ອີງຕາມບົດລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີຂອງແຂວງສະຫວັນນະເຂດໄດ້ໃຫ້ຮູ້ວ່າ: ໃນສົກປີ 2015-2016 ແຂວງສະຫວັນນະເຂດ ໄດ້ຮັບອະນຸມັດແຜນການລົງທຶນຂອງລັດທັງໝົດ 130,58 ຕື້ກີບ ໃນນີ້ ທຶນພາຍໃນ 112,38 ຕື້ກີບ ແລະທຶນຕ່າງປະເທດ 18,19 ຕື້ກີບ ເພື່ອຈັດຕັ້ງປະຕິບັດ 369 ໂຄງການ ຊຶ່ງຜ່ານການຈັດຕັ້ງປະຕິບັດໃນໄລຍະ 6 ເດືອນຕົ້ນສົກປີນີ້, ແຂວງປະຕິບັດໄດ້ແລ້ວ 278 ໂຄງການ, ລວມເປັນມູນຄ່າ 91,81 ຕື້ກີບ, ເທົ່າກັບ 70% ຂອງແຜນການລວມ, ໃນນີ້ ທຶນພາຍໃນ 91,16 ຕື້ກີບ ແລະ ເປັນທຶນຕ່າງປະເທດ 650 ລ້ານກີບ.
ສຳລັບທຶນຊ່ວຍເຫຼືອລ້າ ແຂວງກໍສາມາດຍາດແຍ່ງການຊ່ວຍເຫຼືອເພື່ອການພັດທະນາໄດ້ທັງໝົດ 116 ໂຄງການ (ສ່ວນໃຫຍ່ແມ່ນໂຄງການສືບຕໍ່) ມີມູນຄ່າ 82,27 ຕື້ກີບ ໂດຍເປັນການຊ່ວຍເຫຼືອລ້າ 19 ໂຄງການ ມູນຄ່າ 15,58 ຕື້ກີບ ແລະການກູ້ຍືມ 25 ໂຄງການ, ເປັນເງິນ 19,28 ຕື້ກີບ. ຄຽງຄູ່ກັນນີ້, ທາງພາກການລົງທຶນຂອງເອກະຊົນພາຍໃນ ແລະຕ່າງປະເທດ ກໍໄດ້ມີຄວາມພົ້ນເດັ່ນພໍສົມຄວນ ຊຶ່ງໃນ 6 ເດືອນຜ່ານມານີ້, ສາມາດດຶງດູດການລົງທຶນ ໄດ້ທັງໝົດ 130 ໂຄງການ, ລວມເປັນມູນຄ່າທັງໝົດ 1.691 ຕື້ກວ່າກີບ ຫຼື ປະມານ 211 ລ້ານກວ່າໂດລາ ເທົ່າກັບ 71,09% ຂອງແຜນການປີ, ທຽບໃສ່ ໄລຍະດຽວກັນເພີ່ມຂຶ້ນ 10,40 ເທົ່າຕົວ, ໃນນີ້ ແຍກເປັນການລົງທຶນພາຍໃນມີ 123 ໂຄງການ ມູນຄ່າ 1.651 ຕື້ກວ່າກີບ ແລະການລົງທຶນຕ່າງປະເທດ 7 ໂຄງການ, ມູນຄ່າ 40 ຕື້ກີບ.
ສຳລັບທິດທາງແຜນການໃນ 6 ເດືອນທ້າຍສົກປີນີ້, ແຂວງສະຫວັນນະ ເຂດຈະສືບຕໍ່ປະຕິບັດຕົວເລກການລົງ ທຶນທີ່ຍັງຄ້າງໃນຈຳນວນ 130 ໂຄງການໃຫ້ສຳເລັດ ໄປພ້ອມໆກັບການເປີດ ກວ້າງການພົວພັນຮ່ວມມື ເພື່ອດຶງດູດການຊ່ວຍເຫຼືອຂອງຕ່າງປະເທດ ແລະ ການຈັດຕັ້ງສາກົນໃຫ້ນັບມື້ນັບຂະຫຍາຍຕົວ, ລົງຕິດຕາມ, ກວດກາ ແລະ ປະເມີນຜົນການດຳເນີນງານຂອງແຜນງານ, ໂຄງການທີ່ກຳລັງດຳເນີນການຈັດຕັ້ງປະຕິບັດໂຄງການ ທີ່ຍັງບໍ່ທັນສຳເລັດ, ໂຄງການສືບຕໍ່ ໂດຍສະເພາະໂຄງການທີ່ບໍ່ຂຶ້ນກັບລັດຖະບານ, ສືບຕໍ່ລົງຕິດຕາມ, ກວດກາ ແລະ ປະເມີນໂຄງການລົງທຶນຂອງເອກະຊົນພາຍໃນ ແລະຕ່າງປະເທດ ໂດຍສະເພາະໂຄງການຊອກຄົ້ນ ແລະສຳຫຼວດແຮ່ທາດ, ໂຄງການປູກໄມ້ອຸດສາຫະກຳ, ປັບປຸງຂອດການພິຈາລະນາອະນຸມັດໃຫ້ຄ່ອງຕົວຂຶ້ນກວ່າເກົ່າ, ຄົ້ນຄວ້າພິຈາລະນາການສະເໜີບັນຫາຕ່າງໆຂອງບໍລິສັດຜູ້ລົງທຶນໃຫ້ໄວຂຶ້ນກວ່າເກົ່າ ທັງນີ້ ກໍເພື່ອເຮັດໃຫ້ການລົງທຶນຕ່າງໆມີປະສິດທິຜົນຂຶ້ນກວ່າເກົ່າ.
ທີ່ມາ: