ຕາມການໃຫ້ຮູ້ຂອງ ເຈົ້າໜ້າທີ່ປ້ອງກັນຄວາມສະຫງົບກຸ່ມບ້ານນາຊາຍທອງ ເມືອງນາຊາຍທອງ
ແກ່ນັກຂ່າວຂອງລາວໂພສທ໌ ໃນວັນພະຫັດ 17 ກໍລະກົດນີ້ວ່າ: ໃນເວລາ 12 ໂມງຂອງວັນທີ 11 ກໍລະ
ກົດ 2014 ທີ່ຜ່ານມາ ໄດ້ເກີດເຫດຢາງລົດໄຖນາເດີນຕາມແຕກ ຢູ່ບ້ານນາຄູນ ເມືອງນາຊາຍທອງ
ນະຄອນຫຼວງວຽງຈັນ ເຮັດໃຫ້ມີຜູ້ໄດ້ຮັບບາດເຈັບສາຫັດ 2 ຄົນຄື: ທ້າວ ວັນ ອາຍຸ 33 ປີ ອາຊີບກຳ
ມະກອນ ແລະ ທ້າວ ເພັງ ອາຍຸ 24 ປີ ອາຊີບກຳມະກອນ ໂດຍທັງສອງຢູ່ບ້ານນາຄູນ ເມືອງນາຊາຍ
ທອງ ນະຄອນຫຼວງວຽງຈັນ.
ທ່ານ ພັຕ. ຄຳສົນ ລາດຊະວົງ ຮອງຫົວໜ້າ ປ.ກ.ສ ກຸ່ມບ້ານນາຊາຍທອງ ໄດ້ໃຫ້ສຳພາດກັບນັກ
ຂ່າວພວກເຮົາວ່າ ” ທັງສອງຄົນ ແມ່ນກຳລັງສູບລົມເຂົ້າຢາງເບື້ອງໜ້າຂອງລົດໄຖນາ ໂດຍຜູ້ໜຶ່ງ
ຈັບຫົວສູບລົມ ແລະ ອີກຜູ້ໜຶ່ງໃຊ້ໄມ້ເຄາະຢາງລົດດັ່ງກ່າວ ເພື່ອຕິດຕາມປະລິມານລົມຢູ່ໃນຢາງລົດ
ໄປພ້ອມ ແລະ ຕໍ່ມາກໍເກີດເຫດຢາງລະເບີດຂຶ້ນ ເຮັດໃຫ້ນ໋ອດຕະເກ້ທີ່ຈັບຢາງລົດ ປິວມາຕຳກະທົບ
ໃສ່ພວກກ່ຽວ ເປັນເຫດເຮັດໃຫ້ ທ້າວ ເພັງ ຂາຫັກ ແລະ ທ້າວ ວັນ ຄາງກະໄຕຫັກ ບາດເຈັບສາຫັດ
ເຊິ່ງປະຈຸບັນຍັງເຂົ້າຮັບການປິ່ນປົວຢູ່ໂຮງໝໍ ”
ທ່ານ ພັຕ. ຄຳສົນ ຍັງໄດ້ລະບຸອີກວ່າ ເຫດການດັ່ງກ່າວ ເກີດຂຶ້ນຈາກຄວາມປະໝາດຂອງຄົນເຮົາ
ເຊິ່ງເປັນອຸທາຫອນເຕືອນໃຈໃຫ້ແກ່ຜູ້ອື່ນໆ ເຖິງອັນຕະລາຍທີ່ອາດຈະເກີດຂຶ້ນ ຈາກການສູບຢາງ
ລົດດ້ວຍຕົນເອງ ເຊິ່ງບໍ່ມີຄວາມຊຳນິຊຳນານສະເພາະດ້ານ ຈິ່ງຂໍໃຫ້ທຸກຄົນຈົ່ງລະມັດລະວັງຕື່ມ
ແລະ ດີທີ່ສຸດກໍຄວນເຂົ້າຮ້ານຈອດຢາງ ທີ່ມີນາຍຊ່າງວິຊາສະເພາະສູບໃຫ້ ຈະປອດໄພກ່ວາ.