ທ່ານນາງ ລັດສະໝີ ເວດຊະພົງ ເຈົ້າຂອງຮ້ານອາຫານແຊບອີ່ຫຼີ ໜຶ່ງໃນ 8 ນັກທຸລະກິດຍິງຂອງລາວທີ່ໄດ້ຮັບລາງວັນ ຜູ້ປະກອບການດີເດັ່ນແມ່ຍິງອາຊຽນ ປະຈຳປີ 2016 ທີ່ຈັດຂຶ້ນຕົ້ນເດືອນມີນາ 2016 ຜ່ານມາ ຢູ່ນະຄອນຫຼວງຮ່າໂນ້ຍ ສສ ຫວຽດນາມ ຖືວ່າເປັນອີກລາງວັນໜຶ່ງ ທີ່ໄດ້ສ້າງຊື່ສຽງໃຫ້ແກ່ຜູ້ປະກອບການ ກໍ່ຄືນັກທຸລະກິດຍິງຂອງລາວເຮົາຕໍ່ບັນດາປະເທດອາຊຽນ ແລະ ໃນໂລກ.
ທ່ານນາງ ລັດສະໝີ ເວດຊະພົງ ໄດ້ກ່າວວ່າ: ລາງວັນດັ່ງກ່າວ ເປັນລາງວັນທີສາມແລ້ວ ທີ່ຂ້າພະເຈົ້າໄດ້ຮັບລາງວັນລະດັບອາຊຽນ ຄືປີ 2013 ໄດ້ຮັບລາງວັນເຄື່ອງໝາຍການຄ້າອາຊຽນ ແລະ ປີ 2014 ໄດ້ຮັບລາງວັນໜຶ່ງໃນ 100 ນັກທຸລະກິດໜຸ່ມດີເດັ່ນອາຊຽນ ນັບວ່າເປັນຄວາມພາກພູມໃຈເປັນຢ່າງຍິ່ງ ແລະ ກໍ່ເປັນສິ່ງທ້າທາຍໜຶ່ງທີ່ຈະຕ້ອງໄດ້ພະຍາຍາມສູງໃນການຮັກສາ ຜູ້ປະກອບການດີເດັ່ນໄວ້ໄປຕະຫຼອດ ແລະ ກ່ອນຈະໄດ້ລາງວັນນີ້ ການດຳເນີນທຸລະກິດກໍ່ບໍ່ແມ່ນງ່າຍໆ ໃນໄລຍະຜ່ານມາ ນອກຈາກຈະເຮັດທຸລະກິດບໍລິສັດ ລັດສະໝີຕົບແຕ່ງພາຍໃນ ແລະ ບໍລິສັດ ແມ່ຂອງລາວຂາອອກ-ຂາເຂົ້າແລ້ວ ຕໍ່ມາປີ 2005 ກໍ່ໄດ້ມາເຮັດທຸລະກິດຮ້ານເຂົ້າປຽກປາແຊບອີ່ຫຼີ ທີ່ຕັ້ງຢູ່ບ້ານວັດຈັນ ເມືອງຈັນທະບູລີ ນະຄອນຫຼວງວຽງຈັນ ດ້ວຍການບໍລິການດີເລີດ ເນັ້ນຄວາມສະອາດ ແລະ ເປັນອາຫານສົ່ງເສີມສຸຂະພາບ ຈຶ່ງເຮັດໃຫ້ລູກຄ້າທັງພາຍໃນ ແລະ ຕ່າງປະເທດເຂົ້າບໍລິການເປັນຈຳນວນຫຼວງຫຼາຍ ແລະ ຕໍ່ມາຕອບສະໜອງຕາມຄວາມຕ້ອງການຂອງລູກຄ້າ ຈຶ່ງໄດ້ຂະຫຍາຍສາຂາອອກໄປຫຼາຍຈຸດ ພາຍໃນເຂດຕົວເມືອງນະຄອນຫຼວງວຽງຈັນ ເປັນຕົ້ນ ສາຂາບ້ານອານຸ ໃກ້ກັບທະນາຄານພົງສະຫວັນ ສາຂາສະໜາມບິນພາຍໃນວັດໄຕ ສາຂາສູນການຄ້າໄອເຕັກມໍຊັ້ນໃຕ້ດິນ ແລະ ຊັ້ນ 6 ແລະ ສາຂາຊັ້ນ 4 ສູນການຄ້າວຽງຈັນເຊັນເຕີ ແລະ ພາຍໃນປີ 2016 ຍັງມີແຜນຂະຫຍາຍສາຂາໄປຕ່າງແຂວງຄື: ແຂວງຈຳປາສັກ ສະຫວັນນະເຂດ ແລະ ແຂວງຫຼວງພະບາງ ໃນອະນາຄົດຂ້າງໜ້າ ຍັງມີແຜນຂະຫຍາຍໄປທຸກແຂວງ ສ່ວນຢູ່ຕ່າງປະເທດແມ່ນບັນດາປະເທດອາຊຽນ ແລະ ປັດຈຸບັນ ມີແລ້ວຢູ່ສາຂາພູເກັດ ປະເທດໄທ ເພື່ອໃຫ້ຊາວຕ່າງປະເທດໄດ້ຊີມ ແລະ ໄດ້ບໍລິໂພກອາຫານຂອງລາວ ເພື່ອເປັນການໂຄສະນາປະເທດລາວ ໄປໃນໂຕໃຫ້ຊາວໂລກໄດ້ຮູ້ຈັກປະເທດລາວຫຼາຍຂຶ້ນ.
ສຳລັບຮ້ານອາຫານແຊບອີ່ຫຼີ ຈະປະກອບມີ ເຂົ້າປຽກ ເຂົ້າປຸ້ນ ແລະ ເຝີ ສ່ວນເຂົ້າປຽກປາ ຈະມີປາຕອງ ແລະ ປາທະເລ (ປາລໍລີ) ລາຄານັບແຕ່ 15-18 ພັນກີບຕໍ່ຖ້ວຍ ແລະ ຮ້ານສາຂາ ແຕ່ລະແຫ່ງຈະເນັ້ນເປັນຫ້ອງແອ ເພື່ອສ້າງຄວາມສະດວກສະບາຍໃຫ້ແກ່ລູກຄ້າ ໃນເວລາຮັບປະທານອາຫານ ສຳລັບຮ້ານອາຫານໃຫຍ່ ເປັນຕົ້ນ ຢູ່ສາຂາສູນການຄ້າວຽງຈັນເຊັນເຕີ ຈະມີອາຫານພື້ນບ້ານແບບຄົບວົງຈອນ ນັບແຕ່ເໜືອເຖິງໃຕ້ ນອກຈາກຈະມີອາຫານປະເພດເສັ້ນແລ້ວ ຍັງມີປີ້ງໄກ່ນາປົ່ງ ລາບ ແກງໜໍ່ໄມ້ ແກງເຫັດ ໝົກຂີ້ປາ ເອາະຫຼາມ ແລະ ອື່ນໆຫຼາຍຢ່າງ ຄອຍບໍລິການຕາມຄວາມຕ້ອງການຂອງລູກຄ້າ ທັງພາຍໃນ ແລະ ຕ່າງປະເທດ.
ແຫລ່ງຂ່າວ:
