ຫາກໃຜຕິດຕາມໂຄງການ ລາວຊຸບເປີໂມເດວ ຄົງລໍຄືນລໍວັນ ທີ່ຈະຮູ້ຜົນ ວ່າປີ 2016 ນີ້ ໃຜແດ່ ທີ່ຈະໄດ້ຮັບເລືອກເປັນຜູ້ຊະນະເລີດ ຊຶ່ງການຄອງຄອຍນັ້ນກໍຖືກສະເຫຼີຍໃນທີ່ສຸດ ພາຍຫຼັງຄໍ່າຄືນວັນທີ 20 ສິງຫາ ຜ່ານມາທີ່ມີການຄັດເລືອກຮອບຕັດເຊືອກເປັນທີ່ຮຽບຮ້ອຍແລ້ວ.
ການປະກວດຍິງແບບ-ຊາຍແບບກັບໂຄງການລາວຊຸບເປີໂມເດວປະຈໍາປີ 2016 ໃນຄໍ່າຄືນວັນທີ 20 ສິງຫາ ທີ່ຫໍວັດທະນະທໍາແຫ່ງຊາດ ໄດ້ປະກາດຢ່າງເປັນທາງການ ໂດຍຜູ້ຊະນະເລີດລຸ້ນທົ່ວໄປ ແລະ ລຸ້ນເຍົາວະຊົນ ມີດັ່ງນີ້:
– ຊາຍແບບລຸ້ນເຍົາວະຊົນໄດ້ ແກ່ SM04: ທ້າວ ອະພິວັດ ປຣະໄພ ( ເຊັນເຊຢ້າ )
– ນາງແບບຍິງເຍົາວະຊົນແມ່ນ SL01: ນາງ ວິການດາ ສິລິມະໂມໄທ ( ຈີຈີ່ )
ສຳລັບຜູ້ຊະນະເລີດລຸ້ນຊາວໜຸ່ມ ຫຼື ທົ່ວໄປ
– ຊາຍແບບແມ່ນໝາຍເລກ M09: ທ້າວ ສຸລິຄານ ທັກຂິນ ( ເບັນ )
– ນາງແບບແມ່ນ L05: ນາງ ວິຈິດຕາ ພອນວິໄລ ( ເມ )
ນອກຈາກນັ້ນ, ກໍຍັງມີລາງວັນຂວັນໃຈຊ່າງພາບ ແລະ ລາງວັນ ບຸກຄະລິກກະພາບດີ ພາຍໃຕ້ ການສະໜັບສະໜູນຈາກຫຼາຍພາກສ່ວນ ເຮັດໃຫ້ງານປະກວດປີທີ 3 ນີ້ເຕັມໄປດ້ວຍຜົນສໍາເລັດຢ່າງໜ້າ ປະທັບໃຈ.
ເຊື່ອວ່າ ສີສັນຄວາມງົດງາມເທິງເວທີ ແລະ ບັນຍາກາດໃນງານປະກວດ ໃນຄໍ່າຄືນ ວັນເສົາ 20 ສິງຫາຜ່ານມາ ທີ່ຫໍວັດທະນະທໍາແຫ່ງຊາດ ຍັງຄົງຕິດຕາ ແລະ ຝັງໃຈ ຂອງຜູ້ໄດ້ໄປສໍາຜັດຕົວຈິງໄປ ອີກນານ.
