ສື່ຕ່າງປະເທດລາຍງານວ່າ ອົງການບັນເທົາທຸກສາກົນ ໄດ້ອອກເຕືອນໃນວັນອາທິດ (20 ກໍລະກົດ) ຜ່ານມາ
ວ່າ ຊາວໂຊມາລີ ຈະປະເຊີນກັບຫາຍະນະຄັ້ງໃຫຍ່ດ້ານມະນຸດສະທຳ ຫຼັງເກີດພາວະຂາດແຄນອາຫານຢ່າງໜັກ
ໂດຍຊີ້ບອກວ່າ ປະຊາຊົນເກືອບ 3 ລ້ານຄົນ ເຖິງຂີດໃກ້ອົດຕາຍ.
ຄຳຖະແຫຼງຂອງອົງການບັນເທົາທຸກສາກົນ ທີ່ນຳໂດຍກຸ່ມ ເວີລດ໌ ວິຊັນ (Wold Vision) ລະບຸວ່າ ໃນຂະນະນີ້
ມີເດັກນ້ອຍຊາວໂຊມາລີ ຫຼາຍກ່ວາ 3 ແສນຄົນ ກຳລັງລົ້ມປ່ວຍດ້ວຍໂລກຂາດສານອາຫານ ໂດຍໃນຂະນະ
ທີ່ປະຊາຊົນອີກ່ວາ 2.9 ລ້ານຄົນ ໃນດິນແດນອາຟຣິກກາຕາເວັນອອກແຫ່ງນີ້ ກຳລັງຕ້ອງການຄວາມຊ່ວຍ
ເຫຼືອດ້ານອາຫານ ແລະ ຢາປົວພະຍາດ ເພື່ອຮັກສາຊີວິດຢ່າງຮີບດ່ວນ ພາຍໃນ 3-6 ເດືອນຂ້າງໜ້ານີ້.
ກ່ອນໜ້ານີ້ ອົງການສະຫະປະຊາຊາດ ໄດ້ອອກເຕືອນເມື່ອຕົ້ນເດືອນກໍລະກົດທີ່ຜ່ານມາ ໂດຍລະບຸວິກິດການ
ຂາດແຄນອາຫານໃນພື້ນທີ່ຕ່າງໆຂອງໂຊມາລີ ກຳລັງເຂົ້າສູ່ພາວະສຸກເສີນ ໂດຍບໍ່ເວັ້ນແຕ່ໃນນະຄອນຫຼວງ
ໂມກາດິຊູ ຂອງປະເທດ ແລະ ຢ້ຳວ່າ ພາວະຝົນທີ່ຂາດຊ່ວງ ລາຄາອາຫານທີ່ພຸ່ງຂຶ້ນສູງ ແລະ ຍອດເງິນຊ່ວຍ
ເຫຼືອດ້ານມະນຸດສະທຳຈາກສາກົນທີ່ຫຼຸດໜ້ອຍຖອຍລົງ ຕະຫຼອດຮອດໄພຄຸກຄາມຈາກກຸ່ມຕິດອາວຸດຫົວ
ຮຸນແຮງ ອັນ ເຊບັບ ຖືເປັນປັດໄຈໃນດ້ານລົບ ທີ່ພ້ອມຊ້ຳເຕີມໃຫ້ວິກິດດ້ານມະນຸດສະທຳໃນປະເທດໂຊມາລີ
ເຖິງຂັ້ນຮ້າຍແຮງສຸດຂີດ.
ເນື່ອງຈາກມີລາຍງານວ່າ ຂະນະນີ້ຍອດເງິນບໍລິຈາກຂອງສາກົນ ເພື່ອຊ່ວຍເຫຼືອຊາວໂຊມາລີໃນດ້ານມະນຸດ
ສະທຳໃນປີນີ້ ມີສັດສ່ວນພຽງແຕ່ 12% ຈາກເປົ້າໝາຍເງິນບໍລິຈາກທີ່ຕ້ອງໃຊ້ທັງໝົດ 933 ລ້ານໂດລາ.
ເມື່ອປີ 2011 ປະເທດໂຊມາລີ ປະເຊີນກັບວິກິດຂາດແຄນອາຫານຄັ້ງຮ້າຍແຮງທີ່ສຸດ ຈາກຜົນພວງຂອງພາ
ວະແຫ້ງແລ້ງ ເຊິ່ງເປັນເຫດເຮັດໃຫ້ປະຊາຊົນກ່ວາ 13 ລ້ານຄົນ ໄດ້ຮັບຜົນກະທົບ ໂດຍໃນຂະນະທີ່ເກືອບ
260,000 ຄົນ ຕ້ອງເສຍຊີວິດຈາກພາວະອົດຢາກໃນປີດັ່ງກ່າວ.