ການຕາມລາຍງານຂອງວິທະຍຸກະຈາຍສຽງແຫ່ງຊາດ ກ່າວວ່າໃນໄລຍະ ເດືອນ ສິງຫານີ້ ມີລົດໃຫຍ່ຕົກຂົວຈົມວັງລຳ, ເມືອງ ຮຸນ, ແຂວງ ອຸດົມໄຊ 2 ຄັນແລ້ວ ແຕ່ໂຊກດີທີ່ບໍ່ມີຜູ້ເສຍຊີວິດ
ທ່ານ ບຸນຄົງ ຫລ້າຈຽມພອນ, ເຈົ້າເມືອງຯ ຮຸນ ໄດ້ແຈ້ງໃຫ້ຮູ້ວ່າ: ຂົວຈົມວັງລຳ ເປັນຂົວຂ້າມນ້ຳແບງ, ເຂດບ້ານ ດອນຄຳ, ເມືອງ ຮຸນ ເປັນຂົວທີ່ສ້າງຂຶ້ນໃນປີ 1970 ແລະ ເປັນຂົວທີ່ນອນຢູ່ເສັ້ນທາງຫລວງແຫ່ງຊາດ 2 W ທີ່ສາມາດເຊື່ອມຕໍ່ຈາກ ແຂວງ ອຸດົມໄຊ ໄປຫາປະເທດຫວຽດນາມ. ແຕ່ລະປີພໍຮອດລະດູຝົນປະຊາຊົນທີ່ສັນຈອນຜ່ານຂົວແຫ່ງນີ້ພົບຄວາມຫຍຸ້ງຍາກທີ່ສຸດເນື່ອງຈາກຂົວດັງກ່າວເປັນຂົວຈົມ ຖ້າຫາກນ້ຳມາແຮງແມ່ນບໍ່ສາມາດສັນຈອນໄດ້, ຕ້ອງໄດ້ໃຊ້ເຮືອຂ້າມ ຫລື ລົດບາງຄັ້ງທີ່ບໍ່ຊຳນານທາງມີຄວາມສ່ຽງສູງທີ່ຈະຕົກຂົວໄດ້. ສະເພາະເດືອນສິງຫານີ້ ມີລົດໃຫຍ່ຕົກຂົວແລ້ວ 2 ຄັນ ແລະ ໃນໄລຍະຜ່ານມາກໍມີລົດໃຫຍ່ຕົກຂົວແຫ່ງນີ້ຫລາຍຄັນແລ້ວ.
ຂະນະທີ່ ທ່ານ ສົມຈິດ ປັນຍາສັກ, ຮອງເຈົ້າແຂວງຯ ອຸດົມໄຊ ໄດ້ແຈ້ງໃຫ້ຮູ້ວ່າ: ເນື່ອງຈາກເສັ້ນທາງ 2 W ເປັນເສັ້ນທາງຫລວງແຫ່ງຊາດທີ່ຢູ່ໃນຄວາມຮັບຜິດຊອບຂອງລັດຖະບານ, ດັງນັ້ນ ແຂວງ ອຸດົມໄຊ ຈະເອົາແຜນການສະເໜີກໍ່ສ້າງຂົວວັງລຳຂຶ້ນໃຫມ່ເຂົ້າໃນແຜນພັດທະນາເສດຖະກິດ-ສັງ ຄົມ 5 ປີຂອງ ແຂວງ ອຸດົມໄຊ ເພື່ອສະເໜີຕໍ່ລັດຖະບານຊ່ວຍກໍ່ສ້າງຂົວແຫ່ງນີ້ໃຫມ່. ສະນັ້ນ ໃນໄລຍະນີ້ປະຊາຊົນ ກໍຄື ຜູ້ໃຊ້ເສັ້ນທາງ 2 W ທີ່ຈະເຊື່ອມຕໍ່ຈາກເມືອງ ແບງ ຫາເມືອງ ຮຸນ ຈໍາເປັນຕ້ອງໄດ້ອົດທົນໃຊ້ຂົວຈົມແຫ່ງນີ້ໄປກ່ອນຈົນກ່ວາລັດຖະບານຈະອະນຸມັດການກໍ່ສ້າງຂົວວັງລຳຂຶ້ນໃຫມ່.
ວິດີໂອຈາກປະກາດ
ຂໍ້ມູນຂ່າວແລະຮູບຈາກ: ວິທະຍຸກະຈາຍສຽງແຫ່ງຊາດ