ປະຈຸບັນແມ່ນກ້າວເຂົ້າສູ່ໄລຍະ 3 ເດືອນຂ້າມຜ່ານທ້າຍປີ 2016 ໂດຍລັດຖະບານແຫ່ງ ສປປ ລາວ ໄດ້ຕັ້ງ ເປົ້າໝາຍການຈັດເກັບລາຍຮັບເຂົ້າງົບປະມານໃນໄລຍະນີ້ໃຫ້ໄດ້ທັງໝົດ 3 ພັນຕື້ກວ່າກີບຖືເປັນຕົວເລກທີ່ທ້າທ້າຍພໍສົມຄວນເນື່ອງຈາກໃນສົກປີ 2015-2016 ຜ່ານມາຫຼາຍແຂວງເກັບລາຍຮັບໄດ້ຫຼຸດຄາດໝາຍທີ່ລັດວາງໃຫ້.
ເພື່ອປະຕິບັດຕາມມາດຕາ 7 ຂອງກົດໝາຍວ່າດ້ວຍງົບປະມານແຫ່ງລັດ ນັບແຕ່ປີ 2017 ເປັນຕົ້ນໄປລັດຖະບານຈະໄດ້ເລີ່ມຈັດຕັ້ງປະຕິບັດງົບປະມານຕາມປີປະຕິທິນທີ່ເມື່ອກ່ອນ ນັບຈາກວັນທີ 1 ຕຸລາຫາວັນທີ 30 ກັນຍາຂອງປີຖັດໄປປ່ຽນມາເປັນ ວັນທີ 1 ມັງກອນຫາວັນທີ 31 ທັນວາຂອງທຸກໆ ປີອັນເຮັດໃຫ້ມີ 3 ເດືອນຂ້າມຜ່ານທ້າຍປີ 2016 ຄື: ເດືອນຕຸລາ, ພະຈິກ ແລະທັນວາ ໂດຍໃນໄລຍະນີ້ກະຊວງການເງິນໄດ້ກຳນົດແຜນ ລາຍຮັບທີ່ອີງຕາມຄວາມອາດສາມາດໃນການເກັບລາຍຮັບຕົວຈິງ ຂອງຂະແໜງລາຍຮັບຈະໃຫ້ໄດ້ທັງໝົດປະມານ 3.060 ຕື້ ກວ່າກີບ.
ໃນນີ້ຈະມີລາຍຮັບຈາກສ່ວຍສາອາກອນ 1.500 ຕື້ ກີບ, ພາສີ 1.150 ຕື້ກີບ, ຊັບສິນຂອງລັດ 380 ຕື້ກີບ, ວິ ສາຫະກິດລັດລົງທຶນ ແລະປະກັນໄພ 30 ຕື້ກີບ ສ່ວນວ່າລາຍຮັບຈາກການຊ່ວຍເຫຼືອລ້າໃນໄລຍະດັ່ງກ່າວກະ ຊວງການເງິນເປີດເຜີຍບໍ່ສາມາດປະຕິບັດໄດ້.
ຂະນະທີ່ລາຍຈ່າຍໃນຊ່ວງດຽວກັນກະຊວງການເງິນຕັ້ງໄວ້ຈຳນວນທັງໝົດ 3.560 ຕື້ກີບ ທີ່ເປັນລາຍຈ່າຍບໍລິຫານປົກກະຕິ 2.750 ຕື້ກີບ ແລະອີກ 810 ຕື້ກີບ ແມ່ນລາຍຈ່າຍໜີ້ສິນພາຍໃນ ແລະຕ່າງປະເທດ ແຕ່ທັງນີ້ຄາດວ່າຕົວເລກການຂາດດູນງົບປະມານຈະຢູ່ໃນລະດັບ 500 ຕື້ກີບ ຊຶ່ງລັດຖະບານຈະມີມາດຕະການລະດົມແຫຼ່ງດຸນດ່ຽງທີ່ເໝາະສົມຈາກພາຍໃນ ແລະຕ່າງປະເທດ.
ຢ່າງໃດກໍຕາມ ຖ້າສັງເກດເບີ່ງລາຍຮັບ-ລາຍຈ່າຍໃນ 3 ເດືອນຂ້າມຜ່ານກໍນັບເປັນຕົວເລກຂ້ອນຂ້າງທ້າທາຍສົມຄວນທີ່ຈະບັນລຸໃນທາມກາງສະພາບທີ່ປະເທດຊາດຍັງສືບຕໍ່ປະເຊີນກັບບັນ ຫາຄວາມຫຍຸ້ງຍາກດ້ານການເງິນ ໂດຍໃນສົກປີຜ່ານມາຫຼາຍແຂວງແມ່ນບໍ່ສາມາດຈັດເກັບລາຍຮັບເປັນຕົ້ນແມ່ນ ແຂວງອຸດົມໄຊໃນ 9 ເດືອນເກັບໄດ້ 73% ຂອງແຜນປີ, ແຂວງຫຼວງນ້ຳທາໄດ້ 71,93%, ແຊວງຊຽງຂວາງ 51,19%, ຫຼວງພະບາງເກັບໄດ້ 75,05%, ເຊກອງ 79%, ອັດຕະປື 61,78% ຂອງແຜນ ສົກປີ ແລະແຂວງອື່ນໆກໍມີທ່າທີຈະບໍ່ບັນ ລຸເປົ້າຕາມທີ່ລັດວາງໃຫ້ເຊັ່ນດຽວກັນ ຂະນະທີ່ຕົວເລກເກັບລາຍຮັບທົ່ວປະ ເທດໃນ 6 ເດືອນຕົ້ນສົກປີເກັບໄດ້ພຽງ 30,6% ຂອງແຜນປີ.
ຂ່າວ: ເສດຖະກິດ-ສັງຄົມ