ສຳນັກຂ່າວຕ່າງປະເທດ ລາຍງານໃນວັນທີ 9 ສິງຫານີ້ວ່າ ປະຊາຊົນຊາວໄທ ໄດ້ອອກມາລົງປະຊາມະຕິ ຮັບຮອງເອົາລັດຖະທຳມະນູນ ສະບັບໃໝ່ ຊຶ່ງຮ່າງຂຶ້ນພາຍໃຕ້ການນຳຂອງ ທ່ານ ພົນເອກ ປະຍຸດ ຈັນໂອຊາ ຫົວໜ້າຄະນະລັດຖະປະຫານ ແລະ ນາຍົກລັດຖະມົນຕີໄທ ໃນວັນອາທິດທີ 7 ສິງຫາ 2016 ໂດຍຜົນຂອງການນັບຄະແນນ ເບື້ອງຕົ້ນພົບວ່າ ມີຜູ້ໃຫ້ການຮັບຮອງ ຮ່າງລັດຖະທຳມະນູນສະບັບໃໝ່ ຫລາຍກວ່າ 61% ໃນຂະນະທີ່ຜົນຂອງການນັບຄະແນນ ຢ່າງເປັນທາງການ ຈະມີກຳນົດການເຜີຍແຜ່ ໃນວັນພຸດທີ 10 ສິງຫານີ້.

ດ້ານສຳນັກຂ່າວຣອຍເຕີ້ ໄດ້ນຳສະເໜີແງ່ມູມຂອງນັກວິເຄາະວ່າ ຄວາມປາຖະໜາຕໍ່ກັບ ສະຖຽນລະພາບທາງການເມືອງ ໄດ້ເປັນສິ່ງຊຸກຍູ້ອັນສຳຄັນ ໃຫ້ແກ່ປະຊາຊົນໃນການລົງຄະແນນຮັບ ໃນລະຫວ່າງບັນຍາກາດທີ່ ການເມືອງໄທຖືກສັ່ນຄອນມາເກືອບທົດສະວັດ ຊຶ່ງໄດ້ເຫັນການຍຶດອຳນາດຂອງທະຫານ 2 ຄັ້ງ ພ້ອມກັບເຫດການປະທ້ວງຫລາຍຄັ້ງ ຊຶ່ງກ້າວໄປສູ່ການນອງເລືອດ.

ກ່ອນໜ້າການລົງປະຊາມະຕິນີ້ ບັນດາພັກການເມືອງຫລັກຂອງໄທ ໄດ້ອອກມາວິພາກວິຈານ ຮ່າງລັດຖະທຳມະນູນສະບັບນີ້ ໂດຍໄດ້ລະບຸວ່າ ເປັນການຈຳກັດປະຊາທິປະໄຕ ຊຶ່ງໃນນັ້ນບົດບັນຍັດຂອງລັດຖະທຳມະນູນ ໄດ້ກຳນົດໃຫ້ມີ ສະມາຊິກວຸດທິສະພາ ທີ່ຖືກແຕ່ງຕັ້ງ ໂດຍການສະຫງວນຕຳແໜ່ງເຫລົ່ານີ້ ໄວ້ໃຫ້ກັບຝ່າຍທະຫານ.

ຕິດຕາມນານາສາລະ ກົດໄລຄ໌ເລີຍ!