ເນື່ອງໃນໂອກາດສົ່ງທ້າຍປີເກົ່າ ພສ 2558 ແລະ ຕ້ອນຮັບປີໃໝ່ ພສ 2559 ປະຈໍາປີ 2016 ສະຖານເອກອັກຄະຣາຊະທູດແຫ່ງອານາຈັກໄທ ໄດ້ຈັດພິທີບາສີສູ່ຂັວນ ແລະ ຫົດນໍ້າ ອວຍພອນປີໃໝ່ເຊິ່ງກັນແລະກັນ ທັງເປັນການສືບທອດວັດທະນະທໍາ ຮີດຄອງປະເພນີ ແລະ ມິດຕະພາບອັນດີງາມລະຫວ່າງປະຊາຊົນສອງຊາດລາວ-ໄທ ໄທ-ລາວ ທີ່ມີມາແຕ່ບູຮານະການ ໃຫ້ນັບມື້ຍິ່ງຮັດແໜ້ນຄວາມສາມັກຄີ ຮັກແພງຖານບ້ານໃກ້ເຮືອນຄຽງ ແລະ ເພີ່ມທະວີການຮ່ວມມືທຸກຂົງເຂດວຽກງານໃຫ້ມີຄວາມຍືນຍົງຕະຫຼອດໄປ.

ພິທີດັ່ງກ່າວໄດ້ຈັດຂຶ້ນໃນຕອນແລງວັນທີ 07 ເມສາ 2016 ທີ່ນະຄອນຫຼວງວຽງຈັນ ໂດຍການເປັນປະທານຂອງທ່ານ ນົບພະດົນ ເທບພິທັກ ເອກອັກຄະຣາຊະທູດວິສາມັນຜູ້ມີອໍານາດເຕັມແຫ່ງຣາຊະອານາຈັກໄທ ປະຈໍາ ສປປ.ລາວ ເຂົ້າຮ່ວມມີທ່ານ ທອງລຸນ ສີສຸລິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ.ລາວ ທ່ານ ສຈ.ດຣ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ ສປປ.ລາວ ປະທານສະມາຄົມເພື່ອມິດຕະພາບລາວ-ໄທ ທ່ານ ຫຼີ ບຸນຄໍ້າ ເອກອັກຄະລັດຖະທູດວິສາມັນຜູ້ມີອໍານາດເຕັມແຫ່ງ ສປປ.ລາວ ປະຈໍາ ຣາຊະອານາຈັກໄທ ມີທ່ານລັດຖະມົນຕີກະຊວງການຕ່າງປະເທດແຫ່ງຣາຊະອານາຈັກໄທ ຄະນະເລຂາທິການສະມາຄົມໄທ-ລາວ ເພື່ອມິດຕະພາບ ມີບັນດາເຈົ້າໜ້າທີ່ ພະນັກງານຂັ້ນສູງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.