ຕຳຫຼວດ ສ.ເກົາຫຼີ ແຈ້ງວ່າ ເກີດເຫດສະຖານທີ່ກໍ່ສ້າງສ່ວນຕໍ່ຂະຫຍາຍລົດໄຟຟ້າໃຕ້ດິນໃກ້ນະຄອນຫຼວງເຊອູລຖະຫຼົ່ມຕອນເຊົ້າມື້ນີ້ ມີຄົນງານເສຍຊີວິດ 4 ຄົນ ບາດເຈັບ 10 ຄົນ ສັນນິຖານວ່າເກີດຈາກຖັງອົກຊີລະເບີດ.
ເວັບໄຊສຳນັກຂ່າວຢອນຮັບລາຍງານອ້າງເຈົ້າໜ້າທີ່ວ່າ ເກີດເຫດທີ່ເມືອງນັມຢັງຈູ ທາງຕາເວັນອອກຂອງນະຄອນຫຼວງເຊອູລເມື່ອເວລາ 07:20 ໂມງ ມື້ນີ້ ຕາມເວລາໃນ ສ.ເກົາຫຼີ ກົງກັບເວລາ 05:20 ໂມງ ມື້ນີ້ຕາມເວລາບ້ານເຮົາ ຂະນະເກີດເຫດມີຄົນງານ 17 ຄົນກຳລັງເຮັດວຽກເຊື່ອມໂລຫະຢູ່ໃຕ້ດິນເລິກລົງໄປ 15 ແມັດ ຜູ້ເຫັນເຫດການເລົ່າວ່າ ເຫັນລະເບີດຂະໜາດໃຫຍ່ ຂະນະທີ່ຕຳຫຼວດກ່າວວ່າບໍ່ມີການໃຊ້ວັດຖຸລະເບີດໃນເວລານັ້ນ ສັນນິຖານວ່າອາດເກີດຈາກຖັງອົກຊີທີ່ໃຊ້ໃນການເຊື່ອມໂລຫະລະເບີດ ແລະ ອາດມີຜູ້ເສຍຊີວິດເພີ່ມຂຶ້ນເນື່ອງຈາກມີຄົນງານບາງຄົນບາດເຈັບສາຫັດ ເຈົ້າໜ້າທີ່ຈະສອບສວນຫາສາເຫດທີ່ແທ້ຈິງຕໍ່ໄປ, ສ່ວນຕໍ່ຂະຫຍາຍໄຟຟ້າໃຕ້ດິນດັ່ງກ່າວມີກຳນົດເປີດໃຊ້ໃນປີ 2020.