ອີງຕາມຂ່າວຈາກສຳນັກຂ່າວອອນໄລນ໌ໜອງຄາຍ ລາຍງານວ່າ ວັນທີ 15 ກໍລະກົດ 2016 ວານນີ້ ຕຳຫຼວດຊາຍແດນໜອງຄາຍ ໄດ້ຮ່ວມກັນຈັບກຸມນາງນ້ອຍ ຫຼື ແອ ດວງມາລາ ອາຍຸ 38 ປີ ແລະນາງ ສາຍຝົນ ຊື່ນຊົມ ອາຍຸ 43 ປີ ທັງສອງເປັນປະຊາຊົນບ້ານໂດນ ເມືອງປາກງື່ມ ນະຄອນຫຼວງວຽງຈັນ ພ້ອມຂອງກາງຢາບ້າ 1,912 ເມັດ ໂທລະສັບມືຖື 2 ໜ່ວຍ ກະເປົາພາຍ 2 ໜ່ວຍ ບັດຜ່ານແດນ 2 ຫົວ ໂດຍກ່າວຫາວ່າຮ່ວມກັນມີຢາເສບຕິດ (ຢາບ້າ) ໄວ້ໃນຄອບຄອງເພື່ອຈຳໜ່າຍໂດຍຜິດກົດໝາຍ ເຫດເກີດພາຍໃນຫ້ອງພັກໝາຍເລກທີ 8 ບ້ານບົວທອງລີສອດ ຕຳບົນໜອງກອມເກາະ ອຳເພີເມືອງໜອງຄາຍ ຈັງຫວັດໜອງຄາຍ.
ພາຍຫຼັງຈັບກຸມແລ້ວກໍໄດ້ນຳໂຕຜູ້ຕ້ອງຫາພ້ອມຂອງກາງ ສົ່ງພະນັກງານສືບສວນສອບສວນ ເມືອງໜອງຄາຍ ດຳເນີນຄະດີຕໍ່ໄປ.