີນ ທີ່ຮັບຜິດຊອບກໍ່ສ້າງເຂດຫຼວງພະບາງ ໄດ້ຈັດຂຶ້ນທີ່ຫ້ອງປະຊຸມຂອງຫ້ອງວ່າການປົກຄອງແຂວງຫຼວງພະບາງ ໃນວັນທີ 8 ພະຈິກທີ່ຜ່ານມານີ້ ໂດຍການເຂົ້າຮ່ວມຂອງທ່ານ ບົວຄົງ ນາມມະວົງ ຮອງເຈົ້າແຂວງໆຫຼວງພະບາງ, ຄະນະຮັບຜິດຊອບການກໍ່ສ້າງທາງລົດໄຟຂອງແຂວງ ແລະວິສະວະກອນຂອງປະເທດຈີນ.
ທ່ານ ບົວຄົງ ນາມມະວົງ ໄດ້ມີຄໍາເຫັນຕໍ່ກອງປະຊຸມວ່າ: ການຈັດກອງປະຊຸມຂຶ້ນໃນຄັ້ງນີ້ແມ່ນເພື່ອປຶກສາຫາລື ແລະກໍານົດທິດທາງຂອງການປະສານງານກັນເພື່ອກໍ່ສ້າງເສັ້ນທາງລົດໄຟ ໂດຍສະເພາະແມ່ນເຂດແຂວງຫຼວງພະບາງ ແນໃສ່ເຮັດໃຫ້ການຈັດຕັ້ງປະຕິບັດໂຄງການກໍ່ສ້າງໄດ້ຮັບຜົນດີ ພ້ອມນັ້ນທາງແຂວງຫຼວງພະບາງກໍ່ໄດ້ແຕ່ງຕັ້ງຄະນະກໍາມະການຮັບຜິດຊອບແຕ່ລະວຽກງານເພື່ອອໍານວຍຄວາມສະດວກ ໃຫ້ແກ່ການກໍ່ສ້າງ ແລະໃຫ້ການຮ່ວມມືກັບທາງບໍລິສັດໃນການກະກຽມຄວາມພ້ອມການກໍ່ສ້າງເປັນຕົ້ນແມ່ນກຽມສະໜອງຫີນ, ແຫ່-ຊາຍຢູ່ແຕ່ລະຈຸດຂອງການກໍ່ສ້າງ ລວມເຖິງການຜະລິດສະບຽງອາຫານ ແລະກະກຽມແຮງງານຈໍານວນໜຶ່ງທີ່ທາງບໍລິສັດຕ້ອງການເຂົ້າຮ່ວມງານຄຽງຄູ່ກັບການຮັກສາຄວາມສະຫງົບຂອງສັງຄົມ.
ກອງປະຊຸມໃນຄັ້ງນີ້ທັງສອງຝ່າຍຍັງໄດ້ພ້ອມກັນຄົ້ນຄວ້າປຶກສາຫາລືຮ່ວມກັນ ໃນ 3 ບັນຫາຫຼັກຄື: ບັນຫາການນຳໃຊ້ທີ່ດິນເຂົ້າໃນການກໍ່ສ້າງທາງລົດໄຟ, ການສ້າງທ່າເຮືອເພື່ອນຳວັດສະດຸເຂົ້າໃນການກໍ່ສ້າງ ແລະບັນຫາພະລັງງານໄຟຟ້າເພື່ອຕອບສະໜອງໃຫ້ແກ່ການກໍ່ສ້າງ, ພ້ອມນີ້ຍັງໄດ້ຄົ້ນຄວ້າເຖິງນະໂຍບາຍ ເພື່ອຊົດເຊີຍໃຫ້ປະຊາຊົນຜູ້ທີ່ຖືກຜົນກະທົບຈາກການກໍ່ສ້າງຕື່ມອີກ, ພາຍຫຼັງສຳເລັດກອງ ປະຊຸມໃນຄັ້ງນີ້ທາງນັກວິສະວະກອນ ຂອງ ຈີນແມ່ນຈະເລີ່ມລົງສໍາຫຼວດເບິ່ງພື້ນທີ່ຕົວຈິງໃນທ້າຍເດືອນພະຈິກ 2016 ນີ້.
ຈາກໜັງສືພິມເສດຖະກິດ-ສັງຄົມ