ວັນທີ 31/08/2016 ຕາງຫນ້າຫນ່ວຍກູ້ໄພມູນນິທິຊ່ວຍເຫລືອຄົນທຸກຍາກແຫ່ງ ສປປ ລາວ ຫລື ທີ່ຮູ້ກັນໃນນາມ Vientiane Rescue ໄດ້ຂຶ້ນຮັບລາງວັນ ຣາມອນແມັກໄຊໄຊ (Ramon Magsaysay Award) ປະຈຳປີ 2016 ເຊິ່ງຈັດຂຶ້ນ ເປັນປີທີ 58 ທີ່ປະເທດຟິລິບປິນ ຮ່ວມກັບຜູ້ເຂົ້າຮ່ວມທ່ານອື່ນໆອີກຈາກ 5 ພາກສ່ວນ ພາຍໃນເອເຊຍ ໂດຍລາງວັນດັ່ງກ່າວແມ່ນມອບໂດຍ ທ່ານຮອງປະທານປະເທດຟິລິບປິນ.
ຫນ່ວຍກູ້ໄພພວກເຮົາມີຄວາມປື້ມປິຕິຍິນດີເປັນຢ່າງຍິ່ງກັບການໄດ້ຮັບລາງວັນຄັ້ງນີ້ ຂໍສະແດງຄວາມຂອບໃຈໄປຍັງທຸກພາກສ່ວນທີ່ໃຫ້ກຳລັງໃຈພວກເຮົາມາຕະຫລອດຈົນມີມື້ນີ້ ຂອບໃຈທ່ານປະທານມູນນິທິພ້ອມຄະນະທີ່ໄດ້ຊີ້ນຳແນວທາງ ນະໂຍບາຍຕ່າງໆ ແລະ ຂອບໃຈພາກສ່ວນທີ່ກ່ຽວຂ້ອງທີ່ໃຫ້ຄວາມຮູ້ດ້ານວິຊາການ ແນວທາງການປະຕິບັດງານໃຫ້ເປັນລະບົບ ແລະ ມີລະບຽບແບບແຜນ.
ຂໍຂອບໃຈທ່ານຮອງປະທານປະເທດຟິລິບປິນສຳລັບການມອບລາງວັນ ແລະ ຂໍຂອບໃຈຄະນະກຳມະການລາງວັນຣາມອນແມັກໄຊໄຊ ທີ່ຄັດເລືອກຫນ່ວຍງານພວກເຮົາໃຫ້ໄດ້ຮັບລາງວັນອັນຊົງກຽດນີ້.
ສຳລັບງານຖະແຫລງຂ່າວຢ່າງເປັນທາງການຈະໄດ້ຈັດຂຶ້ນທີ່ນະຄອນຫລວງວຽງຈັນໃນໄວໆ ນີ້.
ທ່ານສາມາດອ່ານຂໍ້ມູນເພີ່ມເຕີມກ່ຽວກັບລາງວັນໄດ້ທີ່: www.rmaward.asia