ກອງປະຊຸມລັດຖະບານຮ່ວມກັບ ເຈົ້າຄອງນະຄອນຫຼວງວຽງຈັນ ແລະ ເຈົ້າແຂວງໃນທົ່ວປະເທດໄດ້ໄຂຂຶ້ນໃນ ວັນທີ 23-24 ມິຖຸນາ 2016, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ, ສະມາຊິກ ລັດຖະບານ, ເຈົ້າຄອງນະຄອນຫຼວງວຽງຈັນ ແລະບັນດາທ່ານເຈົ້າແຂວງເຂົ້າຮ່ວມຢ່າງຄົບຖ້ວນ. ກອງປະຊຸມຄັ້ງນີ້ມີຄວາມໝາຍຄວາມ ສຳຄັນທີ່ສຸດເພາະເປັນກອງປະຊຸມເປີດກວ້າງລະຫວ່າງລັດຖະບານ ຊຸດທີ 8 ຮ່ວມ ກັບເຈົ້າຄອງນະຄອນຫຼວງວຽງຈັນ ແລະທ່ານເຈົ້າແຂວງໃນທົ່ວປະເທດ.
ໂດຍຜູ້ເຂົ້າຮ່ວມໄດ້ພ້ອມກັນສຸມໃສ່ປຶກສາຫາລືຕົກລົງກ່ຽວກັບວຽກງານຈຸດສຸມ ແລະຮີບດ່ວນຂອງລັດຖະບານ ເປັນຕົ້ນ: (1). ການສະຫຼຸບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາ 6 ເດືອນຕົ້ນ ແລະທິດທາງທ້າຍສົກປີ 2015-
2016; (2). ມາດຕະການເກັບລາຍຮັບ 3 ເດືອນທ້າຍປີ ແລະ3 ເດືອນ ໄລຍະຂ້າມຜ່ານ; (3). ສະພາບການເບີກຈ່າຍ ເງິນເດືອນ; (4). ແຜນການແກ້ໄຂສະພາບຄ່ອງດ້ານການເງິນ ແລະຟື້ນຟູລະ ບົບການຜະລິດ-ທຸລະກິດສະເພາະໜ້າ ແລະ ຍາວນານ; (5). ການກະກຽມສ້າງແຜນການ-ການເງິນສົກປີ 2017; (6). ການປະຕິບັດ ແລະຜັນຂະຫຍາຍຄຳສັ່ງເລກທີ 15/ນຍ, ລົງວັນທີ 13 ພຶດສະພາ 2016 ກ່ຽວກັບການຄຸ້ມຄອງການຂຸດຄົ້ນ ແລະທຸລະກິດໄມ້ ແລະ (7). ຮ່າງຄຳສັ່ງວ່າດ້ວຍທິດທາງ, ເປົ້າໝາຍ ແລະມາດຕະການສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະສ້າງບ້ານເປັນຫົວໜ່ວຍພັດທະນາ.
ຜ່ານການລາຍງານຂອງຂະແໜງການທີ່ກ່ຽວຂ້ອງ ເຫັນວ່າການຈັດຕັ້ງປະຕິບັດ ໃນ 6 ເດືອນຕົ້ນສົກປີຜ່ານມາໄດ້ມີຜົນ ສຳເລັດໃນຫຼາຍດ້ານ, ປະເທດຊາດສືບຕໍ່ ມີສະຖຽນລະພາບໝັ້ນຄົງ, ເສດຖະກິດ ມະຫາພາກຍັງມີຄວາມໝັ້ນທ່ຽງ ແລະສືບຕໍ່ຂະຫຍາຍຕົວ, ການລົງທຶນພາຍໃນແລະຕ່າງປະເທດ ຍັງຢູ່ໃນບັນຍາກາດທີ່ດີ, ຂົງເຂດການຜະລິດກໍ່ມີຫຼາຍວຽກທີ່ ພົ້ນເດັ່ນ, ຕໍ່ວັດຖຸ ແລະຊີວິດຈິດໃຈຂອງປະຊາຊົນບັນດາເຜົ່າສືບຕໍ່ໄດ້ຮັບການຍົກສູງຂຶ້ນບັນດາວຽກງານຈຸດສຸມທັງໝົດທີ່ກ່າວມານັ້ນກອງປະຊຸມໄດ້ປຶກສາຫາລື ແລະປະກອບຄຳເຫັນດ້ວຍຄວາມຮັບຜິດຊອບ ແລະ ເຫັນດີເປັນເອກະພາບຮັບຮອງເອົາມາດຕະການ ແລະວິທີການແກ້ໄຂໃນຕໍ່ໜ້າ. ພ້ອມນັ້ນ ທ່ານນາຍົກລັດຖະ ມົນຕີ ຍັງໄດ້ຊີ້ນຳໃຫ້ຂະແໜງການຕ່າງໆຢູ່ສູນກາງ ແລະບັນດາແຂວງນຳໄປ ຈັດຕັ້ງປະຕິບັດດ້ວຍຄວາມຮັບຜິດຊອບຕາມບັນດາໜ້າວຽກທີ່ກ່າວມານັ້ນ ຄື: 1) ໃຫ້ຂະແໜງການກ່ຽວຂ້ອງສົມທົບເຊິ່ງກັນ ແລະກັນ ຈັດລຽງບຸລິມະສິດວຽກໃດຄວນເຮັດກ່ອນ-ເຮັດຫຼັງ ເພື່ອຈະໄດ້ສຸມທຶນຮອນໃສ່ ແລະມອບໃຫ້ຖະຊວງແຜນການ ແລະການລົງທຶນປະສານສົມທົບກັບພາກສ່ວນທີ່ກ່ຽວຂ້ອງກວດກາຄືນບັນດາໂຄງການທີ່ບໍ່ມີປະສິດທິຜົນ ແລະ ໂຄງການທີ່ບໍ່ນອນໃນແຜນ;2) ມອບໃຫ້ກະຊວງອຸດສາຫະກຳ ແລະການຄ້າຊອກຕະຫຼາດ ເພື່ອຮອງຮັບການຜະລິດສິນຄ້າ ຂອງປະຊາຊົນ. ພ້ອມດຽວກັນນັ້ນ ກໍໃຫ້ຄົ້ນຄວ້າດັດສົມລາຄາສິນຄ້າຕາມທ້ອງຕະຫຼາດ ລວມທັງໃຫ້ຕິດສະແຕມລາຄາ ສິນຄ້ານຳເຂົ້າມາບໍລິໂພກເປັນພາສາ ລາວ;3) ເພີ່ມທະວີການຄຸ້ມຄອງ, ກວດກາບັນດາໂຄງການຢ່າງເຂັ້ມງວດ ພ້ອມທັງການລົງທຶນຕ້ອງແບ່ງຄວາມຮັບຜິດຊອບໃຫ້ຈະແຈ້ງເປັນຕົ້ນແມ່ນພາກສ່ວນ ໃດອານຸຍາດແມ່ນພາກສ່ວນນັ້ນຕ້ອງ ຮັບຜິດຊອບໃນການຊຳລະສະສາງ; 4)ສຳລັບທະນາຄານຕ້ອງຄວບຄຸມອັດຕາເງິນເຟີ້, ອັດຕາດອກເບ້ຍ ແລະການປ່ອຍເງິນກູ້ຕ້ອງໄດ້ມີການກວດກາປະເມີນ ວ່າເປັນໂຄງການທີ່ມີປະສິດທິຜົນ ຫຼື ບໍ່; 5) ເຫັນດີການເກັບພາສີ-ອາກອນ, ອາກອນມູນຄ່າເພີ່ມໃຫ້ນຳໃຊ້ລະບົບທີ່ທັນສະໄໝ. ໃນເວລາດຽວກັນນັ້ນ ຄຽງຄູ່ກັບການເອົາເຂົ້າລະບຽບຫຼັກການຢ່າງເຂັ້ມງວດແລ້ວມອບໃຫ້ກະຊວງການເງິນສົມທົບກັບພາກສ່ວນກ່ຽວຂ້ອງຈັດຕັ້ງ ພະນັກງານລົງເດີນສຳຫຼວດເກັບກຳຂໍ້ມູນບັນດາຫົວໜ່ວຍທຸລະກິດທີ່ເປັນຖານລາຍຮັບທົ່ວປະເທດ. 6)ການເກັບພາສີ ຫຼື ຍົກເວັ້ນພາສີແມ່ນໃຫ້ປະຕິບັດຕາມລະບຽບກົດໝາຍທີ່ໄດ້ວາງອອກຢ່າງເຂັ້ມງວດ. 7) ມອບໃຫ້ກະຊວງຊັບພະຍາກອນທຳມະຊາດ ແລະສິ່ງແວດລ້ອມ ສົມທົບກັບ ກະຊວງການເງິນຄົ້ນຄວ້າກົນໄກ, ວິໄຈການເກັບພາສີທີ່ດິນ (ການຂາຍ-ການ ໂອນກຳມະສິດ) 8)ຊຸກຍູ້ການຜະລິດເປັນສິນຄ້າ ແລະການທ່ອງທ່ຽວ ໂດຍການ ລົງທຶນໂດຍກົງຂອງນັກລົງທຶນທັງພາຍ ໃນ ແລະຕ່າງປະເທດ; 9)ມອບໃຫ້ກະຊວງພະລັງງານ ແລະບໍ່ແຮ່ຄົ້ນຄວ້າ, ເຈລະຈາ ແລະຄວບຄຸມລາຄາບໍ່ໃຫ້ຕົ້ນ ທຶນສູງຫຼາຍໃນການກໍ່ສ້າງ;10) ມອບໃຫ້ກະຊວງໂຍທາທິການ ແລະຂົນສົ່ງສົມທົບກັບກະຊວງປ້ອງກັນຄວາມສະ ຫງົບກວດກາຄືນບັນດາຮ້ານ ແລະການ ນຳເຂົ້າລົດທີ່ບໍ່ຖືກຕ້ອງຕາມກົດໝາຍ; 11)ກະຊວງການເງິນຕ້ອງຮັບປະກັນໃຫ້ມີເງິນເບີກຈ່າຍເງິນເດືອນໃຫ້ພະນັກງານ, ທະຫານ, ຕຳຫຼວດ ລວມທັງພະ ນັກງານບຳນານ ເດືອນໃດເດືອນນັ້ນ ໂດຍສົມທົບກັບກະຊວງພາຍໃນ ດ້ານຈຳນວນພົນ ແລະໃຫ້ນຳໃຊ້ລະບົບຄຸ້ມຄອງພະນັກງານແບບທັນສະໄໝ (PMIS). ທຸກໆກະຊວງ ແລະທ້ອງຖິ່ນຕ້ອງປະຕິບັດຢ່າງເຂັ້ມງວດລະບຽບ, ຂັ້ນຕອນຂອງການເບີກຈ່າຍເງິນເດືອນ ເພື່ອເຮັດໃຫ້ການເບີກຈ່າຍເງິນເດືອນຄົບຖ້ວນ, ທັນເວລາ.
ກ່ຽວກັບການຈັດຕັ້ງປະຕິບັດຄຳສັ່ງສະບັບເລກທີ 15/ນຍ, ລົງວັນທີ 13 ພຶດສະພາ 2016 ວ່າດ້ວຍການເພີ່ມທະວີ ຄວາມເຂັ້ມງວດໃນການຄຸ້ມຄອງ ແລະ ກວດກາການຂຸດຄົ້ນໄມ້ ແລະ ທຸລະກິດໄມ້ ນັ້ນກອງປະຊຸມໄດ້ຕີລາຄາວ່າ: ທຸກຂະແໜງການ, ອົງການລັດທຽບເທົ່າກະ ຊວງ ເຈົ້າຄອງນະຄອນ ແລະບັນດາເຈົ້າແຂວງທົ່ວປະເທດໄດ້ເອົາໃຈໃສ່ຜັນຂະ ຫຍາຍເປັນຢ່າງດີ ແລະໄດ້ຮັບການສະ ໜັບສະໜູນຢ່າງກວ້າງຂວາງ ໃນທົ່ວສັງຄົມ. ຜ່ານການປຶກສາຫາລືກອງປະຊຸມ ໄດ້ເຫັນດີເປັນເອກະພາບກັນໃນການຈັດຕັ້ງປະຕິບັດຄື: 1. ໃຫ້ທຸກພາກສ່ວນແຕ່ສູນກາງຮອດທ້ອງຖິ່ນສືບຕໍ່ຈັດຕັ້ງປະຕິບັດຄຳສັ່ງ ເລກທີ 15/ນຍ ຢ່າງເຂັ້ມ ງວດ ແລະມີຜົນສັກສິດ, ພິຈາລະນາແກ້ໄຂປະກົດການລະເມີດຕ່າງໆຢ່າງເດັດ ຂາດ ຕາມກົດໝາຍ ແລະລະບຽບການ. ສິ່ງສຳຄັນ ແມ່ນຕ້ອງສຶກສາອົບຮົມປະ ຊາຊົນບັນດາເຜົ່າ ແລະຜູ້ປະກອບການ ໃຫ້ຕື່ນຕົວເຂົ້າຮ່ວມປະຕິບັດ. ຕ້ອງຢຸດຕິການສົ່ງໄມ້ອອກທີ່ບໍ່ໄດ້ປຸງແຕ່ງເປັນຜະລິດຕະພັນສຳເລັດຮູບ ແລະຢຸດຕິການຄົ້ນ
ໄມ້ຢ່າງຂາດຕົວ ແລະເດັດຂາດບໍ່ມີໂກ້ຕ້າໄມ້ຕື່ມອີກ. 2.ໃຫ້ກະຊວງກະສິກຳ ແລະ ປ່າໄມ້ສົມທົບກັບກະຊວງອຸດສາຫະກຳ ແລະການຄ້າຄົ້ນຄວ້າອອກນິຕິກຳ, ນະໂຍບາຍ ແລະລະບຽບການຕ່າງໆທີ່ກ່ຽວ ຂ້ອງກັບການຊຸກຍູ້ສົ່ງເສີມການຜະລິດພາຍໃນ, ການປູກໄມ້, ທຸລະກິດໄມ້ປູກ ແລະການກຳນົດລາຍການໄມ້ປູກເພື່ອທີ່ ຈະສົ່ງອອກ ຢ່າງລະອຽດ ແລະຮັດກຸມ. 3. ໃຫ້ກະຊວງອຸດສາຫະກຳ ແລະການຄ້າສົມທົບກັບສະມາຄົມປຸງແຕ່ງໄມ້ ແລະ ພາກສ່ວນທີ່ກ່ຽວຂ້ອງ ເພື່ອລົງເລິກເອົາ ໃຈໃສ່ໃນການປັບປຸງບັນດາໂຮງງານປຸງແຕ່ງໄມ້ ແລະ ສີມືແຮງງານໃຫ້ໄດ້ມາດ ຕະຖານ, ຮອງຮັບບໍລິມາດໄມ້ທີ່ຂຸດຄົ້ນ ຈາກເຂດອະນຸຍາດ ຫຼື ໄມ້ສວນປູກ, ພ້ອມດຽວກັນນັ້ນກໍຕ້ອງໄດ້ຄຸ້ມຄອງລາຄາໄມ້ປູກບໍ່ໃຫ້ຕ່ຳເກີນໄປ.
ກ່ຽວກັບວຽກງານ 3 ສ້າງ ກອງປະຊຸມເຫັນດີມອບໃຫ້ທ່ານນາຍົກລັດຖະມົນຕີ ອອກຄຳສັ່ງເພື່ອຜັນຂະຫຍາຍຜົນສຳເລັດຂອງການເຮັດທົດລອງໃນໄລຍະທີ່ຜ່ານມາ ແລະມະຕິກົມການເມືອງສູນກາງພັກ ສະບັບເລກທີ 25/ກມສພ, ລົງວັນທີ 22 ທັນວາ 2014 ກ່ຽວກັບທິດທາງ, ເປົ້າໝາຍ ແລະມາດຕະການສ້າງແຂວງ ເປັນຫົວໜ່ວຍຍຸດທະສາດ, ສ້າງເມືອງ ເປັນຫົວໜ່ວຍເຂັ້ມແຂງຮອບດ້ານ, ສ້າງ ບ້ານເປັນຫົວໜ່ວຍພັດທະນາ.
ໃນຕອນທ້າຍກອງປະຊຸມ, ທ່ານນາຍົກລັດຖະມົນຕີ ໄດ້ຊີ້ນຳໃຫ້ສະມາຊິກລັດຖະບານ, ເຈົ້າຄອງນະຄອນຫຼວງວຽງຈັນ ແລະບັນດາເຈົ້າແຂວງ ຈົ່ງນຳເອົາ ເນື້ອໃນຈິດໃຈທີ່ໄດ້ຕົກລົງເປັນເອກະພາບ ໃນກອງປະຊຸມຄັ້ງນີ້ ລວມທັງບັນດາວຽກງານທີ່ເປັນຈຸດສຸມໃນເດືອນກໍລະ ກົດ 2016 ໄປຈັດຕັ້ງຜັນຂະຫຍາຍ ແລະ ຈັດຕັ້ງປະຕິບັດດ້ວຍຄວາມຮັບຜິດຊອບສູງ.
ທີ່ມາ: 