ອີງຕາມການລາຍງານຂ່າວຂອງ ສຳນັກຂ່າວສານປະເທດລາວໃຫ້ຮູ້ວ່າ ກະຊວງສຶກສາ ແລະກິລາ ຈະອະນຸຍາດໃຫ້ສະຖາບັນການສຶກສາລະດັບຊັ້ນສູງ ຫຼືວິທະຍາໄລ ທັງພາກລັດແລະພາກເອກະຊົນ ສາມາດເປີດຫຼັກສູດການຮຽນ-ການສອນໃນລະດັບປະລິນຍາຕີໄດ້ ໃນສົກການສຶກສາ 2016-2017 ນີ້ ໃນຂະນະທີ່ຈະອະນຸຍາດໃຫ້ ສະຖາບັນການສຶກສາພາກເອກະຊົນ ສ້າງຕັ້ງເປັນມະຫາວິທະຍາໄລໄດ້ພາຍໃນປີ 2020.
ພາຍຫຼັງທີ່ໃນຫຼາຍປີທີ່ຜ່ານມາ ໄດ້ເກີດສະພາບຄວາມເຫຼືອບໍ່ພໍຂອງບຸກຄະລາກອນ ທີ່ຈະບັນຈຸເຂົ້າໃສ່ໜ້າວຽກໃນຂົງເຂດຕ່າງໆ ໃນຂະນະທີ່ສະຖາບັນການສຶກສາລະດັບຊັ້ນສູງຂຶ້ນໄປຈະມີຄົນສະໝັກເຂົ້າຮຽນຫຼາຍເກີນໄປ ໂດຍສະເພາະບາງວິຊາຄື ເສດຖະສາດ, ບໍລິຫານທຸລະກິດ, ການເງິນ-ການທະນາຄານ, ບັນຊີ… ພ້ອມກັນນັ້ນບັນດິດທີ່ຈົບມາຈຳນວນຫຼາຍ ກໍບໍ່ໄດ້ຄຸນນະພາບ ເມື່ອຮຽນຈົບແລ້ວບໍ່ມີວຽກເຮັດທີ່ກົງກັບວິຊາທີ່ຮຽນມາ. ກົງກັນຂ້າມກັບສະຖານບັນການສຶກສາລະດັບຊັ້ນຕົ້ນ-ຊັ້ນກາງ ຫຼືໃນລະດັບວິຊາຊີບ ມັກຈະບໍ່ຄ່ອຍມີຜູ້ສະໝັັກເຂົ້າຮຽນພໍເທົ່າໃດ ໂດຍສະເພາະແມ່ນວິຊາ ທີ່ກ່ຽວກັບປູກຝັງ-ລ້ຽງສັດ, ກໍ່ສ້າງ, ຊ່າງສີມື… ເຮັດໃຫ້ທຸລະກິດພາກການຜະລິດຂາດແຄນແຮງງານທີ່ມີສີມື. ເມື່ອເປັນດັ່ງນັ້ນ, ລັດຖະບານ ກໍຄືກະຊວງສຶກສາຈຶ່ງໄດ້ປະຕິຮູບການສຶກສາຄືນໃໝ່ ໜຶ່ງໃນນັ້ນກໍຄືອອກມາຕະການ ໃຫ້ສະຖາບັນການສຶກສາພາກເອກະຊົນຢຸດຕິການຮຽນ-ການສອນ ໃນລະດັບປະລິນຍາຕີໄວ້ ໃນປີ 2013 ທີ່ຜ່ານມາ.
ແນວໃດກໍຕາມ, ເມື່ອບໍ່ດົນມານີ້ ກໍໄດ້ສັນຍານຈາກກະຊວງສຶກສາແລະກິລາວ່າ ຈະອະນຸຍາດໃຫ້ບັນດາສະຖານບັນການສຶກສາ ຊັ້ນກາງ-ຊັ້ນສູງ ໂດຍສະເພາະສະຖາບັນໃດທີ່ເຫັນວ່າມີມາຕະຖານຄົບຖ້ວນເໝາະສົມ ສາມາດເປີດສອນໃນລະດັບປະລິນຍາຕີໄດ້ໃນສົກການສຶກສາ 2016-2017 ນີ້. ພ້ອມກັນນັ້ນ ກໍຍັງຈະເປີດໄຟຂຽວໃຫ້ພາກເອກະຊົນສາມາດສ້າງຕັ້ງ ເປັນມະຫາວິທະຍາໄລໄດ້ພາຍໃນປີ 2020.
