ເຫດໄຟໄໝ້ຕະຫຼາດທົ່ງຂັນຄຳໄດ້ສ້າງຄວາມລະແວສົງໄສ ໃຫ້ກັບຊາວຄ້າ ຂາຍຜູ້ທີ່ໄດ້ຮັບຜົນກະທົບ ແລະ ສັງຄົມທີ່ຄິດວ່າອຸປະຕິເຫດຄັ້ງນີ້ເກີດຈາກການຈົງ ໃຈ, ຈົນໃນທີ່ສຸດກໍຮູ້ວ່າແມ່ນຍ້ອນໄຟຟ້າລັດວົງຈອນ ດັ່ງທ່ານ ສາຍທອງ ແກ້ວດວງ ດີ ຮອງເຈົ້າຄອງນະຄອນຫຼວງວຽງຈັນ, ທັງເປັນຄະນະຮັບຜິດຊອບໃນວຽກງານດັ່ງ ກ່າວໄດ້ອອກມາດຖະແຫຼງຕໍ່ສື່ມວນຊົນ ກ່ຽວກັບສາເຫດຂອງໄຟໄໝ້ຕະຫຼາດທົ່ງ ຂັນຄຳ ແລະ ທິດທາງຊ່ວຍເຫຼືອຊາວຄ້າຂາຍທີ່ໄດ້ຮັບຜົນກະທົບຈາກເຫດການດັ່ງ ກ່າວໃນວັນທີ 15 ພຶດສະພາຢູ່ຫ້ອງການປົກຄອງນະຄອນຫຼວງວຽງຈັນ, ທ່ານຮອງເຈົ້າຄອງຖະແຫຼງວ່າ: ຫຼັງຈາກການສືບ ສວນ ສອບສວນ ແລະ ເກັບກຳຂໍ້ມູນມາ ເປັນເວລາສອງເດືອນກວ່າຈຶ່ງພົບຫຼັກຖານທີ່ສາມາດຢືນຢັນໄດ້ວ່າເຫດການ ໄຟໄໝ້ ຕະຫຼາດທົ່ງຂັນຄຳນັ້ນເກີດຈາກໄຟຟ້າ ລັດວົງຈອນ, ບໍ່ແມ່ນການລັກວາງເພີງ ແລະ ແກ້ງແຍ່ງທາງດ້ານການຄ້າແຕ່ຢ່າງໃດ, ຊຶ່ງໄຟຟ້າລັດ ວົງຈອນດັ່ງກ່າວເກີດຂຶ້ນຢູ່ ເທິງເພດານຂອງຮ້ານນາງຕູ່ ຊຶ່ງເປັນຮ້ານທຳອິດທີ່ຖືກໄຟໄໝ້, ເຈົ້າໜ້າທີ່ກ່ຽວຂ້ອງໄດ້ພົບສາຍໄຟມີການຊັອດກ່ອນຈະເກີດ ແປວໄຟໄໝ້ລາມ ຊຶ່ງເປັນຫຼັກຖານສາມາດຢັ້ງຢືນຕໍ່ເຫດການຄັ້ງນີ້.
ທ່ານຮອງເຈົ້າຄອງກ່າວວ່າ: ປັດຈຸບັນພາກສ່ວນກ່ຽວຂ້ອງພວມປຶກສາຫາລືກ່ຽວກັບການຊ່ວຍເຫຼືອຕາມຂັ້ນຕອນ, ຊຶ່ງການຊ່ວຍເຫຼືອເບື້ອງຕົ້ນແມ່ນໄດ້ສ້າງຕະຫຼາດຊົ່ວຄາວຢູ່ຂ້າງສູນການຄ້າລາວໄອເຕັກໃຫ້ຊາວຄ້າຂາຍຂອງຕະຫຼາດທົ່ງ ຂັນຄຳ ສາມາດໄປຄ້າຂ້າໄດ້ໂດຍບໍ່ເສຍຄ່າເຊົ່າ ແລະ ບໍ່ໄດ້ເສຍຄ່ານ້ຳຄ່າໄຟແຕ່ຢ່າງໃດ, ພ້ອມນັ້ນ ກໍຈະຫາຕົ້ນທຶນໃຫ້ຊາວຄ້າຂາຍໂດຍ ກູ້ຢືມເງິນຈາກທະນາຄານ ໃນອັດຕາດອກເບ້ຍຕ່ຳທີ່ສຸດ, ສ່ວນແຜນການຊ່ວຍເຫຼືອໄລຍະຍາວແມ່ນທາງພາກສ່ວນກ່ຽວຂ້ອງ ຈະສ້າງຕະຫຼາດທົ່ງຂັນຄຳ ຄືນໃໝ່ໃຫ້ເປັນຕະຫຼາດທີ່ທັນສະໄໝ, ຄົບວົງຈອນ ແລະ ໃຫ້ສຳເລັດໄວທີ່ສຸດເພື່ອຊາວຄ້າຂາຍສາ ມາດເຂົ້າໄປຄ້າຂາຍໄດ້ ແລະ ຜູ້ປະສົບເຄາະຮ້າຍດັ່ງກ່າວຈະໄດ້ຮັບບຸລິມະສິດອັນດັບ 1 ໃນການເຂົ້າໄປຈັບຈອງຫ້ອງຄ້າຂາຍ ຕາມຄວາມຕ້ອງການ, ພ້ອມທັງຈະໄດ້ຮັບສ່ວນຫຼຸດພິເສດ 30% ໃນການເຊົ່າຫຼືຊື້ຫ້ອງຂາຍສິນຄ້າ, ຈຶ່ງຂໍຮ້ອງຮຽນໃຫ້ຊາວ ຄ້າຂາຍມີຄວາມອຸ່ນອ່ຽນທຸ່ນທ່ຽງເຂົ້າມາທຳມາຄ້າຂາຍ ໃນບ່ອນທີ່ໄດ້ຈັດສັນໃຫ້, ບໍ່ຄວນຂາຍສິນຄ້າໄປຢ່າງຊະຊາຍຊຶ່ງມັນຈະ ສ້າງສິ່ງກີດຂວາງໃຫ້ແກ່ການສັນຈອນໄປມາ ແລະ ມັນຍັງສ້າງຄວາມບໍ່ຈົບງາມໃຫ້ແກ່ຕົວເມືອງຫຼວງນຳອີກ, ສຳລັບຊາວຄ້າ ຂາຍຕະຫຼາດທົ່ງຂັນຄຳທີ່ຕ້ອງການຈະໄປຂາຍສິນຄ້າຢູ່ຕະຫຼາດຊຶ່ງພາກສ່ວນກ່ຽວຂ້ອງຈັດສັນໃຫ້ແມ່ນໃຫ້ໄປແຈ້ງຊື່ຂອງຕົນເລີ່ມແຕ່ວັນທີ 20 ພຶດສະພານີ້ເປັນຕົ້ນໄປ.
ທີ່ມາ http://laophatthananews.blogspot.com/2014/05/blog-post_2680.html
—————————————————————————
ຂ່າວດຽວກັນ
ຕະຫຼາດທົ່ງຂັນຄຳ ທີ່ມີອາຍຸເກົ່າແກ່ປະມານ 20 ກວ່າປີ ໄດ້ຖືກໄຟໄໝ້ເມື່ອວັນທີ 26 ມີນາ 2014 ຜ່ານມາ ລວມມີຮ້ານຄ້າທັງໝົດເກືອບ 400 ຮ້ານ ສ້າງຄວາມເສຍຫາຍເປັນຈຳນວນເງິນປະມານ 110 ຕື້ກີບ ຫຼ້າສຸດ ເຈົ້າໜ້າທີ່ຫາສາເຫດໄດ້ແລ້ວ ມາຈາກໄຟຟ້າລັດວົງຈອນ ເຊິ່ງລັດຖະບານເຫັນໃຈ ໃຫ້ຈຳນວນຮ້ານຄ້າທີ່ຖືກເສຍຫາຍໄປຂາຍທີ່ສູນການຄ້າລາວ-ໄອເຕັກແທນຊົ່ວຄາວ ໂດຍຈະບໍ່ໄດ້ມີການເສຍຄ່າເຊົ່າ ໄຟຟ້າ ນ້ຳປະປາ ແລະ ໃດໆທັງນັ້ນເປັນກໍລະນີພິເສດ.
ທ່ານ ສາຍທອງ ແກ້ວດວງດີ ຮອງເຈົ້າຄອງນະຄອນຫຼວງວຽງຈັນ ອອກມາຖະແຫຼງຂ່າວຕໍ່ສື່ມວນຊົນເມື່ອວານນີ້ ເຖິງສາເຫດໄຟໄໝ້ຕະຫຼາດທົ່ງຂັນຄຳ ລວມທັງນະໂຍບາຍຕໍ່ຜູ້ທີ່ຖືກເຄາະຮ້າຍຈາກຄັ້ງນີ້ວ່າ: ເຈົ້າໜ້າທີ່ປ້ອງກັນຄວາມສະຫງົບຂອງນະຄອນຫຼວງ ຮ່ວມມືກັບກະຊວງເຈົ້າໜ້າທີ່ກ່ຽວຂ້ອງທຸກຂັ້ນ ໄດ້ສອບສວນ-ສືບສວນຫາສາເຫດໄຟໄໝ້ຕະຫຼາດທົ່ງຂັນຄຳ ເມືອງຈັນທະບູລີ ເມື່ອຕົ້ນລະດູຮ້ອນຂອງປີນີ້ ໂດຍຢືນຢັນວ່າ ແມ່ນເກີດຈາກໄຟຟ້າລັດວົງຈອນ ເນື່ອງຈາກສາຍໄຟທີ່ໃຊ້ງານມາດົນແລ້ວ ຕັ້ງແຕ່ເລີ່ມມີການສ້າງຕະຫຼາດແຫ່ງນີ້ຂຶ້ນມາ ບໍ່ແມ່ນການແບ່ງແຍກສະຖານທີ່ ຫຼືເປັນການຕັ້ງໃຈໃຫ້ເກີດຂອງບຸກຄົນໃດໜຶ່ງ ເພາະວ່າສັນຍາຂອງຕະຫຼາດດັ່ງກ່າວຍັງເຫຼືອອີກ 1 ປີ ຈາກທີ່ສຳປະທານຍາວ 15 ປີ.
ໂດຍທ່ານຮອງເຈົ້າຄອງ ກ່າວວ່າ: ຈຸດເລີ່ມຕົ້ນຂອງເຫດການຄັ້ງນີ້ ແມ່ນເກີດຈາກໄຟໄໝ້ມາຈາກເທິງເພດານຮ້ານນາງ ຕູ່ ແລະ ລາມມາຫາຮ້ານທີ່ຂາຍໝາກກະໂພກ ບັ້ງໄຟຈຳນວນຫຼາຍ ແລະ ບັ້ງແກັສ ທ່າມກາງຄວາມແອອັດຂອງຕະຫຼາດທີ່ເກີນຂະໜາດຄວາມຈຸ ເຮັດໃຫ້ແປວໄຟແພ່ໄປໄວວາເກີນກວ່າເຈົ້າໜ້າທີ່ຈະຄວບຄຸມໄວ້ທັນ ສ່ວນຄວາມເສຍຫາຍທັງໝົດ ເຈົ້າໜ້າທີ່ກຳລັງຮິບໂຮມຫຼັກຖານ ສະເໜີໃຫ້ສານເພື່ອຫາຜູ້ຮັບຜິດຊອບ.
ທັງນີ້ ບໍລິສັດ ລາວເວີນ ເຈົ້າຂອງດຽວກັບສູນການຄ້າລາວ-ໄອເຕັກ ທີ່ຮັບຊ່ວງສຳປະທານເປັນເວລາ 50 ປີ ໃນເນື້ອທີ່ຄວາມກວ້າງຂອງຕະຫຼາດທົ່ງຂັນຄຳ ທີ່ມີປະມານ 1 ເຮັກຕາກວ່າ ໃຫ້ເປັນຕະຫຼາດຍຸກໃໝ່ ຄວາມສູງ 6 ຊັ້ນ ມີສະຖານທີ່ຈອດລົດ ຈະໃຊ້ເວລາໃນການກໍ່ສ້າງ 1 ປີກັບ 3 ເດືອນ (ທ້າຍປີ 2015) ສຳເລັດ ຈະໃຫ້ຈຳນວນເຈົ້າຂອງຮ້ານຄ້າຂາຍທີ່ຖືກເສຍຫາຍ ເຂົ້າໄປຂາຍໃນຕະຫຼາດແຫ່ງໃໝ່ ທີ່ກຳລັງຈະມີການກໍ່ສ້າງໃນມໍ່ໆນີ້ ໂດຍຈະມີສ່ວນຫຼຸດໃຫ້ 30% ຂອງຄ່າເຊົ່າທັງໝົດ.
ຢ່າງໃດກໍ່ດີ ໃນໄລຍະທີ່ມີການກໍ່ສ້າງອາຄານ ບໍລິສັດ ລາວເວີນ ໄດ້ຕົກລົງໃຫ້ຈຳນວນຮ້ານຄ້າທີ່ຖືກເຄາະຮ້າຍເຫຼົ່ານັ້ນ ໄປວາງຂາຍສິນຄ້າທີ່ສູນການຄ້າລາວ-ໄອເຕັກຊົ່ວຄາວ ໂດຍບໍ່ມີການເກັບຄ່າໃດໆທັງນັ້ນ ແມ່ນແຕ່ຄ່າໄຟຟ້າ ແລະ ນ້ຳປະປາ (ທຸກຢ່າງບໍ່ມີການເສຍຄ່າ) ເຊິ່ງກຳນົດໃຫ້ໄປສະເໜີໂຕບໍ່ກາຍວັນທີ 1 ເດືອນມິຖຸນາ (ເດືອນໜ້າ) ສ່ວນການຫານະໂຍບາຍອື່ນ ເຊັ່ນ: ເລື່ອງການຫາເງິນກູ້ດອກເບ້ຍຕ່ຳ ຫຼື ບໍ່ມີດອກເບ້ຍ ທາງເຈົ້າໜ້າທີ່ກ່ຽວຂ້ອງ ກຳລັງກຽມຫາລືກັບບັນດາທະນາຄານໃນອັນດັບຕໍ່ໄປ.
ທີ່ມາ http://www.vientianemai.net/teen/khao/1/11815