ບັນດາເຈົ້າໜ້າທີ່ ໃນນະຄອນຫລວງໂຊລຂອງເກົາຫລີໃຕ້ ກ່າວວ່າ ລົດໄຟໃຕ້ດິນຂະບວນນຶ່ງ ໄດ້ຕຳກັນກັບລົດ
ໄຟອີກຂະບວນນຶ່ງ ເຮັດໃຫ້ມີຜູ້ໄດ້ຮັບບາດເຈັບ 170 ຄົນ ແຕ່ບໍ່ມີຜູ້ໃດໄດ້ຮັບບາດເຈັບສາຫັດ.
ບັນດາເຈົ້າໜ້າທີ່ກ່າວວ່າ ອຸປະຕິເຫດດັ່ງກ່າວ ໄດ້ເກີດຂື້ນໃນວັນສຸກມື້ນີ້ ໃກ້ກັບສະຖານີ Sangwangsimni
ຢູ່ທາງພາກຕາເວັນອອກຂອງໂຕເມືອງ.
ລົດໄຟຕູ້ນຶ່ງໄດ້ຕົກລາງ ເວລາລົດໄຟຂະບວນດັ່ງກ່າວແລ່ນຕຳກົ້ນລົດໄຟອີກຂະບວນນຶ່ງ ທີ່ພວມຈອດຢູ່
ສະຖານີລົດໄຟ.
ເບິ່ງວີດີໂອ
ບັນດາເຈົ້າໜ້າທີ່ກຳລັງສືບສວນວ່າ ແມ່ນຫຍັງອາດເປັນສາເຫດທີ່ພາໃຫ້ເກີດການຕຳກັນດັ່ງກ່າວ.
ໂທລະພາບ YTN ລາຍງານວ່າ ຜູ້ໄດ້ຮັບບາດເຈັບສ່ວນໃຫຍ່ແມ່ນເກີດຂື້ນເວລາຜູ້ໂດຍສານໂຕນອອກຈາກລົດໄຟ ແລ້ວພາກັນຍ່າງໄປຫາສະຖານີທີ່ຢູ່ໃກ້ໆນັ້ນ.
ອົງການຂ່າວຣອຍເຕີ້ ລາຍງານວ່າ ການປະກາດໃນຂັ້ນຕົ້ນ ບອກໃຫ້ບັນດາຜູ້ໂດຍສານພາກັນຢູ່ໃນລົດ ແຕ່ວ່າ ສ່ວນໃຫຍ່ຂອງຜູ້ໂດຍສານພາກັນບໍ່ຫົວຊາ ງັດໃຫ້ປະຕູເປີດອອກ ແລ້ວໂດດລົງໄປໃສ່ລາງລົດໄຟ.