ທັບນັກກີລາບານສົ່ງທີມຊາດໄທ ທັງປະເພດຍິງ ແລະ ຊາຍ ຮຸ່ນອາຍຸບໍ່ເກີນ 19 ປີ ສ້າງຜົນງານໂດດເດັ່ນກວາດແຊັມ ໃນການແຂ່ງຂັນບານສົ່ງຫາດຊາຍ ຊີງແຊັມ ອາຊີ ຮອບຄັດເລືອກ ຫຼື “SMM 1st Asian U19 Beach Volleyball Championships 2016” ທີ່ສະໜາມບານສົ່ງຫາດຊາຍ ຫາດດອນຈັນ ເມືອງຈັນທະບູລີ ນະຄອນຫຼວງວຽງຈັນ; ຂະນະທີ່ ທີມຊາດລາວທີມຊາຍເຮັດໄດ້ດີສຸດທີ 11 ແລະ ທີມຍິງເຮັດໄດ້ດີສຸດອັນດັບທີ 13.

ການແຂ່ງຂັນ ມີຂຶ້ນ ລະຫວ່າງວັນທີ20- 22 ພຶດສະພາ ຜ່ານມາ ເພື່ອເປັນການເລືອກເຟັ້ນເອົາທີມຊະນະເລີດ ທີ່ຕິດອັນດັບ 1 ໃນ 4 ທັງປະເພດທີມຍິງ-ຊາຍ ກຽມຮ່ວມຊີງແຊັມໂລກ 2017 ທີ່ທະວີບອາເມລິກາໃຕ້. ຂະນະທີ່ ບໍລິສັດ ເບຍລາວ ຈຳກັດ ໃຫ້ການສະໜັບສະໜູນຫຼັກ 300 ກວ່າລ້ານກີບ ໂດຍໃຫ້ກຽດເຂົ້າຮ່ວມ ແລະ ມອບລາງວັນຂອງ ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກີລາ, ທ່ານ ຄຳສອນ ແພງຣັດຕະນະວົງ ຜູ້ອຳນວຍການຝ່າຍຂາຍ ບໍລິສັດ ເບຍລາວ ຈຳກັດ ແລະ ທ່ານ ຈັນສະໝອນ ຜ່ອງຈັນທາ ຮັກສາການປະທານສະຫະພັນບານສົ່ງແຫ່ງຊາດລາວ ພ້ອມດ້ວຍຜູ້ຕາງໜ້າຈາກສະຫະພັນບານສົ່ງອາຊີ ແລະ ບັນດາຄະນະນຳແຕ່ລະປະເທດ, ຄູ, ນັກກີລາ ຕະຫຼອດຮອດກອງເຊຍທັງຊາວລາວ ແລະ ຊາວຕ່າງປະເທດເຂົ້າຮ່ວມຊົມ ແລະ ເຊຍຢ່າງຫຼວງຫຼາຍ.

ສຳລັບຄູ່ຊີງຊະນະເລີດ ປິດສາກການແຂ່ງຂັນລາຍການດັ່ງກ່າວ ສະເພາະປະເພດທີມຊາຍແມ່ນເປັນການພົບກັນລະຫວ່າງ ທີມຊາດໄທ 1 ພົບກັບ ທີມຊາດອົດສະຕຣາລີ ເຊິ່ງທັບນັກຕົບໜຸ່ມໄທ ເອົາຊະນະໄປແບບຂາດຂັ້ນ 2-0 ເຊັດ ດ້ວຍຄະແນນ 23-21 ແລະ 21-14 ຄະແນນ ຄວ້າແຊັມໄປຄອງ; ສ່ວນອັນດັບ 3 ແລະ ອັນດັບ 4 ຕົກເປັນຂອງ ທີມຊາດອີຣານ 1 ແລະ ອີຣານ 2.

ຂະນະທີ່ ຄູ່ຊີງຊະນະເລີດປະເພດທີມຍິງ ລະຫວ່າງທີມຊາດໄທ 1 ພົບກັບ ທີມຊາດນູແວນເຊລັງ 1 ກໍ່ເປັນຝ່າຍທີມຊາດໄທ ທີ່ເອົາຊະນະໄດ້ 2-0 ເຊັດ ໄດ້ແຊັມໄປຄອງເຊັ່ນກັນ; ສ່ວນ ອັນດັບ 3 ເປັນ ສປ ຈີນ ແລະ ອັນດັບ 4 ແມ່ນ ໄທ 2.

ໃຫ້ກຽດເຂົ້າຮ່ວມ ແລະ ມອບລາງວັນຂອງ ທ່ານ ບົວລານ ສິລິປັນຍາ ຮອງລັດຖະມົນຕີ ກະຊວງສຶກສາທິການ ແລະ ກີລາ, ທ່ານ ຄຳສອນ ແພງຣັດຕະນະວົງ ຜູ້ອຳນວຍການຝ່າຍຂາຍ ບໍລິສັດ ເບຍລາວ ຈຳກັດ ແລະ ທ່ານ ຈັນສະໝອນ ຜ່ອງຈັນທາ ຮັກສາການປະທານສະຫະພັນບານສົ່ງແຫ່ງຊາດລາວ ພ້ອມດ້ວຍຜູ້ຕາງໜ້າຈາກສະຫະພັນບານສົ່ງອາຊີ ແລະ ບັນດາຄະນະນຳແຕ່ລະປະເທດ, ຄູ, ນັກກີລາ ຕະຫຼອດຮອດກອງເຊຍທັງຊາວລາວ ແລະ ຊາວຕ່າງປະເທດເຂົ້າຮ່ວມຊົມ ແລະ ເຊຍຢ່າງຫຼວງຫຼາຍ.

ຂ່າວຈາກ: ອ້ວນດໍາ ຮຽງຮຽງໂດຍ ຄໍາສອນ.
ຮູບພາບ: ໄຊອຸດອນ

ທີ່ມາ: ຂ່າວເສດຖະກິດ-ການຄ້າ