ຄວາມສະຫລຽວສະຫລາດເປັນຍອດແຫ່ງຄວາມປາຖະໜາຂອງທຸກຄົນ ບໍ່ມີໃຜດອກທີ່ຢາກເປັນຄົນໂງ່ຈ້າ ເພາະຄວາມສະຫລາດແມ່ນນຳມາເຊິ່ງຊີວິດທີ່ດີ, ການດຳເນີນຊີວິດຢ່າງມີແບບແຜນ ແລະປະກອບສ່ວນໃຫ້ສັງຄົມມີຈະເລີນກ້າວໜ້າພັດທະນາ ດັ່ງນັ້ນ 10 ວິທີຕໍ່ໄປນີ້ ແມ່ນຈະເຮັດໃຫ້ຜູ້ປະຕິບັດນັ້ນມີຄວາມສະຫລາດຢ່າງແນ່ນອນ
- ມີຄວາມຄິດໃໝ່ໆ ຫລືໄອເດຍໃໝ່ໆໃນທຸກໆວັນ : ການເລີ່ມຕົ້ນຄິດອັນໃດອັນໜຶ່ງເປັນການ
ອອກກຳລັງກາຍຢ່າງໜຶ່ງຂອງກ້າມເນື້ອໃນສະໝອງ ບໍ່ຈຳເປັນວ່າມັນຈະເປັນຄວາມຄິດທີ່ດີສະເໝີໄປ
ຂໍພຽງແຕ່ໃຫ້ຄິດກໍພໍແລ້ວ ເພາະເຮົາບໍ່ຮູ້ດອກວ່າແນວຄິດຂອງເຮົາບາງເທື່ອມັນອາດຈະສ້າງເງິນຢ່າງ
ມະຫາສານມາໃຫ້ເຮົາໃນອະນາຄົດກໍເປັນໄດ້.
- ອ່ານໜັງສືພິມ : ໜັງສືພິມຄືສູນລວມແຫ່ງມະຫາຂ່າວສານ ມີຫລາຍລົດຫລາຍຊາດ ເຮົາຢາກ
ໄດ້ອັນໃດບັນຈຸເຂົ້າໃນສະໝອງ ກໍພຽງແຕ່ເປີດອ່ານມັນເທົ່ານັ້ນ ຮູ້ທັນສະຖານະການຂອງສັງຄົມແລະຂອງໂລກນຳອີກດ້ວຍ.
- ສ້າງຄວາມເຫັນທີ່ແຕກຕ່າງ : ພະຍາຍາມມີຄວາມເຫັນທີ່ແຕກຕ່າງຈາກຄົນອື່ນ ເພາະຄວາມ
ແຕກຕ່າງນຳມາເຊິ່ງຄວາມປ່ຽນແປງ ຄິດນອກກອບ ມັນຈະເຮັດໃຫ້ຊີວິດຂອງເຮົາເປີດຮັບແຕ່ສິ່ງໃໝ່ໆ ແລະຕ້ອງຍອມຮັບຄວາມຄິດເຫັນຂອງຜູ້ອື່ນພ້ອມ.
- ອ່ານໜັງສືຢ່າງນ້ອຍໜຶ່ງບົດໃນທຸກໆມື້ : ບໍ່ວ່າຈະເປັນກາບກອນ, ເລື່ອງສັ້ນ, ບົດຄວາມ,
ນິຍາຍ, ວິຊາການ ຫລືອິຫຍັງຕ່າງໆກໍໄດ້ ເພາະການອ່ານເປັນຫົວໃຈສຳຄັນໃນການອອກກຳລັງກາຍຂອງສະໝອງ ແລະເພີ່ມພູນຄວາມຮູ້ໃຫ້ສູງຂຶ້ນ (ຢຸດຄຳວ່າ ບໍ່ມີເວລາ).
- ຫາເລື່ອງທີ່ຈັບໃຈ ແລະສຶກສາຢ່າງຈິງຈັງ : ເພື່ອເປັນການຄົ້ນຫາຈຸດສົນໃຈຂອງຕົນເອງ ວ່າ
ມັກອັນໃດ ແລະມີຄວາມສຸກກັບມັນຫລືບໍ່? ມັນຈັບຈິດຈັບໃຈຖືກອົກຖືກໃຈບໍ່? ເມື່ອຮູ້ແລ້ວ ຕ້ອງສຶກສາໃຫ້ຮູ້ຢ່າງເລິກເຊິ່ງ ເຮັດໃຫ້ເຮົາໝົດຄວາມສົງໄສໃນສິ່ງນັ້ນໆ.
- ຫາບຸກຄົນທີ່ເປັນແຮງບັນດານໃຈ : ຈະເປັນໃຜກໍຕາມ ຂໍພຽງແຕ່ເຂົາມີຄວາມຄິດດີໆ ມີວິຖີ
ຊີວິດທີ່ຄວນເອົາເປັນແບບຢ່າງ ໜ້າເຄົາລົບນັບຖື ແລະສາມາດເອົາເປັນຕົ້ນແບບຂອງຊີວິດໄດ້.
- ແບ່ງປັນຄວາມຮູ້ສູ່ຜູ້ອື່ນ : ການສອນຜູ້ອື່ນເປັນການທົບທວນຄວາມຮູ້ ແລະເສີມສ້າງຄວາມຮູ້
ຂອງເຮົາ ເຮັດໃຫ້ເຮົາສະຫລາດຂຶ້ນອີກດ້ວຍ.
- ບັນທຶກໃນສິ່ງທີ່ເຮົາຮຽນຮູ້ : ຂຽນໃສ່ເຈ້ຍ, ຂຽນໃສ່ປຶ້ມບັນທຶກ ຫລືຂຽນລົງໂທລະສັບ ແລະອິນ
ເຕີເນັດກໍໄດ້ ເຮັດໃຫ້ເຮົາໄດ້ບັນທຶກການເວລາທີ່ຜ່ານມາແລ້ວຂອງຊີວິດ ແລະກາຍເປັນຄົນຮັບຜິດຊອບໄປນຳພ້ອມ.
- ເລືອກຄົບແຕ່ຄົນດີ : ຄຳບາລີວ່າ ຍັງ ເວ ເສວະຕິ ຕາທິໂສ ຄົບຄົນແບບໃດ ກໍເປັນຄົນແບບ
ນັ້ນ ແລະອີກຄຳໜຶ່ງທີ່ວ່າ ຄົບຄົນພານພາໄປຫາຜິດ ຄົບບັນດິດພາໄປຫາຜົນ ສະແດງໃຫ້ເຫັນວ່າ ຄົນທີ່ດີແລະສະຫລາດຈະເຮັດໃຫ້ຊີວິດເຮົາດີຂຶ້ນ ໄດ້ຮັບບົດຮຽນຊີວິດໃໝ່ໆ ແລະສ້າງແຮງບັນດານໃຈໃຫ້ເຮົາມີຄວາມບຸກບືນນຳອີກດ້ວຍ.
- ເອົາຊະນະຄວາມຢ້ານກົວ : ຢ່າຢູ່ລ້າໆ ຢ່າຢ້ານການລົງມືເຮັດ ຢ່າລໍມື້ລໍວັນ ຈົ່ງເອົາຊະນະ
ຄວາມຂີ້ຄ້ານ ແລະຈິດໃຈຂອງຕົນເອງ ເພື່ອຄວາມສຳເລັດໃນຊີວິດຂອງເຮົາ.