ສຳນັກຂ່າວຣອຍເຕີລາຍງານວ່າ ໜ່ວຍການຂ່າວຂອງສະຫະລັດ ເຊື່ອວ່າເຮືອບິນຂອງສາຍການບິນມາເລເຊຍ ແອຣ໌ລາຍ
ທີ່ບັນທຸກລູກເຮືອ ແລະ ຜູ້ໂດຍສານ 295 ຄົນ ສ່ວນໃຫຍ່ເປັນຊາວເນເທີແລນ ຖືກຍິງຕົກເໜືອນ່ານຟ້າຂອງຢູເຄຣນ
ຈາກຂີປະນາວຸດພາກພື້ນດິນສູ່ອາກາດ ໃນວັນພະຫັດ 17 ກໍລະກົດຜ່ານມາ ໂດຍບໍ່ໄດ້ອ້າງເຖິງວ່າແມ່ນຝີມືຂອງໃຜ.
ເຈົ້າໜ້າທີ່ອາເມລິກາຜູ້ບໍ່ປະສົງອອກນາມທ່ານໜຶ່ງ ໄດ້ເປີດເຜີຍວ່າ ໜ່ວຍວິເຄາະຂໍ້ມູນຂອງການຂ່າວສະຫະລັດອາເມລິ
ກາ ເຊື່ອໝັ້ນຢ່າງສຸດຂີດວ່າ ຂີປະນາວຸດຖືກຍິງຈາກພາກພື້ນດິນສູ່ອາກາດມຸ່ງເປົ້າສູ່ເຮືອບິນລຳດັ່ງກ່າວ ເຊິ່ງກຳລັງທົບ
ທວນຂໍ້ມູນເພື່ອສະຫຼຸບວ່າ ອາວຸດດັ່ງກ່າວຖືກຍິງໂດຍຝ່າຍໃດ.
ລັດຖະບານຢູເຄຣນກ່າວຫາວ່າ ພວກກຸ່ມແບ່ງແຍກດິນແດນທາງພາກຕາເວັນອອກຂອງຢູເຄຣນ ເປັນຄົນຍິງເຮືອບິນ
ໂບອິງ 777 ທ່ຽວບິນ MH 17 ຂອງສາຍການບິນມາເລເຊຍ ແອຣ໌ລາຍ ດ້ວຍອາວຸດໜັກ ຂີປະນາວຸດພາກພື້ນສູ່ອາກາດ
SA-11 ຍຸກສະໄໝໂຊວຽດ ໃນຂະນະທີ່ເຮືອບິນກຳລັງມຸ່ງໜ້າຈາກນະຄອນອາມສະເຕີດາມ ປະເທດເນທີແລນ ເພື່ອໄປຍັງ
ນະຄອນຫຼວງກົວລາລຳເປີ ຂອງມາເລເຊຍ, ແຕ່ທາງຝ່າຍແກນນຳຂອງກຸ່ມແບ່ງແຍກດິນແດນ ເຊິ່ງສະຖາປະນາຕົນເອງ
ເປັນສາທາລະນະລັດປະຊາຊົນໂດເນດ ໄດ້ອອກມາປະຕິເສດເຖິງການກ່າວຫາດັ່ງກ່າວ.
ກຸ່ມແບ່ງແຍກດິນແດນນິຍົມຣັດເຊຍ ທາງພາກຕາເວັນອອກຂອງຢູເຄຣນກ່າວວ່າ ພວກເຂົາໄດ້ພົບກ່ອງດຳຂອງເຮືອ
ບິນລຳດັ່ງກ່າວແລ້ວ ແຕ່ກໍຍັງບໍ່ໄດ້ຮັບການຢືນຢັນຢ່າງເປັນທາງການ, ນອກຈາກນີ້ ແກນນຳລາຍໜຶ່ງຂອງພວກເຂົາ
ກໍໄດ້ກ່າວຫາວ່າ ກອງກຳລັງຂອງລັດຖະບານຢູເຄຣນ ເປັນຄົນຍິງເຮືອບິນດັ່ງກ່າວຕົກ ແລະ ອ້າງວ່າ ຝ່າຍກຸ່ມແບ່ງແຍກ
ດິນແດນເອງ ບໍ່ມີອາວຸດໃດໆທີ່ມີແສນຍານຸພາບ ສາມາດຍິງເຮືອບິນທີ່ບິນຢູ່ໃນລະດັບຄວາມສູງເຖິງ 10 ກິໂລແມັດໄດ້.
ທ່ານ ຮູອິບ ກໍເຕີ ຮອງປະທານອາວຸໂສຂອງສາຍການບິນມາເລເຊຍ ແອຣ໌ລາຍ ເປີດເຜີຍວ່າ ເຮືອບິນລຳດັ່ງກ່າວມີຊາວ
ເນເທີແລນຢ່າງໜ້ອຍ 154 ຄົນ, ອົດສະຕາລີ 27 ຄົນ, ມາເລເຊຍ 23 ຄົນ, ອິນໂດເນເຊຍ 11 ຄົນ, ອັງກິດ 6 ຄົນ, ເຢຍລະ
ມັນ 4 ຄົນ, ແບນຊິກ 4 ຄົນ, ຟີລິບປິນ 3 ຄົນ ແລະ ການາດາ 1 ຄົນ. ເຖິງຢ່າງໃດກໍຕາມ ຍັງມີຜູ້ໂດຍສານອີກ 47 ຄົນ
ທີ່ຍັງບໍ່ທັນຮູ້ສັນຊາດທີ່ແນ່ນອນ ໃນຂະນະທີ່ລູກເຮືອຂອງຖ້ຽວບິນດັ່ງກ່າວ ທັງໝົ 15 ຄົນ ເປັນຊາວມາເລເຊຍ.