ຂປລ. ບັນດາ​ໂຮງຮຽນ​ພາກ​ລັດ-​ເອກະ​ຊົນ ​​ເປີດ​ສອນ​ບໍາລຸງ​​ໄລຍະ​ສັ້ນ​ ໃຫ້​ແກ່​ນັກຮຽນ​-ນັກ​ສຶກສາ​ຢ່າງ​ເປັນ​ຂະ​ບວນ ເພື່ອ​ເພີ່ມ​ທັກ​ສະ ​ແລະ ​ເພີ່ມຄວາມ​ຮູ້​ ພາຍຫລັງ​ປິດ​ພາກຮຽນ ຂະນະ​ທີ່ພໍ່​ແມ່​-ຜູ້​ປົກຄອງ ສະ​ແດງ​ຄວາມ​ເຫັນ​ວ່າ ການ​ເປີດ​ສອນ​ຮຽນ​ບໍາລຸງ​ໃຫ້​ລູກ​ຫລານ ​ເປັນ​ສິ່ງ​ທີ່​ດີເຮັດ​ໃຫ້​ເຂົາ​ເຈົ້າ​ ໃຊ້​ເວລາ​ຫວ່າ​ງໃຫ້​ເປັນ​ປະ​ໂຫຍ​ດ, ຮັກ​ການ​ຮຽນ ​ແລະ ​ເພີ່ມທັກສະການ​ອ່ານ​ຫລາຍ​ຂຶ້ນ.​ ແຕ່​ກໍ​ຄວນ​ໃຫ້​ພາກສ່ວນ​ກ່ຽວຂ້ອງ​ ເບິ່ງ​ຄືນຕື່ມ​ວ່າ ​ຄ່າ​ຮຽນບໍາລຸງ(ຮຽນ​ເພີ່ມ) ​ໃນ​ຍາມ​ພັກ​ແລ້ງ​ ບໍ່​ມີ​ຄວາມ​ເປັນ​ເອກະ​ພາບກັນ.

ອາທິດ​ຜ່ານ​ມາ​ນີ້, ພໍ່​ແມ່​-ຜູ້​ປົກຄອງ ​ນັກຮຽນ​-ນັກ​ສຶກສາ​ ​ເປີດ​ເຜີຍ​ຕໍ່​ນັກ​ຂ່າວ​ວ່າ: ​ສະ​ແດງ​ຄວາມ​ຊົມ​ເຊີຍ​ຕໍ່ຫລາຍ​ສະຖາບັນ​ການ​ສຶກສາ​ ທີ່ພວມ​ເປີດ​ການ​ຮຽນ​ການ​ສອນ​ບໍາລຸງ​ໄລຍະ​ສັ້ນ ​ຮອງ​ຮັບ​ນັກຮຽນ​ທີ່​ສົນ​ໃຈ​ເຂົ້າ​ມາ​ຮຽນ​​​ໃນ​ຍາມ​ພັກ​ແລ້ງ ​ເພີ່ມ​ຄວາມ​ຮູ້​ຄວາມ​ສາມາດ ​ແລະ ທັດສະນະແນວ​ຄິດ​ ໃຫ້​ມັກ​ອ່ານ​ມັກ​ຂຽນ ນອກຈາກ​ນັ້ນ, ​ຍັງ​ເປັນ​ການສົ່ງ​ເສີມ​ໃຫ້​ນັກ​ຮຽນນັກ​ສຶກສາ ​​ໃຊ້​ເວລາ​ໃຫ້​​​ເປັນ​ປະ​ໂຫຍ​ດ. ແຕ່​ແນວ​ໃດ​ກໍ​ດີ ປັດຈຸ​ບັນ​ ເຫັນ​ວ່າພໍ່​ແມ່​-ຜູ້​ປົກຄອງ ​ພວມປະ​ເຊີນ​ກັບຄ່າ​ຮຽນ​ເພີ່ມສູງ​ຂຶ້ນ ​ໃນ​ນັ້ນ​ມີ​ບາງ​ໂຮງຮຽນ​​ກໍ​ເກັບ 200,000 ກີບ​ຕໍ່​ເດືອນ, ບາງ​ໂຮງຮຽນ​ກໍ​ເກັບ 350.000 ກີບຕໍ່​ເດືອນ ​ແລະ 400,000 ກີບຕໍ່​ເດືອນ​ ບໍ່​ມີ​ຄວາມ​ເປັນ​ເອກະ​ພາບ​ກັນ. ສະ​ນັ້ນ​, ຢາກ​​ໃຫ້​ພາກສ່ວນ​ກ່ຽວຂ້ອງ ​ເອົາ​ໃຈ​ໃສ່ ​ແລະ ກໍານົດ​ຄ່າ​ຮຽນ​ເພີ່ມ​ໃນ​ຍາມ​ພັກ​ແລ້ງ​ ຢູ່​ປະມານ​ເທົ່າ​ໃດ​ເພື່ອ​ຮັບປະກັນ​ໃຫ້​ລູກ​ຫລານ​ ​ໂດຍ​ສະ​ເພາະ​ຜູ້​ມີ​ລາຍ​ຮັບ​ໜ້ອຍ​ ສາມາດ​ເຂົ້າ​​ຮຽນ​ໄດ້.

ອາຈານ ສູນທະລາ​ພອນ ຫົວໜ້າສູນ​ບຳລຸງວິຊາ​ເລກ, ຟີ​ຊິກສາດ ​ແລະ ​ເຄມີສາດ ​ໄດ້​ໃຫ້​ຮູ້ວ່າ: ສູນ​ດັ່ງກ່າວ, ​ໄດ້​ເປີດ​ສອນ​ບຳລຸງຢູ່ 3 ວິຊາ ​ຄື: ​ຄະນິດສາດ, ຟີ​ຊິກ​ສາດ, ​ເຄມີ​ສາດ ​​​ສອນແຕ່ ​ມ1 ຫາ ມ7 ​ນອກ​ນັ້ນ​, ຍັງສອນ​ບຳລຸງ​ໃຫ້​ນັກຮຽນ ມ7 ທີ່ກຽມ​ຈະ​ເສັງເຂົ້າມະຫາ​ວິທະຍາ​ໄລ​ ດ້ວຍ​​ເນັ້ນ​ໃສ່ຫລັກ​ສູດ​ການ​ສອນ​ ທີ່​ມີ​ຄຸນ​ນະພາ​ບ ​​​​ໂດຍ​ໄດ້ຄັດເລືອກ​ເອົາ​ຕຳລາ​ຮຽນທີ່​ສຳຄັນ ຂອງ​ລາວ, ​ໄທ, ຫວຽດນາມ ​ແລະ ຈີນ ມາ​ເສີມ​ເຂົ້າກັນ​ເປັນ​ຫລັກສູດ ​ເຮັດ​ໃຫ້ນັກຮຽນຈື່​ງ່າຍ ​ເຂົ້າ​ໃຈ​ໄວ ​ເມື່ອ​ໄປ​ຮຽນຕົວ​ຈິງ​ ຈະເຮັດ​ໃຫ້ນັກຮຽນ​ທີ່​ຈົບ​ຈາກ​ສູນ​ດັ່ງກ່າວ ຮຽນ​ເກັ່ງ​ຂຶ້ນ. ​ແຕ່​​​ເຖິງ​ຢ່າງ​ໃດ​ກໍ​ຕາມ​ເຫັນ​ວ່າ ຄ່າ​ຮຽນຍັງ​ໃນ​ຢູ່​ລະດັບ​ຂ້ອນ​ຂ້າງ​ສູງ​ ເຊິ່ງຕົກ​ 370.000 ກີບ​/​ເດືອນ​.

ທ້າວ ກູ່​ມິ​ງ ອາຍຸ 17 ປີ ນັກຮຽນ ມສ ວຽງຈັນ ຊັ້ນ ມ7 ​ແລະ ນາງ ປັນຍາ ຕຸລາ​ກຸນ ອາຍຸ 16 ປີ. ນັກຮຽນ ມສ ​ໂພນໜີ ​ແຂວງ​ວຽງຈັນ ຊັ້ນ ​ມ7. ທັງ​ສອງ​ນ້ອງ​ໄດ້​ເວົ້າ​ເປັນສຽງດຽວກັນ​ວ່າ ຫລັງ​ຈາກ​ທີ່​ຮຽນມາ​ໄດ້​​ໄລຍະໜຶ່ງ ກໍ​ເຫັນ​ວ່າ​ຕົນ​ເອງ​ມີ​ຄວາມ​ເຂົ້າ​ໃຈ​ຫລາຍ​ຂຶ້ນ ​ແລະ ​ເຊື້ອວ່າ​​ ເມື່ອກັບ​ໄປ​ຮຽນຕົວ​ຈິງ ຕົນ​ຈະ​ສາມາດ​ຮຽນ​ໄດ້​ດີ​ຂຶ້ນ​ກວ່າ​ເກົ່າ.​​​ ເຖິງ​ແນວ​ໃດ​ກໍ​ດີ ການ​ຮຽນ​​ເພີ່ມໃນ​​ໄລຍະພັກ​ແລ້ງ ກໍ​ເປັນ​ສິ່ງ​ທີ່​ດີ ນອກຈາກ​ຈະ​ໄດ້​ຄວາມ​ຮູ້​​ ມາພັດທະນາ​ຕົນ​ເອງ​ໃຫ້​ກາຍ​ເປັນ​ຄົນຮຽນ​ເກັ່ງ ທັງເປັນ​ການ​ໃຊ້​ເວລາ​ວາງ​ໃຫ້​ເປັນ​ປະ​ໂຫຍ​ດອີກ​ດ້ວຍ.

ແຫລ່ງຂ່າວ:

ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!