ໃນວັນເສົາ ທີ 02 ເມສາ 2016 ຜ່ານມາ ໂຮງຮຽນນານາຊາດປັນຍາທິບສະຫວັນນະເຂດ ໄດ້ຈັດກິດຈະກຳພາຍໃນໂຮງຮຽນ ເພື່ອໃຫ້ແຂກທຸກພາກສ່ວນໄດ້ເຂົ້າຢ້ຽມຊົມ ຫຼື ເອີ້ນວ່າ OPEN HOUSE ເຊິ່ງງານດັ່ງກ່າວ ໄດ້ຮັບກຽດເຂົ້າຮ່ວມຂອງທ່ານ ດຣ. ສຸພັນ ແກ້ວມີໄຊ ເຈົ້າແຂວງໆສະຫວັນນະເຂດ ມີບັນດາຄູ ອາຈານ ນັກຮຽນ ຕະຫຼອດເຖິງຜູ້ປົກຄອງນັກຮຽນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວ ທ່ານນາງ ປາດຖະໜາ ປັນຍາທິບ ຜູ້ຈັດການໃຫຽ່ ໂຮງຮຽນນານາຊາດ ປັນຍາທິບ ໄດ້ແຈ້ງໃຫ້ຮູ້ປະຫວັດຄວາມເປັນມາຂອງໂຮງຮຽນນີ້ວ່າ ໂຮງຮຽນປັນຍາທິບສະຫວັນນະເຂດ ໄດ້ໄຂການຮຽນ-ການສອນ ມາໄດ້ 1 ປີກວ່າ ແລະ ກ້າວເຂົ້າປີທີສອງແລ້ວ ກໍເຫັນວ່າໄດ້ຮັບການຕອບຮັບຈາກພໍ່ແມ່ປະຊາຊົນຊາວແຂວງສະຫວັນນະເຂດ ກໍຄືເມືອງໄກສອນ ພົມວິຫານ ທີ່ໄດ້ໃຫ້ຄວາມໄວ້ວາງໃຈສົ່ງບຸດຫຼານຂອງຕົນເຂົ້າຮໍ່າຮຽນຢ່າງຫຼວງຫຼາຍ ເຊິ່ງໄດ້ໄຂຮຽນໃນລະບົບສາກົນ ຮວມມີພາສາລາວ ພາສາອັງກິດ ແລະ ພາສາຈີນ ໃນຕະຫຼອດໄລຍະຜ່ານມາ ເຫັນວ່າຜົນການຮຽນຂອງນັກຮຽນມີທ່າກ້າວດີຂຶ້ນ ແລະ ເປັນທີ່ຍອມຮັບຂອງຜູ້ປົກຄອງເປັນສ່ວນໃຫຽ່ ນອກຈາກການຮຽນ-ການສອນແລ້ວ ຍັງມີການຈັດກິດຕະກຳຫຼາກຫຼາຍ ເປັນຕົ້ນ ກິລາ ສິລະປະວັນນະຄະດີ ແລະ ກິດຈະກຳເຮັດສວນຄົວ ນອກນັ້ນ ກໍຍັງໄດ້ມີການໄປທັດສະນະສຶກສາຢູ່ຕ່າງແຂວງ ກໍຄືຕ່າງປະເທດ ທັງນີ້ກໍເພື່ອຖອດຖອນບົດຮຽນ ເພີ່ມທັກສະໃຫ້ແກ່ນັກຮຽນ ແລະ ອື່ນໆ.