ເນື່ອງຈາກຝົນຕົກໜັກຕິດຕໍ່ກັນຫຼາຍວັນຢູ່ແຂວງບໍລິຄຳໄຊ ໄດ້ເຮັດໃຫ້ນ້ຳຊັນຂຶ້ນຢ່າງໄວວາຖ້ວມບ້ານເຮືອນຂອງປະຊາຊົນພາຍໃນເທສະບານເມືອງບໍລິຄັນຈຳນວນໜຶ່ງທີ່ຢູ່ລຽບຕາມແຄມນ້ຳຊັນຕໍ່ກັບສະພາບດັ່ງກ່າວດ້ວຍຄວາມເປັນຫ່ວງຂອງອຳນາດການປົກຄອງແຂວງທີ່ມີຕໍ່ພໍ່ແມ່ປະຊາຊົນບັນດາເຜົ່າ ໃນວັນທີ 15 ກໍລະກົດຜ່ານມາ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ ພ້ອມດ້ວຍພະແນກການທີ່ກ່ຽວຂ້ອງໄດ້ລົງຕິດຕາມກວດກາສະພາບນ້ຳຖ້ວມຢູ່ເຂດດັ່ງກ່າວ ໂດຍການຮ່ວມນຳພາຂອງທ່ານ ເລື່ອນວິໄລ ຈັນທະລາພັນ ເຈົ້າເມືອງໆບໍລິຄັນພ້ອມດ້ວຍອຳນາດການປົກຄອງ ແລະໜ່ວຍງານທີ່ກ່ຽວຂ້ອງຂອງເມືອງ.
ໂອກາດນີ້ທ່ານ ເຈົ້າແຂວງໄດ້ແນະນຳໃຫ້ທຸກພາກສ່ວນພາຍໃນເມືອງຈົ່ງຮ່ວມມືເອົາໃຈໃສ່ເຝົ້າລະວັງຢ່າງຈົດຈໍ່, ເປັນຕົ້ນແມ່ນໃຫ້ມີຄວາມສາມັກຄີຊ່ວຍເຫຼືອເຊິ່ງກັນ ແລະກັນຍົກຍ້າຍສິ່ງຂອງອັນຈຳເປັນຂຶ້ນໄວ້ທີ່ສູງ, ກຽມພ້ອມຮັບມືກັບພະຍາດຕາມລະດູການທີ່ຕາມມາຫຼັງນ້ຳບົກແຫ້ງ ສະຫຼຸບລາຍງານຜົນເສຍຫາຍຈາກໄພນ້ຳຖ້ວມ ໂດຍສະເພາະ ເນື້ອທີ່ທຳການຜະລິດ, ດູແລເບິ່ງແຍງຄອບຄົວທີ່ໄດ້ຮັບຜົນກະທົບຈາກໄພນ້ຳຖ້ວມໃຫ້ທັນການ.
ພ້ອມນີ້ທ່ານເຈົ້າແຂວງ ຍັງຮຽກຮ້ອງມາຍັງທຸກພາກສ່ວນໃນສັງຄົມຈົ່ງໄດ້ມີຄວາມຊ່ວຍເຫຼືອເຊິ່ງກັນ ແລະກັນທາງ ດ້ານເຫື່ອແຮງ ແລະວັດຖຸປັດໄຈຕ່າງໆ ໃຫ້ຫຼຸດພົ້ນໄພພິບັດທຳມະຊາດໃນຄັ້ງນີ້ ເນື່ອງຈາກວ່າເມືອງບໍລິຄັນກໍ່ເປັນເມືອງໜຶ່ງທີ່ເຄີຍປະສົບກັບໄພນ້ຳຖ້ວມເກືອບທຸກໆປີເຮັດໃຫ້ເຮືອນຊານບ້ານຊ່ອງ, ສັດລ້ຽງ ແລະເນື້ອທີ່ທຳການຜະລິດຂອງປະຊາຊົນບັນດາເຜົ່າໄດ້ຮັບການເສຍຫາຍຢ່າງໜັກໜ່ວງ.
ໃນຕອນແລງຂອງວັນດຽວກັນ ທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊກໍ່ໄດ້ປະຊຸມດ່ວນກັບພະແນກການກົມກອງທີ່ກ່ຽວຂ້ອງເພື່ອຫາວິທີຮັບມືກັບ ໄພນ້ຳຖ້ວມທີ່ເກີດຂຶ້ນໃນຄັ້ງນີ້ທີ່ຫ້ອງວ່າການປົກຄອງແຂວງບໍລິຄຳໄຊ.
ທີ່ມາ: ເສດຖະກິດ-ສັງຄົມ