ອຳນາດການປົກຄອງ ແຂວງຈຳປາສັກ ໄດ້ອະນຸຍາດໃຫ້ບໍລິສັດນັກລົງທຶນເກົາຫຼີເຂົ້າມາສຶກສາສຳຫຼວດຄວາມເປັນໄປໄດ້ໂຄງການປັບປຸງຟື້ນຟູທາງລົດໄຟເກົ່າ ແລະການທ່ອງທ່ຽວໃນເຂດບ້ານຄອນດອນເດດ ເມືອງໂຂງ ຊຶ່ງເປັນອີກໜຶ່ງໂຄງການຍຸດທະສາດທີ່ສຳຄັນຂອງແຂວງຈຳປາສັກ.
ພິທີລົງນາມເຊັນບົດບັນທຶກຄວາມເຂົ້າໃຈລະຫວ່າງແຂວງຈຳປາສັກກັບບໍລິສັດຜູ້ສຶກສາສຳຫຼວດຄວາມເປັນໄປໄດ້ດັ່ງກ່າວ, ໄດ້ມີຂຶ້ນໃນລະຫວ່າງວັນທີ 10 ມິຖຸນາ 2016 ຜ່ານມາ, ທີ່ໂຮງແຮມຈຳປາສັກແກຣນ ເມືອງປາກເຊ ແຂວງຈຳປາສັກ, ໂດຍຕາງໜ້າລົງນາມໃຫ້ແກ່ອຳນາດການປົກຄອງແຂວງແມ່ນທ່ານ ສາຍທອງ ໄຊຍະວົງ ຫົວໜ້າພະແນກແຜນການ ແລະການລົງທຶນແຂວງກັບທ່ານ ຈອຍ ເຊອົງສິກ ຜູ້ອຳນວຍການບໍລິສັດທ່ອງທ່ຽວ FTI ຈຳກັດ, ເຂົ້າຮ່ວມເປັນສັກຂີພິຍານໂດຍ ທ່ານ ບຸນຖອງ ດີວິໄຊ ເຈົ້າແຂວງໆຈຳປາສັກ, ມີບັນດາການນຳພະແນກການ ແລະເມືອງກ່ຽວຂ້ອງເຂົ້າຮ່ວມ.
ການສຶກສາສຳຫຼວດຄວາມເປັນໄປໄດ້ໃນການປັບປຸງຟື້ນຟູທາງລົດໄຟເກົ່າ ເພື່ອການທ່ອງທ່ຽວໃນນເຂດບ້ານ ຄອນດອນເດດ ແມ່ນເລັ່ງໃສ່ເຮັດໃຫ້ສະຖານທີ່ທ່ອງທ່ຽວທີ່ເປັນປະຫວັດສາດ ເຊັ່ນ: ທາງລົດໄຟເກົ່າ ຊຶ່ງໄດ້ສ້າງຂຶ້ນໃນສະໄໝຝຣັ່ງປົກຄອງໃຫ້ໄດ້ຮັບການປັບປຸງ, ຟື້ນຟູ ເພື່ອຮັບໃຊ້ໃຫ້ແກ່ການທ່ອງທ່ຽວ, ນອກຈາກນີ້ ແມ່ນຈະໄດ້ມີການປັບປຸງ ແລະກໍ່ສ້າງສະຖານທີ່ຮັບຮອງການບໍລິການທ່ອງທ່ຽວ, ເປັນຕົ້ນແມ່ນເຮືອນພັກ-ໂຮງແຮມ, ຮ້ານອາຫານ, ສວນດອກໄມ້, ສະຖານທີ່ຊົມປາຂ່າ, ເຮືອເພື່ອບໍລິການ ແລະສິ່ງອຳນວຍຄວາມສະດວກດ້ານຕ່າງໆ, ຊຶ່ງບັນດາກິດຈະກຳທັງໝົດແມ່ນນອນໃນພື້ນທີ່ 60 ເຮັກຕາ ແລະມີອະນຸການສຳປະທານໃນໄລຍະເວລາ 30 ປີ.
ທີ່ມາ: 