ເພື່ອປະກອບສ່ວນສະເຫຼີມສະຫຼອງວັນປູກຕົ້ນໄມ້ແຫ່ງຊາດ ແລະວັນເດັກນ້ອຍສາກົນ, ແນໃສ່ຍົກລະດັບປຫຸ້ມຂອງເນື້ອທີ່ປ່າໄມ້ໃຫ້ໄດ້ 70% ໃນປີ 2020, ທັງເພື່ອເຮັດໃຫ້ແຜນການປູກໄມ້ ແລະຟື້ນຟູປ່າທີ່ນະຄອນຫຼວງກຳນົດກໍຄື:ປີ 2016 ປູກໄມ້ໃຫ້ໄດ້ 3 ຮ້ອຍເຮັກຕາ ແລະຟື້ນຟູປ່າອີກ 8 ຮ້ອຍເຮັກຕາ ໃຫ້ທ່ວງທັນກັບລະດູການ, ກຸ່ມບໍລິສັດ ຄຳ ໄພ ຊະນະ ຈິ່ງໄດ້ຂໍເປັນເຈົ້າພາບໂດຍການ ຈົກເງິນໃນຖົງຕົນເອງຊື້ເບ້ຍໄມ້ຈຳນວນ 4 ລ້ານຕົ້ນມາປູກ ພ້ອມເຊີນຊວນທຸກຄົນໃນທົ່ວສັງຄົມມາຮ່ວມປູກໃຫ້ເປັນປ່າ, ຊຶ່ງຈະມີພິທີປູກຢ່າງເປັນທາງການ ໃນຕອນເຊົ້າວັນທີ 17 ມິຖຸນານີ້ ທີ່ແຫຼ່ງທ່ອງທ່ຽວທຳມະຊາດນ້ຳຕົກຕາດຊອນ ແດນຫົງພູສູງສວນອຸທິຍານພຶກສາສາດຊຸມຊົນສະມາຄົມອາຊຽນ ນະຄອນຫຼວງວຽງຈັນ.
ວັນທີ 13 ມິຖຸນາ 2016 ທີ່ແຫຼ່ງທ່ອງທ່ຽວທຳມະຊາດ ນ້ຳຕົກຕາດຊອນ ແດນຫົງພູສູງສວນອຸທິຍານພຶກສາສາດ ຊຸມຊົນສະມາຄົມອາຊຽນ, ບ້ານນາຍາງ ເມືອງນາຊາຍທອງ ທ່ານ ຄຳໄພ ສົມຊະນະ ປະທານກຸ່ມບໍລິສັດ ຄຳໄພຊະນະ, ທັງເປັນປະທານສະມາຄົມເຟີນິເຈີລາວໄດ້ຖະແຫຼງຂ່າວຕໍ່ສື່ມວນຊົນຮູ້ວ່າ: ເພື່ອເປັນການປະກອບສ່ວນຈັດຕັ້ງປະຕິບັດຕາມເນື້ອໃນຈິດໃຈວິໄສທັດຮອດປີ 2030 ກ່ຽວການພັດທະນາຕາມທິດສີຂຽວ ແລະຍືນຍົງທີ່ໄດ້ກຳນົດໄວ້ໃນມະຕິກອງປະຊຸມໃຫຍ່ຄັ້ງທີ 10 ຂອງພັກ,ແຜນຍຸດທະສາດປ່າໄມ້ຮອດປີ 2020 ທີ່ກຳນົດໄວ້ຄື: ຍົກລະດັບຄວາມປົກຫຸ້ມປ່າໄມ້ໃຫ້ໄດ້ 70% ໂດຍການຟື້ນຟູປ່າທຳມະຊາດໃຫ້ໄດ້ 6 ລ້ານເຮັກຕາ ແລະປູກໄມ້ໃຫ້ໄດ້ 5 ແສນເຮັກຕາ, ທັງນີ້ ເພື່ອເຮັດໃຫ້ແຜນການຂອງກະຊວງກະສິກໍ-ປ່າໄມ້ປະຈຳປີ 2016 ບັນລຸການປູກໄມ້ໃຫ້ໄດ້ 24 ພັນເຮັກຕາ ແລະຟື້ນຟູປ່າໃຫ້ບັນລຸ 276 ພັນເຮັກຕາ, ໂດຍສະເພາະແຜນການປູກໄມ້ ແລະຟື້ນຟູປ່າ ປີ 2016 ທີ່ນະຄອນຫຼວງວຽງຈັນ ກຳນົດໄວ້ຄື: ປູກໄມ້ໃຫ້ໄດ້ 3 ຮ້ອຍເຮັກຕາ, ຟື້ນຟູປ່າໄມ້ໃຫ້ໄດ້ 8 ຮ້ອຍເຮັກຕາ ໃຫ້ຖ່ວງທັນກັບລະດູການ, ມີຂະບວນ ການຟົດຟື້ນ, ສຳເລັດຕາມຄາດໝາຍ ແລະໄດ້ຮັບຜົນດີ ໃນວັນທີ 17 ມິຖຸນາ 2016 ກຸ່ມບໍລິສັດພວກເຮົາ ໄດ້ມີແຜນການປູກ ຕົ້ນໄມ້ຈຳນວນ 4 ລ້ານຕົ້ນ ຢູ່ບໍລິເວນ ສະຖານທີ່ທ່ອງທ່ຽວທຳມະຊາດ ນ້ຳຕົກຕາດຊອນແດນຫົງພູສູງ ສວນອຸທິຍານພຶກສາສາດຊຸມຊົນສະມາຄົມອາຊຽນ (ເຂດບ້ານນາຍາງ ເມືອງນາຊາຍທອງ ນະຄອນຫຼວງວຽງຈັນ.
ປະຈຸບັນ ໄດ້ກະກຽມເນື້ອທີ່ປູກຕາມ ເຕັກນິກ ໄລຍະຫ່າງ 3×3 ແມັດ ມີ 3 ເຮັກຕາ, ໄລຍະຫ່າງ 1×1 ແມັດ ຈຳ ນວນ 7 ເຮັກຕາ, ຕົ້ນໄມ້ທີ່ຈະປູກແມ່ນຊະນິດພັນໄມ້ພື້ນເມືອງຂອງລາວເຮົາ ເຊັ່ນ: ໄມ້ຂະຍຸງ 2 ລ້ານຕົ້ນ, ໄມ້ດູ່ 1,5 ລ້ານຕົ້ນ, ໄມ້ດູ່ລາຍ, ໄມ້ຄຳພີ, ໄມ້ຍາງ, ໄມ້ແຄນເຮືອຊະນິດລະ 1 ແສນຕົ້ນ, ນອກນີ້ ຍັງມີໄມ້ແດງ, ໄມ້ປະດັບ ແລະ ໄມ້ໃຫ້ໝາກຊະນິດລະ 50 ພັນຕົ້ນ, ມາຮອດປະຈຸບັນໄດ້ກຽມຄວາມພ້ອມທຸກໆດ້ານເກືອບ 100%.
ສະນັ້ນ ຈິ່ງຮຽກຮ້ອງທຸກພາກສ່ວນໃນສັງຄົມ ລວມທັງພາກລັດ, ພໍ່ແມ່ປະຊາຊົນ, ຜູ້ປະກອບການ, ນັກຮຽນ-ນັກສຶກສາ, ອະນຸຊົນ-ເຍົາວະຊົນ, ຊາວໝຸ່ມ ຕະຫຼອດຮອດພຸດທະສາດສະໜາ ແລະຊາວຕ່າງປະເທດ ທີ່ອາໄສຢູ່ນະຄອນຫຼວງ ວຽງຈັນ ຈົ່ງພ້ອມກັນເຂົ້າຮ່ວມປູກຕົ້ນ ໄມ້ນຳບໍລິສັດພວກຂ້າພະເຈົ້າ ເພື່ອເຮັດ ໃຫ້ປ່າໄມ້ໃນປະເທດເຮົາ ກໍຄືນະຄອນ ຫຼວງວຽງຈັນ ມີຄວາມອຸດົມສົມບູນ ແລະກາຍເປັນປະເທດສີຂຽວຕາມຄຳຂວັນທີ່ ວ່າ “ຮ່ວມແຮງຮ່ວມໃຈປູກໄມ້ເປັນປ່າ ພັດທະນາສີຂຽວໃຫ້ຍືນຍົງ”.
ໂອກາດນີ້ ທ່ານ ຄຳໄພ ສົມຊະນະ ຍັງໃຫ້ຮູ້ອີກວ່າ: ເພື່ອໂຄສະນາເຜີຍແຜ່ ໃຫ້ທຸກພາກສ່ວນທົ່ວສັງຄົມ ເຫັນໄດ້ ຄວາມໝາຍຄວາມສຳຄັນຂອງຕົ້ນໄມ້ ແລະປ່າໄມ້ ຕໍ່ກັບການດຳລົງຊີວິດປະຈຳ ວັນຂອງມະນຸດ, ສ້າງເປັນຕົວແບບໃນ ການປູກໄມ້ ແລະຟື້ນຟູປ່າ ໃນເຊີງອະນຸລັກໃຫ້ມີຄວາມຫຼາກຫຼາຍດ້ານຊະນິດພັນໄມ້, ຊີວະນາໆພັນ, ມີອາກາດທີ່ສະອາດ, ເປັນປອດຫານໃຈຂອງນະຄອນ ຫຼວງວຽງຈັນ ກຸ່ມບໍລິສັດພວກເຮົາມີແຜນ ການປູກຕົ້ນໄມ້ແຕ່ລະປີໃນຕໍ່ໜ້າອີກດ້ວຍ.
ທີ່ມາ: