ເພື່ອເປັນການສະກັດກັ້ນ, ຕ້ານ ແລະ ແກ້ໄຂປະກົດການຫຍໍ້ທໍ້ດ້ານຕ່າງໆໃນຂົງເຂດວຽກງານປ່າໄມ້ໃຫ້ຫຼຸດລົງ ແລະ ຫມົດໄປເທື່ອລະກ້າວທ່ານນາຍົກລັດຖະມົນຕີໄດ້ອອກຄຳສັ່ງໃຫ້ພາກສ່ວນທີ່ກ່ຽວຂ້ອງທຸກຂັ້ນໃນທົ່ວປະເທດ ເພີ່ມທະວີການຈັດຕັ້ງປະຕິບັດວຽກງານຄຸ້ມຄອງປ່າໄມ້ ໂດຍສະເພາະແມ່ນໃຫ້ຢຸດຕິການສົ່ງອອກໄມ້ທ່ອນໄປຕ່າງປະ ເທດໃນທຸກກໍລະນີຢ່າງເດັດຂາດ ລວມທັງໄມ້ທີ່ລັດຖະບານໄດ້ອະນຸມັດຜ່ານມາແຕ່ຍັງບໍ່ທັນໄດ້ຈັດຕັ້ງປະຕິບັດ.
ອີງຕາມຄຳສັ່ງຂອງນາຍົກລັດຖະມົນຕີທີ່ລົງລາຍເຊັນໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ສະບັບ ເລກທີ 15/ນຍ, ນະຄອນຫຼວງວຽງຈັນ, ວັນທີ 13 ພຶດສະ ພາ 2016 ຮູ້ວ່າ: ເພື່ອເປັນການເພີ່ມທະວີໃນການຈັດຕັ້ງປະຕິບັດວຽກງານຄຸ້ມຄອງປ່າໄມ້, ການທຸລະກິດໄມ້, ການຂຸດຄົ້ນໄມ້, ປຸງແຕ່ງ ແລະ ຊື້-ຂາຍໄມ້ ໃຫ້ມີຄວາມເຂັ້ມງວດຕາມກົດຫມາຍ ແລະລະບຽບການຕ່າງໆທີ່ລັດຖະບານ ໄດ້ວາງອອກໃຫ້ມີຄວາມສັກສິດ, ທັງເປັນການສະກັດກັ້ນ, ຕ້ານ ແລະແກ້ໄຂປະກົດການຫຍໍ້ທໍ້ດ້ານຕ່າງໆໃນຂົງເຂດວຽກງານປ່າໄມ້ໃຫ້ຫຼຸດລົງ ແລະຫມົດໄປເທື່ອລະກ້າວ, ແມ່ນໃຫ້ພາກສ່ວນທີ່ກ່ຽວຂ້ອງທຸກຂັ້ນໃນທົ່ວປະເທດເພີ່ມທະວີຄວາມເອົາໃຈໃສ່ ແລະຄວາມຮັບຜິດ ຊອບໃນການປະຕິບັດຫນ້າທີ່ໃຫ້ຖືກຕ້ອງຕາມກົດຫມາຍ ແລະລະບຽບການຕ່າງໆ ທີ່ໄດ້ກຳນົດອອກ ໂດຍສະເພາະກົດຫມາຍ ແລະລະບຽບການທີ່ກ່ຽວຂ້ອງກັບການຄຸ້ມຄອງປ່າໄມ້, ການຂຸດຄົ້ນໄມ້, ການເຄື່ອນຍ້າຍໄມ້ ແລະທຸລະກິດໄມ້.
ໃນນີ້ ຫ້າມເດັດຂາດການສົ່ງອອກໄມ້ທ່ອນ, ໄມ້ຕີບຕັບ, ໄມ້ແປຮູບ, ໄມ້ຊອຍ, ຮາກໄມ້ ຫຼື ເຫງົ້າໄມ້, ຕໍໄມ້, ປູດໄມ້, ງ່າໄມ້ ແລະໄມ້ຢືນຕົ້ນ ຫຼື ໄມ້ປະດັບທີ່ຂຸດຄົ້ນອອກຈາກປ່າທຳມະຊາດໄປຕ່າງປະເທດໃນທຸກກໍລະນີ ລວມທັງໄມ້ທີ່ລັດຖະບານໄດ້ອະນຸມັດຜ່ານມາແຕ່ຍັງບໍ່ທັນໄດ້ຈັດຕັ້ງປະຕິບັດ, ໃຫ້ປຸງແຕ່ງເປັນຜະລິດຕະພັນສຳເລັດຮູບຕາມມາດຕະຖານທີ່ກະຊວງອຸດສາຫະກຳ ແລະ ການຄ້າວາງອອກ ແລ້ວຈຶ່ງອະນຸຍາດ ໃຫ້ສົ່ງອອກ, ຫ້າມນຳໄມ້ ແລະເຄື່ອງປ່າຂອງດົງທີ່ບໍ່ຖືກຕ້ອງຕາມກົດຫມາຍ ແລະລະບຽບການຈາກຕ່າງປະເທດມາ ຜ່ານເພື່ອສົ່ງໄປປະເທດທີສາມ, ໃຫ້ສືບຕໍ່ປະຕິບັດຕາມຄຳສັ່ງຂອງນາຍົກລັດຖະມົນຕີສະບັບເລກທີ 31/ນຍ, ລົງວັນທີ 5 ພະຈິກ 2013.
ໃນເຂດພັດທະນາກໍ່ສ້າງພື້ນຖານໂຄງລ່າງ, ເຂດຂຸດຄົ້ນແຮ່ທາດ ແລະເນື້ອທີ່ທຳການຜະລິດຕ່າງໆທີ່ລັດຖະບາຍັງບໍ່ທັນໄດ້ອະນຸມັດແມ່ນຫ້າມບໍ່ໃຫ້ດຳເນີນການສຳຫຼວດ ແລະຂຸດຄົ້ນໄມ້ຢ່າງເດັດຂາດ. ໃຫ້ຢຸດຕິການສະເຫນີ ແລະ ອະນຸຍາດເກັບກູ້, ທ້ອນໂຮມໄມ້ກິ່ງງ່າ, ໄມ້ທ່ອນສັ້ນ, ໄມ້ນອນຂອນຕາຍ ແລະບໍ່ອະນຸຍາດໃຫ້ເອົາໄມ້ແກ້ໄຂນະໂຍບາຍໃຫ້ ແກ່ບຸກຄົນໃດບຸກຄົນຫນຶ່ງ, ໃຫ້ກະຊວງກະສິກຳ ແລະປ່າໄມ້ເປັນໃຈກາງສົມທົບກັບຂະແຫນງການກ່ຽວຂ້ອງ ແລະທ້ອງຖິ່ນກວດກາ ແລະເກັບກຳຂໍ້ມູນລະອຽດ ເຊັ່ນ: ຈຳນວນ, ບໍລິມາດໄມ້ ແລະພັນທະຄ້າງຢູ່ສະຫນາມ 2 ທີ່ໄດ້ຮັບອະນຸຍາດໃຫ້ຂຸດຄົ້ນຈາກລັດຖະບານໃນໄລຍະຜ່ານ ເພື່ອລາຍງານລັດຖະບານພິຈາລະນາ ໂດຍມອບໃຫ້ຂະແຫນງການກ່ຽວຂ້ອງປະມູນຂາຍແກ່ສະມາຄົມອຸດສະຫະກຳປຸງແຕ່ງໄມ້ແຫ່ງຊາດ ແລະສະມາຄົມເຟີນິເຈີລາວ ຫຼື ຜູ້ປະກອບການອື່ນໆ ເພື່ອນຳມາປຸງແຕ່ງເປັນຜະລິດຕະພັນສຳເລັດຮູບຂາຍຢູ່ພາຍໃນ ຫຼື ສົ່ງອອກ.
ສຳລັບໄມ້ທີ່ຂຸດຄົ້ນເກີນແຜນການທີ່ລັດຖະບານອະນຸມັດແມ່ນໃຫ້ຢຶດເປັນຂອງລັດ ແລ້ວດຳເນີນຄະດີຕໍ່ຜູ້ກະທຳຜິດຢ່າງເຂັ້ມງວດ, ສ່ວນໄມ້ທີ່ຂຸດຄົ້ນໂດຍບໍ່ໄດ້ຮັບອະນຸຍາດ, ຜິດຕໍ່ລະບຽບກົດຫມາຍ ແລະຍັງຄ້າງຢູ່ສະຫນາມ 1 ແມ່ນບໍ່ໃຫ້ເກັບກູ້ ຫຼື ທ້ອນໂຮມອີກ ເພາະຈະເປັນຊ່ອງ ວ່າງໃຫ້ແກ່ການລັກລອບຕັດໄມ້ຕໍ່ໄປ, ການຂຸດຄົ້ນໄມ້ເພື່ອແຫຼ່ງພະລັງງານ ເຊັ່ນ: ໄມ້ຟືນ, ໄມເຮັດຖ່ານ, ໄມ້ຫຼັກຮົ້ວ, ໄມ້ຄໍ້າແບບ ແມ່ນອະນຸຍາດໃຫ້ເອົາສະເພາະທີ່ຄຸ້ມຄອງຂອງປະຊົນ ແລະ ປ່າຊົມໃຊ້ຂອງບ້ານທີ່ໄດ້ຜ່ານການມອບດິນ- ມອບປ່າ ຫຼື ເອົາຈາກເຂດກໍ່ສ້າງພື້ນຖານ ໂຄງລ່າງທີ່ໄດ້ຮັບອະນຸມັດຈາກລັດຖະບານ, ໃຫ້ຄົ້ນຄວ້າ ແລະສົ່ງເສີມການລົງທຶນໃສ່ການຂຸດຄົ້ນໄມ້ ໂດຍນຳໃຊ້ທ່າແຮງຂອງພາກລັດ ແລະ ຜູ້ປະກອບການ ເພື່ອສ້າງໃຫ້ມີການຈັດຕັ້ງ ຫຼື ກອງຂຸດຄົ້ນໄມ້ທີ່ເປັນຫນ່ວຍງານເຄື່ອນໄຫແບບວິຊາຊີບເປັນປົກກະຕິຕໍ່ເນື່ອງປະສົມປະສານໄປກັບການປົກປັກຮັກສາ, ບູລະນະປ່າໄມ້ ໂດຍພາຍໃຕ້ການຄຸ້ມຄອງຂອງອຳນາດການປົກຄອງ ແລະຂະແຫນງການກ່ຽວຂ້ອງຂອງທ້ອງຖິ່ນ, ໃຫ້ກະຊວງອຸດສະຫະກຳ ແລະການຄ້າ ເປັນໃຈ ກາງສົມທົບກັບຂະແຫນງການກ່ຽວຂ້ອງ ແລະທ້ອງຖິ່ນ ຮີດຮ້ອນດັດສົມໂຮງງານປຸງແຕ່ງໄມ້ໃຫ້ສຳເລັດໂດຍໄວ ພ້ອມດຽວກັນກໍໃຫ້ຊີ້ນຳສະມາຄົມອຸດສະຫະກຳປຸງແຕ່ງໄມ້ແຫ່ງຊາດ ແລະສະມາຄົມເຟີນິເຈີປັບປຸງພາລະບົດບາດ ແລະກົນໄກການເຄື່ອນໄຫວວຽກງານຂອງຕົນໃຫ້ມີຄວາມເຂັ້ມແຂງ ເພື່ອປະຕິບັດນະໂຍບາຍສົ່ງເສີມການປຸງແຕ່ງໄມ້ຢູ່ພາຍໃນ ໃຫ້ສາມາດສ້າງມູນຄ່າເພີ່ມ ແລະມີຄຸນນະພາບຕາມຄວາມຕ້ອງການຂອງຕະຫຼາດພາຍໃນ ແລະຕ່າງປະເທດ.
ໃຫ້ກະຊວງກະສິກຳ ແລະ ປ່າໄມ້, ສົມທົບກັບກະຊວງປ້ອງກັນປະເທດ ແລະຂະ ແຫນງການກ່ຽວຂ້ອງ ແລະທ້ອງຖິ່ນລາດຕະເວນເຂດລຽບຕາມຊາຍແດນທີ່ຫຼໍ່ແຫຼມ, ມີການລັກຂຸດຄົ້ນໄມ້, ສະຖານທີ່ຂຸດຄົ້ນໄມ້, ເສັ້ນທາງຂົນສົ່ງໄມ້, ສະຫນາມໄມ້, ໂຮງເລື່ອຍ, ໂຮງງານປຸງແຕ່ງໄມ້, ໂຮງງານເຟີນິເຈີ, ສາງເກັບມ້ຽນ, ໂຮງງານທີ່ນຳໃຊ້ໄມ້ເປັນພະລັງງານ ແລະສະຖານທີ່ກ່ຽວຂ້ອງອື່ນໆຕາມ ການລາຍງານມາແລ້ວ, ຖ້າມີການລະເມີດ ຫຼື ການກະທຳຜິດແມ່ນໃຫ້ດຳເນີນການສອບສວນ-ສືບສວນເພື່ອມີມາດຕະການທາງແພ່ງ ແລະ ທາງອາຍາ, ພ້ອມດຽວກັນກໍໃຫ້ດຳເນີນການກວດກາການນຳເຂົ້າ, ການຊື້-ຂາຍການມີໄວ້ໃນຄອບຄອງ ແລະການນຳໃຊ້ເຄື່ອງມືອຸປະກອນ, ເຄື່ອງຈັກ ແລະພາຫານະຂຸດ ຄົ້ນໄມ້ທີ່ບໍ່ໄດ້ຮັບອະນຸຍາດຈາກຂະແຫນງການກ່ຽວຂ້ອງ, ຖ້າມີການຊຸກເຊື່ອງ ເພື່ອລັກລອບນຳໃຊ້ແມ່ນໃຫ້ຢຶດໄວ້ແລ້ວດຳເນີນຄະດີຕໍ່ຜູ້ກະທຳຜິດຢ່າງເຂັ້ມງວດ, ທີ່ສຳຄັນໃຫ້ເອົາໃຈໃສ່ປະຕິບັດຫນ້າທີ່ຂອງ ໃຜລາວຢ່າງຈິງຈັງ, ເຂັ້ມງວດ ແລະມີຄວາມໂປ່ງໃສ, ເດັດດ່ຽວປົກປ້ອງສົ່ງເສີມຜູ້ດີມີຄວາມສັດຊື່ ແລະ ມີຄວາມສາມາດ.
ສຳລັບດ່ານຫ້າມບັນດາດ່ານສາກົນ, ດ່ານທ້ອງຖິ່ນ, ດ່ານປະເພນີ ແລະ ບັນດາດ່ານຕ່າງໆຢູ່ຊາຍແດນອະນຸຍາດ ຫຼື ອຳນວຍຄວາມສະດວກໃນການສົ່ງອອກໄມ້ ແລະເຄື່ອງປ່າຂອງດົງຢ່າງເດັດຂາດ.
ທີ່ມາ: 