ກອງປະຊຸມສະພາປະຊາຄົມວັດທະນະທຳ-ສັງຄົມອາຊຽນຄັ້ງທີ 15 ທີ່ເມືອງມໍລະດົກໂລກຫຼວງພະບາງຂຶ້ນຢ່າງເປັນທາງການຕອນເຊົ້າວັນທີ 4 ມິຖຸນາ 2016 ນີ້ ທີ່ຫໍປະຊຸມໃຫຍ່ຫ້ອງວ່າການປົກຄອງແຂວງຫຼວງພະບາງ ໂດຍໃຫ້ກຽດເຂົ້າຮ່ວມເປັນປະທານເປີດຂອງທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ, ທ່ານ ຄຳຂັນ ຈັນທະວີສຸກ ເຈົ້າແຂວງໆຫຼວງພະບາງ, ທ່ານ ບໍ່ແສງຄຳ ວົງດາລາ ລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ທ່ານ ເລ ເລືອງມິງ ເລຂາທິການໃຫຍ່ອາຊຽນ, ບັນດາທ່ານລັດຖະມົນຕີຮັບຜິດຊອບວຽກງານປະຊາຄົມວັດທະນະທຳ-ສັງຄົມອາຊຽນ ພ້ອມດ້ວຍທ່ານທູດຕານຸທູດປະເທດສະມາຊິກອາຊຽນປະຈຳລາວເຂົ້າຮ່ວມ.
ທ່ານນາຍົກລັດຖະມົນຕີໄດ້ຍົກສູງຄວາມສຳຄັນຕໍ່ກອງປະຊຸມສະພາປະຊາຄົມວັດທະນະທຳ-ສັງຄົມອາຊຽນ ຄັ້ງທີ 15 ນີ້ ເພາະເປັນຂີດໝາຍອັນສຳຄັນ ຊຶ່ງບັນດາທ່ານລັດຖະມົນຕີຈະໄດ້ພ້ອມກັນພິຈາລະນາບັນດາເອກະສານສຳຄັນຕ່າງໆ ເພື່ອນຳສະເໜີໃຫ້ກອງປະຊຸມສຸດຍອດອາຊຽນຄັ້ງທີ 28 ທີ່ຈະຈັດຂຶ້ນໃນເດືອນກັນຍາໃກ້ຈະມາເຖິງນີ້ຢູ່ນະຄອນຫຼວງວຽງຈັນ ໂດຍສະເພາະແມ່ນຖະແຫຼງການວຽງຈັນ ວ່າດ້ວຍການຫັນປ່ຽນຈາກການຈ້າງງານນອກລະບົບໄປສູ່ການຈ້າງງານໃນລະບົບເພື່ອກ້າວໄປສູ່ການສົ່ງເສີມວຽກງານທີ່ຖືກຕ້ອງ ແລະ ຊອບທຳໃນອາຊຽນ ແລະ ຖະແຫຼງການວຽງຈັນ ວ່າດ້ວຍການຊຸກຍູ້ ແລະ ສົ່ງເສີມການຮ່ວມມືທາງດ້ານມໍລະດົກວັດທະນະທຳອາຊຽນ ແລະ ບັນດາເອກະສານທີ່ສຳຄັນອື່ນໆ.
ທ່ານນາຍົກຍັງໃຫ້ຮູ້ຕື່ມວ່າ: ອາຊຽນເປັນພາກພື້ນທີ່ມີຄວາມແຕກຕ່າງກັບພາກພື້ນອື່ນໆໃນໂລກເນື່ອງຈາກວ່າ ມີຄວາມຫຼາກຫຼາຍທາງດ້ານວັດທະນະທຳຮີດຄອງປະເພນີ, ພາສາ ແລະ ສາສະໜາ ຕະຫຼອດຮອດລະບອບການເມືອງແຕ່ປະຊາຊົນອາຊຽນກໍ່ຢູ່ຮ່ວມກັນໂດຍສັນຕິ ແລະມີຄວາມກົມກຽວກັນ, ສັງຄົມມີຄວາມໂອບເອື້ອອາລີຮ່ວມກັນອະນຸຮັກ ແລະ ສົ່ງເສີມວັດທະນະທຳ ແລະ ປະເພນີອັນດີງາມທີ່ເປັນເອກະລັກຂອງແຕ່ລະປະເທດອາຊຽນສິ່ງດັ່ງກ່າວ ໄດ້ກາຍເປັນເອກະລັກສະເພາະຂອງອາຊຽນອັນໄດ້ສ້າງໃຫ້ອາຊຽນມີຄວາມຄືບໜ້າ, ມີຜົນສຳເລັດເປັນກ້າວໆໃນການຮ່ວມມືທາງດ້ານການເມືອງ ແລະ ຄວາມໝັ້ນຄົງກໍຄືການຮ່ວມມື ແລະ ການພັດທະນາທາງດ້ານເສດຖະກິດ-ສັງຄົມໃນຂົງເຂດອາຊຽນ ແລະພາກພື້ນ ຊຶ່ງໄດ້ເປັນການປະກອບສ່ວນອັນສຳຄັນເຮັດໃຫ້ອາຊຽນມີບົດບາດສາມາດຍົກລະດັບຊີວິດການ ເປັນຢູ່ຂອງປະຊາຊົນອາຊຽນໃຫ້ນັບມື້ສູງຂຶ້ນ ໂດຍຜ່ານກົນໄກການປະສານງານ ແລະໂຄງການຮ່ວມມືຕ່າງໆ, ການກຳນົດແຜນນະໂຍບາຍເພື່ອເສີມສ້າງຄວາມເຂັ້ມແຂງ ແລະກົມກຽວຂອງບັນດາອົງການ ແລະ ສະຖາບັນ.
ໃນໄລຍະເຄິ່ງທົດສະວັດຜ່ານມາ ການຮ່ວມມືພາຍໃຕ້ເສົາຄໍ້າປະຊາຄົມວັດທະນະທຳສັງຄົມອາຊຽນລວມທັງບັນດາຂະແໜງການທີ່ກ່ຽວຂ້ອງໄດ້ປະສົບຜົນສຳເລັດຢ່າງໜ້າເພິ່ງພໍໃຈ ໂດຍສະເພາະແມ່ນຜົນສຳເລັດໃນການຈັດຕັ້ງປະຕິບັດແຜນແມ່ບົດຂອງປະຊາຄົມວັດທະນະທຳສັງຄົມອາຊຽນ 2009-2015 ໄດ້ເຖິງ 100% ແລະເຊື່ອວ່າບັນດາທ່ານລັດຖະມົນຕີປະຊາຄົມວັດທະນະທຳສັງຄົມອາຊຽນ ໂດຍການຮ່ວມກັບທຸກໆຂະແໜງການທີ່ກ່ຽວຂ້ອງຈະສືບຕໍ່ຮັກສາ ມູນເຊື້ອອັນດີງາມດັ່ງກ່າວໃນການຊຸກຍູ້ ແລະຕິດຕາມການຈັດຕັ້ງປະຕິບັດແຜນ ແມ່ບົດສະບັບໃໝ່ 2016-2025 ໃຫ້ໄດ້ຮັບໝາກຜົນເຊັ່ນດຽວກັນກັບຜ່ານມາ ຊຶ່ງຈະເປັນການປະກອບສ່ວນອັນສຳຄັນໃຫ້ແກ່ການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ໃຫ້ປາກົດຜົນເປັນຈິງ.
ທີ່ມາ: 