ວັນທີ 12 ຕຸລາ 2016 ວານນີ້ ລາຍງານຈາກທ້ອງຖິ່ນວ່າ ໄດ້ເກີດອຸບັດເຫດຂຸມຄຳເຈື່ອນທັບປະຊາຊົນຢູ່ເຂດບ້ານນາເຟືອງ (ເກົ່າ) ເຂດນໍ້າທົບ ເມືອງຄຳເກີດ ແຂວງບໍລິຄຳໄຊ ເສຍຊີວິດທັນທີ 4 ຄົນ.
ຂ່າວບອກວ່າ ປະຊາຊົນທີ່ເສຍຊີວິດ ເປັນຄົນບ້ານນາທ່ອນ ເຂດນໍ້າທົບ ໄດ້ຊວນກັນໄປຂຸດຄຳຢູ່ທົ່ງນາຂອງຕົນທີ່ບ້ານນາເຟືອງ ເປັນເວລາຫລາຍມື້ແລ້ວ ແລະມີຄວາມເລິກຫລາຍແມັດ ດ້ວຍເຕັກນິກຄວາມຮູ້ແບບຊາວບ້ານ ບໍ່ມີຄວາມຮັບປະກັນ ຈຶ່ງເຮັດໃຫ້ດິນຍຸບທັບໄວ້ໃນພື້ນບໍ່ຄຳ.
ໝູ່ເພື່ອນຮ່ວມທີມ ພ້ອມດ້ວຍພໍ່ແມ່ປະຊາຊົນໃນເຂດດັ່ງກ່າວ ໄດ້ພະຍາຍາມຊ່ວຍເຫລືອດ້ວຍການຂຸດດິນຂຶ້ນມາ ແຕ່ບໍ່ທັນການ ໃນທີ່ສຸດຈຶ່ງໄດ້ໃຊ້ລົດຈົກໄປຈົກດິນຂຶ້ນ ຈຶ່ງສາມາດກອບກູ້ເອົາຮ່າງຜູ້ເສຍຊີວິດຂຶ້ນມາໄດ້ ໃນເວລາຕໍ່ມາ.
ໄລຍະຫລາຍປີທີ່ຜ່ານມາ ໄດ້ເກີດເຫດໃນລັກສະນະດຽວກັນນີ້ຫລາຍຄັ້ງ ແລະມີຄົນເສຍຊີວິດຫລາຍຄົນແລ້ວ ດ້ວຍຄວາມຢາກໄດ້ຢາກມີເປັນເຫດ.