“ຄອບຄົວຂອງຂ້າພະເຈົ້າໄດ້ຕັດສິນໃຈຈະຍ້າຍໄປບ້ານຈັດສັນຫ້ວຍສູບ ຊຶ່ງມັນເປັນການຕັດສິນໃຈທີ່ຍາກຫຼາຍເພາະວ່າເມື່ອປຽບທຽບກັນລະຫວ່າງການຍ້າຍໄປບ້ານຈັດສັນຫ້ວຍສູບຂອງໂຄງການໄຟຟ້ານໍ້າງຽບ 1 ແລະ ການຍ້າຍໄປບ່ອນອື່ນດ້ວຍຕົນເອງພາຍໃນເມືອງບໍລິຄັນ ຫຼື ເມືອງອື່ນ ຂໍ້ດີ ແລະ ຂໍ້ເສຍແມ່ນຄ້າຍໆ ຄືກັນ ແຕ່ໃນທີ່ສຸດພວກເຮົາຕັດສິນໃຈຍ້າຍໄປບ້ານຈັດສັນຫ້ວຍສູບ,” ທ່ານ ລີ ຊົງ ອາຍຸ 52 ປິ ຊາວບ້ານຫາດຊາຍຄຳ ແຂວງ ບໍລິຄຳໄຊ ກ່າວ.
ບ້ານຫາດຊາຍຄຳແມ່ນຕັ້ງຢູ່ໃນເຂດໂຄງການໄຟຟ້ານໍ້າງຽບ 1 ແລະ ຈະຖືກນໍ້າຖ້ວມໂດຍອ່າງໂຕ່ງນໍ້າຂອງເຂື່ອນນໍ້າງຽບ 1 ທີ່ຈະຖືກສ້າງຂຶ້ນພາຍຫຼັງການກໍ່ສ້າງເຂື່ອນໄດ້ສຳເລັດລົງໃນປີ 2018 ແລະ ປະຊາຊົນທັງໝົດ 38 ຄົວເຮືອນຕ້ອງໄດ້ຍົກຍ້າຍ. ຄອບຄົວທ່ານລີ ແລະ ອີກ 18 ຄົວເຮືອນໄດ້ເລືອກໄປບ້ານຈັດສັນຫ້ວຍສູບ ຊຶ່ງຕັ້ງຢູ່ຫ່າງຈາກບ້ານຫາດຊາຍຄຳປະມານ 5 ກິໂລແມັດ ສ່ວນທີ່ເຫຼືອ 18 ຄົວເຮືອນໄດ້ເລືອກຍ້າຍໄປບ່ອນອື່ນໃນເມືອງບໍລິຄັນ ແລະ ອີກຄົວເຮືອນໜຶ່ງຈະຍ້າຍໄປແຂວງອື່ນ.
ປະຊາຊົນປະມານ 520 ຄົວເຮືອນຈາກບ້ານຫາດຊາຍຄຳ ເມືອງບໍລິຄັນ ແຂວງບໍລິຄຳໄຊ ແລະ ຈາກອີກສີ່ບ້ານທີ່ເມືອງຮົ່ມ ແຂວງໄຊສົມບູນຈະຕ້ອງຍົກຍ້າຍເພື່ອການກໍ່ສ້າງຂອງໂຄງການ. ພາຍໃຕ້ການການປຶກສາຫາລືກັບຊຸມຊົນທ້ອງຖິ່ນ, ການປະຕິບັດທີ່ດີເລີດດ້ານການຊົດເຊີຍຂອງ ສ.ປ.ປ. ລາວ ແລະ ຂອງສາກົນ ແລະ ໂດຍການຊີ້ນໍາຂອງຄະນະຊີ້ນໍາຂັ້ນແຂວງວ່າດ້ວຍການຍົກຍ້າຍຈັດສັນ ແລະ ປົວແປງຊີວິດການເປັນຢູ່ຂອງຜູ້ທີ່ຖືກກະທົບຈາກໂຄງການ ໂຄງການໄຟຟ້ານໍ້າງຽບ 1 ໄດ້ສ້າງ ແລະ ຈັດຕັ້ງປະຕິບັດນະໂຍບາຍການຊົດເຊີຍເພື່ອເຮັດໃຫ້ຜົນກະທົບຈາກໂຄງການມີໜ້ອຍທີ່ສຸດ ແລະ ການສ້າງບ້ານຈັດສັນຫ້ວຍສູບກໍແມ່ນໜຶ່ງຮູບແບບຂອງການຊົດເຊີຍເພື່ອຫຼຸດຜ່ອນຜົນກະທົບທີ່ມີຕໍ່ຊຸມຊົນຂອງໂຄງການ.
ທ່ານ ປຣະພາດ ປານອາຣາມ ຮອງອຳນວຍການດ້ານສັງຄົມ ແລະ ສິ່ງແວດລ້ວມຂອງບໍລິສັດໄຟຟ້ານໍ້າງຽບ 1 ກ່າວວ່າ: “ພວກເຮົາໄດ້ເລີ່ມຕົ້ນກໍ່ສ້າງຫົນທາງ ແລະ ຂົວເຂົ້າຫາເຂດບ້ານຈັດສັນຫ້ວຍສູບ ແລະ ເລີ່ມບຸກເບີກພື້ນທີ່ສຳລັບປຸກເຮືອ ແລະ ສ້າງສະຖານທີ່ອຳນວຍຄວາມສະດວກຕ່າງໆ ຂອງຊຸມຊົນ ແລະ ກະກຽມພື້ນທີ່ກະສິກຳເພື່ອຮອງຮັບປະຊາຊົນຜູ້ທີ່ຈະຍ້າຍເຂົ້າມາອາໄສຢູ່ບ້ານຈັດສັນຫ້ວຍສູບ.” ການກໍ່ສ້າງບ້ານຈັດສັນຫ້ວຍສູບກຳລັງຂຸ້ນຂ້ຽວເພື່ອຮັບປະກັນວ່າການຍົກຍ້າຍທຳອິດຈາກບ້ານຫາດຊາຍຄຳຈະໃຫ້ສຳເລັດໃນເດືອນກໍລະກົດ 2016 ແລະ ການຍົກຍ້າຍສຸດທ້າຍຂອງປະຊາຊົນຜູ້ທີ່ຖືກຜົນກະທົບຈາກສີ່ບ້ານທີ່ເມືອງຮົ່ມແຂວງໄຊສົມບູນຈະໃຫ້ສຳເລັດໃນປີ 2017.
ທ່ານປຣະພາດກ່າວວ່າ: ປະຊາຊົນຜູ້ທີ່ຖືກຜົນກະທົບຈະໄດ້ຮັບຜົນປະໂຫຍດຫຼາຍຢ່າງ ທ່ານ ລີ ຊົງ ກ່າວວ່າ: “ຄອບຄົວຂອງຂ້າພະເຈົ້າຈະໄດ້ຮັບເຂົ້າສານເປັນເວລາ 5 ປີ, ເຮືອນ, ທົ່ງນາທີ່ມີຊົນລະປະທານ ແລະ ດິນສຳລັບການກະສິກຳ ແລະ ລ້ຽງສັດ. ນອກນີ້ ພວກເຮົາຍັງຈະໄດ້ເຂົ້າເຖິງ ແລະ ຊົມໃຊ້ສິ່ງອຳນວຍຄາມສະດວກຕ່າງໆ ເຊັ່ນ: ຕະຫຼາດ, ໂຮງຮຽນ, ສຸກສາລາ ແລະ ນໍ້າສະອາດ ແລະ ເຂົ້າຮ່ວມກິດຈະກໍາປັບປຸງຊີວິດການເປັນຢູ່ທີ່ສະໜອງໂດຍໂຄງການນຳອີກ.” ພາຍໃຕ້ນະໂຍບາຍການຊົດເຊີຍ ປະຊາຊົນຜູ້ທີ່ຖືກຜົນກະທົບສາມາດເລືອກທີ່ຈະຍ້າຍໄປຢູ່ບ້ານຈັດສັນຫ້ວຍສູບ ຫຼື ຮັບເອົາການຊົດເຊີຍທັງໝົດ ແລະ ຍ້າຍໄປຢູ່ບ້ານອື່ນດ້ວຍຕົນເອງ. “ການຍົກຍ້າຍໄປບ່ອນອື່ນດ້ວຍຕົນເອງ ຕ້ອງໄດ້ຮັບການອະນຸມັດຈາກຄະນະຊີ້ນຳຂັ້ນແຂວງວ່າດ້ວຍການຍົກຍ້າຍ ແລະ ປົວແປງຊີວິດການເປັນຢູ່ຂອງປະຊາຊົນຜູ້ທີ່ຖືກຜົນກະທົບ,” ທ່ານ ປຣະພາດ ກ່າວຕື່ມ.
ທ່ານ ກົງສີ ລໍ ກ່າວວ່າ: “ຄອບຄົວຂອງພວກເຮົາໄດ້ຕັດສິນໃຈທີ່ຈະຍ້າຍໄປບ້ານໜຶ່ງໃນເມືອງບໍລິຄັນ ເພາະວ່າພວກເຮົາມີພີ່ນ້ອງຢູ່ພຸ້ນ ແລະ ຄາດວ່າຈະຍ້າຍທັນທີພາຍຫຼັງທີ່ໄດ້ຮັບການຊົດເຊີຍຈາກໂຄງການ. ທ່ານ ກົງສີກ່າວຕື່ມອີກວ່າ: ຄົວເຮືອນທີ່ຍ້າຍໄປບ່ອນອື່ນດ້ວຍຕົນເອງສ່ວນຫຼາຍຄິດວ່າເຂົາເຈົ້າຈະໄດ້ຮັບການຊົດເຊີຍ“ຫຼາຍ”ກວ່າການຍ້າຍໄປບ້ານຈັດສັນຫ້ວຍສູບ.
ທ່ານ ປຣະພາດ ກ່າວວ່າ ໂຄງການຢາກໃຫ້ທຸກໆ ຄົວເຮືອນຍ້າຍໄປບ້ານຈັດສັນຫ້ວຍສູບເພື່ອໃຫ້ເຂົາໄດ້ຮັບຜົນປະໂຫຍດສູງສຸດຈາກກິດຈະກຳປັບປຸງຊີວິດການເປັນຢູ່ຂອງໂຄງການ ແຕ່ພວກເຮົາກໍເຂົ້າໃຈ ແລະ ເຄົາລົບການຕັດສິນໃຈຂອງປະຊາຊົນ.
ທ່ານລີກ່າວວ່າ: “ຂ້າພະເຈົ້າມີແຜນຈະລ້ຽງ ແລະ ເພາະພັນປາຂາຍ ແລະ ຄາດວ່າຊີວິດຂອງພວກເຮົາຈະດີຂຶ້ນພາຍຫຼັງທີ່ໄດ້ຍ້າຍໄປຢູ່ບ້ານຈັດສັນຫ້ວຍສູບ.”
ຂອບໃຈ ຂໍ້ມູນ ແລະພາບ ຈາກ ບໍລິສັດໄຟຟ້ານໍ້າງຽບ 1
(ຫນັງສືພິມ ເສດຖະກິດ-ການຄ້າ)