ມືນີ້ເຮົາມີປະສົບການຂອງທ່ານໜຶ່ງທີ່ເຄີຍອົດຢ່ຽວ ຈົນເກີດເຮັດໃຫ້ພົກຢ່ຽວອັກເສບ ຈົນຢ່ຽວອອກເປັນເລືອດ ມາແບ່ງປັນປະສົບການໃຫ້ທຸກທ່ານໄດ້ອ່ານ ເພື່ອທ່ານໃດທີ່ໄດ້ອ່ານຈະໄດ້ຮັບຂໍ້ມູນດີໆໃນການປິ່ນປົວຫາກວັນໜຶ່ງເກີດເປັນອາການດັ່ງກ່າວກັບຕົວ ຫຼື ຄົນໃກ້ຕົວທ່ານ.
ເປັນເລື່ອງລາວຂອງ ປ້າວັນ ອາຍຸ 55 ປີ ເປັນຄົນບ້ານ ຫາດຊາຍຂາວ, ເມືອງ ຫາດຊາຍຟອງ ນະຄອນຫຼວງວຽງຈັນ ມີອາຊີບຄ້າຂາຍ ເລົ່າສູ່ພວກເຮົາຟັງວ່າ ໃນໄລຍະ 2 ປີກ່ອນ ລາວມີພຶດຕິກຳມັກອົດຢ່ຽວເປັນປະຈຳ ເຊິ່ງບາງເທື່ອຄາຂາຍເຄື່ອງເກີດປວດຢ່ຽວກໍ່ໄປບໍ່ຢ່ຽວ ອົດຕາມອົດ ຜ່ານໄປປະມານ 4 ວັນ ລາວຮູ້ສຶກເຈັບທ້ອງຢ່ຽວເຈັບແທ້ເຈັບວ່າ ແລະ ກໍ່ປວດຢ່ຽວດຸໆ ໄປຢ່ຽວເທື່ອໃດກໍ່ອອກຢັອດດຽວ ແຕ່ທັງເຈັບທາງແສບ ເມື່ອລາວສັງເກດເບິ່ງຢ່ຽວເຫັນເປັນສີແດງເລືອດ ທຳອິດລາວຕົກໃຈຄິດວ່າລາວເປັນປະຈຳເດືອນບໍ້ ແຕ່ສິເປັນໄດ້ຈັ່ງໃດລະ ເພາະລາວໝົດປະຈຳເດືອນແລ້ວ ມື້ນັ້ນເກືອບໝົດເຊົ້າລາວທຽວຢ່ຽວ ຈົນລາວຮູ້ສຶກທໍລະມານຫຼາຍ ລາວເລີຍມາຊອກຢາຮາກໄມ້ທີ່ມີຕາມອ້ອມແອ້ມເຮືອນ ເຊິ່ງຢາພື້ນບ້ານທີ່ໃຊ້ປະກອບມີ:
- ທັງຮາກທັງຕົ້ນຫຍ້າຢຸບ 1 ກຳ
- ທັງຮາກທັງຕົ້ນຫຍ້າຂວາກ 1 ກຳ (ຫຍ້າທີ່ດອກມັນມັກຕິດເຄື່ອງນຸ່ງເວລາທີ່ເຮົາຍ່າງຜ່ານ)
- ຮາກຫຍ້າຂິວ 1 ກຳ
- ຫົວສີໃຄພ້ອມຮາກ 3-4 ຫົວ
- ໃບໝາກເດືອຍ 1 ກຳ (ສັ່ງກັບພີ່ນ້ອງແຖວສາລາຄາມຝາກລົດເມມາໃຫ້)
ວິທີເຮັດ: ນຳທຸກຢ່າງມາລ້າງໃຫ້ສະອາດແລ້ວໃສ່ລົງໃນໝໍ້ກາຕົ້ມນ້ຳ, ຕື່ມນ້ຳໃນລະດັບພໍດີ ແລ້ວນຳໄປຕົ້ມ (ເຮັດຄືເຮົາຕົ້ມຢາພື້ນເມືອງຕາມປົກກະຕິ) ໜຶ່ງໝໍ້ຈະສາມາດຕົ້ມໄດ້ສາມເທື່ອ ເມື່ອຢາໃນໝໍ້ຈືດແລ້ວຈິ່ງຖິ້ມຢານັ້ນ
ວິທີກິນ: ໃນຊ່ວງໄລຍະເຈັບທຳອິດແມ່ນກິນຕາງນ້ຳທຳມະດາເລີຍ ກິນໝົດໝໍ້ທີໜຶ່ງທ່ານກໍ່ຈະເຫັນຜົນແລ້ວວ່າຢ່ຽວງ່າຍຂຶ້ນ, ຢ່ຽວອອກຫຼາຍຂຶ້ນ, ອາການເຈັບເລີ່ມຫຼຸດລົງ
ປ້າລີ ເພິ່ນບອກວ່າ ສຳລັບເພິ່ນໝໍ້ທີສອງກໍ່ຫາຍດີແລ້ວ ແລະ ຕັ້ງແຕ່ນັ້ນມາເພິ່ນກໍ່ບໍ່ເຄີຍອົດຢ່ຽວອີກເລີຍ
ຂໍເພີ່ມເຕີມໜ້ອຍໜຶ່ງ ສຳລັບເປັນຢ່ຽວຢັອດຖ້າບໍ່ເປັນເຖິງຂັ້ນເລືອດອອກເປັນທຳມະດາ ຂໍແນະນຳກິນຢາຕ້ານເຊື້ອໃສ່ 2 ເມັດກໍ່ຮັກສາໄດ້ເຊັ່ນກັນ ຜ່ານໄປ 1 ຊົ່ວໂມງແມ່ນດີແນ່ນອນ ເພາະແອັດມິນເຮັດເປັນປະຈຳເລີຍຢາກນຳມາບອກຕໍ່ ເພື່ອໃຫ້ຄົນທີ່ເປັນຢ່ຽວຢັອດໄດ້ລອງເຮັດເບິ່ງ.
ນີ້ແມ່ນປະສົບການຕົວຈິງທີ່ນຳມາແບ່ງປັນ ບາງທ່ານອາດຈະບໍ່ເຄີຍຮູ້ວ່າຫຍ້າບາງຊະນິດສາມາດນຳມາເປັນຢາໄດ້ ແລະ ຄັ້ງໜ້າເຮົາຈະມາເລົ່າປະສົບການໃນເລື່ອງໃດນັ້ນຕ້ອງຕິດຕາມກັນຕໍ່ໄປ