ໃນຕອນແລງວັນທີ 04 ສິງຫາ 2016 ທີ່ສະໜາມກີລາໃນຮົ່ມ ບຶງຂະຫຍອງ ນະຄອນຫຼວງວຽງຈັນ ສະຫະພັນກີລາດອກປີກໄກ່ແຫ່ງຊາດລາວ ໄດ້ຈັດການແຂ່ງຂັນຕີດອກປີກໄກ່ທົ່ວປະເທດ ຄັ້ງທີ 16 ຊິງຂັນປະທານສະພາແຫ່ງຊາດຂຶ້ນ ໂດຍການເຂົ້າຮ່ວມຂອງ ທ່ານ ດຣ.ໄຊສົມພອນ ພົມວິຫານ ປະທານສູນກາງແນວລາວສ້າງຊາດ ທ່ານນາງ ສວນສະຫວັນ ວິຍະເກດ ເລຂາທິການສະພາແຫ່ງຊາດ ທ່ານນາງ ພູໄຊ ແພງພົງ ຮອງຫົວໜ້າກົມກີລາລະດັບສູງ ກະຊວງສຶກສາທິການ ແລະ ກີລາ ທ່ານ ດຣ.ສອນທະນູ ທໍາມະວົງ ເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ທ່ານ ທອງຫຼ້າ ແສງວິໄຊ ປະທານສະຫະພັນກີລາດອກປີກໄກ່ແຫ່ງຊາດລາວ ມີລັດຖະມົນຕີ ຮອງລັດຖະມົນຕີຈາກກະຊວງອ້ອມຂ້າງ ຜູ້ຕາງໜ້າພະແນກສຶກສາທິການ ແລະ ກີລານະຄອນຫຼວງ ບັນດາຄູເຝິກ ແລະ ນັກກີລາ ພ້ອມດ້ວຍກອງເຊຍເຂົ້າຮ່ວມເປັນຈໍານວນຫຼາຍ.
ທ່ານ ທອງຫຼ້າ ແສງວິໄຊ ໄດ້ກ່າວເຖິງການແຂ່ງຂັນກີລາດອກປີກໄກ່ຄັ້ງນີ້ວ່າ ລາຍການແຂ່ງຂັນຕີດອກປີກໄກ່ທົ່ວປະເທດ ຄັ້ງທີ 16 ໄດ້ຮັບການອຸປະຖໍາຈາກບໍລິສັດເບຍລາວ ມູນຄ່າຫຼາຍກວ່າ 203 ລ້ານກີບ ເປັນການສ້າງຂະບວນການຄໍານັບຮັບຕ້ອນວັນສ້າງຕັ້ງລັດຖະທໍາມູນຂອງ ສປປ.ລາວ ຄົບຮອບ 25 ປີ ທັງເປັນການ ຄັດ ເລືອກ ແລະ ຈັດລະດັບກີລາແຕ່ລະຮຸ່ນໃຫ້ເຂົ້າລະບົບ ພ້ອມທັງມີການສະສົມຄະແນນຂອງນັກກີລາແຕ່ລະຮຸ່ນ ສໍາລັບການແຂ່ງຂັນປະກອບມີ 9 ລາຍການຄື ຄູ່ເຍົາວະຊົນຊາຍອາຍຸບໍ່ເກີນ 16 ຄູ່ເຍົາວະຊົນຍິງອາຍຸບໍ່ເກີນ 16 ປີ ດ່ຽວຊາຍທົ່ວໄປ ດ່ຽວຍິງທົ່ວໄປ ຄູ່ຊາຍທົ່ວໄປ ຄູ່ຍິງທົ່ວໄປ ຄູ່ປະສົມທົ່ວໄປ ຄູ່ອາວຸໂສຍິງ ອາຍຸ 35 ປີຂຶ້ນໄປ ແລະ ຄູ່ອາວຸໂສຊາຍອາຍຸ 45 ປີຂຶ້ນໄປ ເຊິ່ງມີນັກກີລາຈາກພາກສ່ວນຕ່າງໆໃນຂອບເຂດທົ່ວປະເທດເຂົ້າຮ່ວມຫຼາຍກວ່າ 300 ຄົນ ໃນນັ້ນມີນັກກີລາເພດຊາຍ 273 ຄົນ ຍິງ 62 ຄົນ ຈາກ 10 ແຂວງ 1 ນະຄອນ ແລະ 23 ສະໂມສອນ ຈາກນະຄອນຫຼວງວຽງຈັນ ໂດຍຈະໃຊ້ເວລາແຂ່ງຂັນ 4 ວັນຈິ່ງຈະສໍາເລັດ.
ຂ່າວຈາກ: http://www.vtetoday.la/