ຂປລ. ຄຳຕັນ ພາວິໄລ ຜູ້​ສື່​ຂ່າວ​ຈາກ​ແຂວງ​ບໍລິ​ຄຳ​ໄຊ ​ໃຫ້​ຮູ້​ວ່າ: ບ້ານ​ນາ​ເມືອງ ​ເມືອງ​ຄຳ​ເກີດ ​ແຂວງ​ບໍລິ​ຄຳ​ໄຊ ​ໄດ້​ນຳ​ໃຊ້​ໂຮງຮຽນ​ປະຖົມ​ສົມບູນ​ຫລັງ​ໃໝ່ ​ໂດຍ​ໄດ້​ມີ​ພິທີ​ມອບ-​ຮັບ​ ຢ່າງ​ເປັນ​ທາງ​ການ​ ໃນທ້າຍ​ເດືອນ​ສິງຫາ ຜ່ານ​ມາ ​ໂດຍ​ໄດ້​ຮັບ​ທຶນ​ຊ່ວຍ​ເຫລືອ​ກໍ່ສ້າງ ຈາກສູນປະຕິບັດທຳ ມາສເຕີຣູມາ ແລະ ໂຮງຮຽນກຽດຕິສັກນາໆຊາດ.

ໂຄງການກໍ່ສ້າງໂຮງຮຽນດັ່ງກ່າວ, ​ໄດ້​ເລີ່​ມລົງມື​ມາ​ແຕ່ວັນທີ 17 ກໍລະກົດ ຫາ ວັນທີ 30 ສິງຫາ 2016 ແມ່ນ​ສຳເລັດ 100%. ເປັນອາຄານຖາວອນ ກ້ວາງ 9 ແມັດ, ຍາວ 48 ແມັດ ສາມາດບັນຈຸນັກ ຮຽນໄດ້ 180 ກ່ວາຄົນ, ປະກອບດ້ວຍຫ້ອງຮຽນ 6 ຫ້ອງຮຽນ, ໂຕະຄູ 6 ຊຸດ, ໂຕະ–ຕັ່ງນັກຮຽນ 80 ຊຸດ, ຫ້ອງນ້ຳ 6 ຫ້ອງ, ພ້ອມດ້ວຍລະບົບໄຟຟ້າ, ນ້ຳປະປາຄົບຊຸດ ລວມມູນຄ່າການກໍ່ສ້າງທັງໜົດ 105.000 ໂດລາສະຫະລັດ.

​ໂອກາດ​ດຽວ​ກັນ​ນີ້, ຜູ້ຕາງໜ້າ​ຈາກສູນປະຕິບັດ ທຳມາສເຕີຣູມາ ແລະ ໂຮງຮຽນກຽດຕິສັກນາໆຊາດ ຍັງໄດ້ມອບ​ເຄື່ອງ​ອຸ​ປະ​ກອນ​ ການ​ຮຽນ​ໃຫ້ນ້ອງນັກຮຽນຕື່ມ​ອີກ. ​ໃນ​ນັ້ນ​ປະກອບ​ມີ ກະເປົານັກຮຽນ 170 ໜ່ວຍ, ຊຸດນັກຮຽນ 340 ຊຸດ, ປຶ້ມຂຽນ 1000 ຫົວ, ສໍ-ບິກຈຳນວນ 550 ກ້ານ. ທັງ​ນີ້ ກໍເພື່ອ​ນໍາໃຊ້​ເຂົ້າ​ ໃນ​ການ​ຮຽນ​ໃຫ້​ພຽງ​ພໍ ແລະ ມີ​ຄວາມ​ສະ​ດວກຫລາຍ​ຂຶ້ນ.

ແຫລ່ງຂ່າວ:

ຕິດຕາມເຮົາທາງFacebook ກົດຖືກໃຈເລີຍ!